Өнер, кофе және шопинг сүйер қауымға арналған Сеул бойынша үлкен гид
Гедонистерге және көркем талғамын дамытқысы келетіндерге арнаймыз.
Сәлем! Менің атым – Аня, мен коммуникациялық агенттікте жұмыс істеймін, онда брендтер мен мәдени жобаларға арналған креативті промо-кампанияларды әзірлеймін. Әрине, кәсіби деформациясыз болмайды: мен үшін саяхат – тек демалыс пен серігу ғана емес, сондай-ақ талғампаздығымды дамыту тәсілі. Мен скептицизм мен снобизмді өшіріп, қызығушылық пен зерттеушілік құштарлығымды қосуға тырысамын. Әр сапарымда зерттеуші тәртібіне, өзіме барынша көп сұрақ қоямын: «Мұны қалай ойлап тапты?», «Оларды не шабыттандырды?», «Бұл маған қандай эмоция сыйлайды?», «Олар қандай идеяны жеткізгісі келеді?».
Алматы – Сеул тікелей рейсі, және міне, мен көптен күткен арманымды орындаймын: трендтер туындайтын, әсер маркетингі әр қадамда жұмыс істейтін, ал көздер көргендерін «ескертпе» тізіміне сақтап үлгермейтін қалаға ұшып барамын. Бұл арманым 2024 жылдың наурыз айының соңында, яғни шамамен бір жыл бұрын орындалды, бірақ алған әсерім әлі күнге дейін менімен бірге.
Әр сапарыма мұқият дайындаламын. Менің Google картамда Сеул бойынша 144 белгіленген орын бар, және бұл – Оңтүстік Корея астанасында көруге тұрарлық дүниенің жартысы да емес деп ойлаймын. Бұл жинақта үш бөлім бар: шопинг, өнер және дәмханалар. Әр бөлімде мен ерекше деп санайтын концепттер мен локациялар бар. Бұл материалды сіздің Сеулді зерттеуіңізге арналған бастау нүктесі деп қабылдауға болады.
Шопинг
Сеулдегі шопинг – бұл ең алдымен сән мұражайларына ұқсайтын концепт-сторлар, бірақ мұндағы барлық затты сатып алуға болады.
Gentle Monster
Оңтүстіккореялық Gentle Monster көзілдірік бренді бүкіл әлемге мінсіз дизайнымен, жаңашыл көзқарасымен, ерекше коллекцияларымен және көрме залдарына ұқсас дүкендерімен танымал.
Мадонна мен Леди Гага тағатын көзілдіріктер заманауи арт-инсталляциялармен үйлесіп, кейде басты назар неге аударылуы керек екенін түсіну қиынға соғады. Дүкендегі ең танымал нысандардың бірі – Giant Head Trio. Ол көзін ашып-жұмып, тіпті бет-әлпетін өзгерте алатын роботтандырылған үш бас.
Көзілдіріктердің бағасы: 137 000 теңгеден басталады.
Брендтің бестселлерлерін нақты атап өту қиын. Әр жаңа коллекцияны сәнқұмарлар аңдып жүріп, сатып алады, топтама бірден солд аут болады. Gentle Monster – футуризмнің жарқын амбассадорларының бірі.
Сеулде олардың көптеген концепт-сторы бар. Егер қайсысына бару керектігін білмесеңіз, Haus Dosan дүкеніне бас сұғыңыз. Ол Tamburins және NUDAKE брендтерімен біріктірілген, олар туралы кейінірек айтып беремін.
Ader Error
Британдық GQ ADER киім брендін K-pop пен кимчимен қатар Кореяның ең маңызды мәдени экспортының бірі деп атады. Ader Error атауының мәні оның әрбір әрібін ашып жазғанда түсінікті болады: A = aesthetic («эстетика»), D = drawing («сурет салу»), ER = сөзді іс-әрекетті білдіретін зат есімге айналдыратын жұрнақ. Ал атаудың екінші бөлігі Error — «қате». Осылайша, бренд командасы өздерінің шабытын кемшіліктерден алатынын меңзейді.
