Қазақстанның танымал тау-шаңғы курорттары
Демалысыңыз мінсіз өтуі үшін Қазақстанның түрлі-түрлі аймағындағы тау-шаңғы курорттары тізімін жинап, қосымша ақпаратымен бірге дайындап қойдық.
Достарыңызға жіберу
Шамамен қанша ақша кететінін анықтау үшін бір адамға арқанжолдың күндізгі абонементі, шаңғыны жалға алу құны, түскі және кешкі ас пен біркүндік қонақүй бөлмесінің бағасын қосып есептедік.
Shymbulak
Мекенжайы: Алматы, Керей-Жәнібек хандар көшесі, 558/1.
Тағы не бар: зиплайн, атпен серуендеу, альпинистер паркі, арқан паркі, параплан, топпен тауға жаяу шығу.
Қанша тұрады: 69 000 теңгеден басталады.
Тағы не бар: зиплайн, атпен серуендеу, альпинистер паркі, арқан паркі, параплан, топпен тауға жаяу шығу.
Қанша тұрады: 69 000 теңгеден басталады.
2023 жылы Шымбұлақ ең биік түнгі тау-шаңғы еңісі ретінде Гиннес рекордтар кітабына енді. 70 жылдық тарихы бар бұл курорттың Талғар асуындағы ең биік нүктесі 3 200 метрге жетеді. Шымбұлақ трассаларының деңгейі әртүрлі: биіктігіне қарай қара, көк, қызыл болып бөлінеді. Жалпы ұзындығы — 25 шақырым. Денені шынықтырып, бойды шымырлатып қана қоймай, курорт маңындағы мейрамханаларда қар басқан асқар таулардың көркемдігіне тамсанып отырып шай ішуге болады. Онда кафе, мейрамхана, қонақүй — бәрін табасыз.
«Ақ бұлақ»
Мекенжайы: Алматы облысы, Талғар ауданы, Сарбаз шатқалы көшесі, 1а/1.
Тағы не бар: тұз шахтасы, бассейн, сауна, массаж.
Қанша тұрады: 50 000 теңгеден басталады.
Тағы не бар: тұз шахтасы, бассейн, сауна, массаж.
Қанша тұрады: 50 000 теңгеден басталады.
Қарағай тоғайлары мен қайың ормандары қаумалаған «Ақ бұлақ» курорты — жан рахаты. Мұнда төрт трасса бар, біреуі балалар мен енді үйреніп жүргендерге, үшеуі шаңғы мен сноубордты жатырқамайтын жандарға арналған. Ең биік нүктесі — 2 600 метр. Ілмекті не орындықты арқанжолмен көтерілуге болады. 8-13 минут жүретін гондолалар да бар. Курорт аймағында түрлі бөлмелері бар қонақүй, спа мен емдеу-сауықтыру бағдарламаларын таба аласыз.
«Алтайские Альпы»
Мекенжайы: Өскемен, Қабанбай батыр көшесі 160, 1-корпус.
Тағы не бар: монша, арқан паркі, балық аулау, атпен серуендеу, панто-ем.
Қанша тұрады: 32 500 теңгеден басталады.
Тағы не бар: монша, арқан паркі, балық аулау, атпен серуендеу, панто-ем.
Қанша тұрады: 32 500 теңгеден басталады.
Қысы қарашадан басталып, сәуірге дейін жалғасатын «Алтайские Альпы» — панто-ем мен белсенді демалысты біріктіргісі келген жанға таптырмас жер. Мұнда сырғанауға арналған 2 400 метрлік он екі еңіс бар. Ерекшелігі: шаңғы-сноуборд үйренгісі келген жандар курорт аймағында нұсқаушылар мектебіне барса болады, трассаларының деңгейі де әртүрлі. Бірнеше күнге қаламын десеңіз 43 бөлмелі қонақүйде қонақтай аласыз. Спорттық ойын-сауықтан бөлек моншаға түсіп, атқа отырып, демалып қайтасыз.
Oi-Qaragai
Мекенжайы: Алматы облысы, Талғар ауданы, Ой-Қарағай шатқалы, 225.
Тағы не бар: ат орталығы, троллей паркі, пейнтбол, арқан паркі, жаяу турлар.
Қанша тұрады: 53 000 теңгеден басталады.
Тағы не бар: ат орталығы, троллей паркі, пейнтбол, арқан паркі, жаяу турлар.
Қанша тұрады: 53 000 теңгеден басталады.
Отбасылық тау курорты саналатын Oi-Qaragai 10 гектар аумақты алып жатыр. Мұнда жалпы ұзындығы 28 шақырым болатын он бес трасса, тоғыз түрлі мейрамхана мен жеті қонақ үй бар. Тіпті балаларға арналған ойын орталығы да жұмыс істейді. Oi-Qaragai-дың спортсүйер қауымға да, табиғат аясында демалғысы келетін жанға да ұнайтыны сөзсіз.
«Нұртау»
Мекенжайы: Өскемен, Бобровка ауылынан 8 шақырым жерде.
Тағы не бар: сноутюб, монша.
Қанша тұрады: 41 000 теңгеден басталады.
Тағы не бар: сноутюб, монша.
Қанша тұрады: 41 000 теңгеден басталады.
«Нұртауда» 2 000 метрлік екі негізгі трасса мен сырғанауды үйренуге арналған бір еңіс бар. Курорт аумағында жабдықталған, жылы, 20-40 адамдық самалжай, фрирайд еңісі мен жүгіріп сырғанайтын шаңғы жолы қарастырылған. Қонып қалғысы келетін қонақтарға екі коттедж қалашығы салынған. Одан бөлек, «Теремок» балабақшасы мен орыс мәзірін ұсынатын «Намедни» мейрамханасы жұмыс істейді.
«Тау Самалы»
Мекенжайы: Түркістан облысы, Төле би ауданы, Нысанбек ауылы.
Тағы не бар: бейби-лифт, қар кешкішпен сырғанау, атпен серуендеу.
Қанша тұрады: 39 000 теңгеден басталады.
Тағы не бар: бейби-лифт, қар кешкішпен сырғанау, атпен серуендеу.
Қанша тұрады: 39 000 теңгеден басталады.
Қысы жылы оңтүстікте орналасқанына қарамастан «Тау Самалы» курортында 1 800 метрлік шаңғы, сноуборд трассаларында сырғанай аласыз. Бірнеше күнге қалғыңыз келсе, курортта бассейні, саунасы мен бильярды бар қонақүй, жылы коттедждер немесе VIP-үйлер жалға беріледі. Мейрамхана, караоке, орыс моншасы, фин саунасы мен конференция өткізетін залдар да бар.
Stardust Camp
Мекенжайы: Риддер қаласы, Жоғарғы Хариузовка, Энергетиктер көшесі 1/3.
Тағы не бар: монша, сноутюб.
Қанша тұрады: 29 000 теңгеден басталады.
Тағы не бар: монша, сноутюб.
Қанша тұрады: 29 000 теңгеден басталады.
Stardust Camp — Жоғарғы Хариузовка ауылында орналасқан тау-шаңғы базасы. Мың метрге созылған ілмекті арқанжол еңістен сырғанаймын деген жанды әртүрлі деңгейге апарады. Керек-жарақты жалға ала аласыз. Базада жатын орындар мен моншасы бар үй де жалға беріледі. Ыстық тамақ пен жүрек жалғауға болатын кафе бар.
«Эдельвейс»
Мекенжайы: Риддер қаласы, Попов көшесі, 11.
Тағы не бар: тау турлары, коньки.
Қанша тұрады: 32 000 теңгеден басталады.
Тағы не бар: тау турлары, коньки.
Қанша тұрады: 32 000 теңгеден басталады.
«Эдельвейс» демалыс базасы түрлі деңгейдегі сырғанауға арналған трассалармен қамтылған. Соның ішінде слаломмен айналысуға (таудағы қоршаумен белгіленген трассалардан шаңғымен түсу) сертификатталған еңіс бар. Жазда база аймағында Батыс Алтайдың табиғат аясына жорықтар мен тау өзендерінде рафтинг ұйымдастырылады.
«Көксай»
Мекенжайы: Жамбыл облысы, Жуалы ауданы.
Тағы не бар: атпен серуендеу, монша.
Қанша тұрады: 37 000 теңгеден басталады.
Тағы не бар: атпен серуендеу, монша.
Қанша тұрады: 37 000 теңгеден басталады.
Таулы жерде орналасқандықтан «Көксайдың» қысы суық, жазы салқын. Онда шаңғы мен сноуборд теуіп, атқа отырып, моншаға түсе аласыз. Қонақтарға коттедждер мен іші жылы киіз үйлер жалға беріледі. Аумағында мейрамханалар мен мангалда тамақ пісіретін аймақ та бар.