ADER-дің негізін қалаушылар — анонимді ұжым, олардың басты миссиясы — сәнді өнер арқылы насихаттау. Топтамаларында ашық түстер мен унисекс үлгі көп: шұлықтар 17 мың теңгеден, жеңіл күртелер 197 мың теңгеден, ал қысқы сырт киімдер 340 мың теңгеге дейін барады. Цифрландыруға басымдық бергенімен, ADER офлайн кеңістікте де таңғалдырудан жалықпайды: Seongdong-gu ауданындағы олардың концепт-дүкеніне кіру үшін кезекке тұру қажет, ал ішіндегі әр залды асықпай тамашалау керек. Дүкен интерьері ғарыш тақырыбында жасалған: еденде — кратер, төбеде — ғарышкер, ал киім ауыстыру бөлмесі иллюминаторы бар шаттл түрінде безендірілген. Соңғы қабатында кофе дүкені мен төбесінде терраса бар.
Tamburins
Gentle Monster иесінің бьюти бренді. Tamburins дүкендерінен ерінге арналған бальзам, қол кремі, парфюм, душқа арналған гель, сондай-ақ үйге арналған диффузорлар мен шамдар таба аласыз. Хош иістер – әркімнің жеке талғамына байланысты, сондықтан бәрін байқап көріп, өзіңізге ұнайтын бірегей иісті таба аласыз. Ерекше ләззат сыйлайтын тағы бір нәрсе – өнім қаптамасының дизайны. Мысалы, жұмыртқа қабығының пішіні мен текстурасына ұқсайтын бальзам (10 мың теңге), ал алқа ретінде жасалған қол кремді сәнді аксессуар ретінде тақсаңыз болады(8 мың теңге). Сеулдің әртүрлі ауданында орналасқан Tamburins дүкендері ерекше дизайнымен таңғалдырады. Мүмкіндігіңіз болып жаста, әрқайсысына барып көріңіз. Бұл дүкендер өнер кеңістігіне айналған. Негізгі ерекшелігі – алып шамдар мен футуристік мүсіндер. Мысалы, 1:1 масштабында жасалған шам-пішінді диванды көре аласыз.
Kinfolk
Журнал ма? Комьюнити ме? Әлде slow life & luxury стиліндегі ритуалдар ма? Kinfolk – осының бәрін біріктіретін, миллениалдар үшін өмір салтының бір белгісіне айналған бренд. Баспа журналы ретінде басталған Kinfolk уақыт өте келе дизайнерлер үшін шабыттың қайнар көзіне айналып, тіпті «Kinfolk стиліндегі интерьер» деген тіркес пайда болды. Скандинавиялық минимализм мен азиялық атмосфераны сезінгіңіз келсе, танымал журналдың шоурумына барып көріңіз. Kinfolk бренді эмоционалды маркетингте одан әрі қадам жасап, Kinfolk Notes суббрендін құрды, оның ассортиментінде үйге арналған хош иістер (55 мың теңгеден бастап) бар. Сеулде Kinfolk-тың бірнеше кеңістігі бар, ал Gangnam ауданындағы дүкенде кофехана бар.
BORNTOSTANDOUT
Мұражайдың дәл жанында қызыл есік (негізі, жарықшаққа көбірек ұқсайды) бар, бұл – оңтүстіккореялық парфюмерлік Borntostandout брендінің концепт-дүкені. Borntostandout философиясы атауында-ақ айқын көрініс тапқан. Аталмыш бренд әлеуметтік шектеулерге қарсы, арандатушылық пен шектен шығудың, тіпті ессіздікті қолдайтын секілді. Мұны дүкен кеңістігінің өзі де, бренд өнімдері де айқын көрсетеді: ақ фарфордағы қан қызыл жазулар (парфюм флакондарының дизайны Чосон дәуірінің дәстүрлі корей фарфорынан шабыт алған, ал олардың жұмыр формалары адам денесінің иірімдерін еске түсіреді), батыл хош иістер, айқайлап тұрған атаулар мен ұрандар. Қысқаша айтқанда, Borntostandout – ессіздік пен құштарлықтың ерекше үйлесімі. Бұл жерге міндетті түрде бір рет болса да кіріп көру керек!
Өнер
Бейнелеу өнері, дизайн, сәулет – бұл бөлімде Сеулдің мәдени келбетімен танысуға көмектесетін орындар жиналған.
Leeum Museum of Art
Бағасы: мұражайдың тұрақты экспозициясы – тегін; барлық уақытша көрмелерге билет – 20 000 вон (7 мың теңге).
Мұражай Samsung брендінің бастамасымен ашылып, тақырыптық тұрғыда екі секторға бөлінген: өткен және қазіргі заман. Бірінші бөлімде дәстүрлі өнердің ең үздік жинақтарының бірі ұсынылған, ал екіншісінде заманауи суретшілердің жұмыстары қойылған. Мұнда үнемі қызықты көрмелер ұйымдастырылады, сондықтан уақытша экспозициялардың кестесін тексеріп отырған жөн.
DDP (Dongdaemun Design Plaza)
Бағасы: кіру тегін, жекелеген экспозициялар мен аймақтардың бағасын кассада нақтылаған дұрыс.
Егер ғимаратты Заха Хадид бюросы жобалаған болса, оны міндетті түрде көру керек. DDP — ауқымды мәдени орталық, жеті қабаттан тұрады және кейде ғарыш кемесін, кейде алып саңырауқұлаққа ұқсап кетеді. Кешенде жерүсті және жерасты деңгейлері, көрме залдары, кітапхана, дәмхана, дизайн-маркет және жақын жерде саябақ бар. Жалпы аумағы — 38 мың шаршы метр, сондықтан оны зерттеуге кемінде жарты күн бөлген жөн. Ал кешке DDP-ге қайта келіңіз — жарық қосылған кезде ғимарат одан да футуристік бола түседі.
MMCA: National Museum of Modern and Contemporary Art
Бағасы: Экспозицияға байланысты, үш немесе одан да көп көрмеге кіру билеті – 7 000 вон (2 500 мың теңге), сәрсенбі және сенбі күндері 18:00-ден кейін кіру тегін.
Қазіргі заманғы өнерді ұнататындарға арналған керемет орын. MMCA-да корей және шетелдік суретшілердің шығармашылығына арналған көрмелер мен іс-шаралар тұрақты түрде өткізіледі. Наурыз айында – алты көрме, актуалды кестені ресми сайттан тексеруге болады. Мұражайда өнерге арналған кітаптардың керемет таңдауы бар дүкен және брендтік өнімдер сатылады. Атмосфераны толық сезіну үшін шайханаға соғып кетуді ұмытпаңыз.
Starfield Library
Бағасы: тегін.
Starfield сауда орталығындағы алып кітапхана TikTok-ты жаулап алды. Мұнда фотоға түскісі келетіндер кезекке тұрады. Келушілер ағыны үлкен болғаны соншалық, оны қадағалауға тура келеді. Кеңістік шынымен әсерлі: биіктігі 13 метрге жететін алып кітап сөрелері, мол жарық пен ауа. Ең жақсы көрініс екінші қабаттан ашылады. Айтпақшы, кітапхананың барлық кітабі шынайы емес, арасында муляждар да бар деген сыбыс бар. Сондықтан кітап оқығыңыз келсе, өзіңізбен бірге ала келгеніңіз жөн.
Дәмханалар
Сеулде тез жүрек жалғап алу? Олай болуы екіталай. Себебі әр кофехана, дәмханалар мен мейрамханалар барлығы дерлік интерьерімен, концепциясымен, мәзірімен және ұсақ-түйек дүниелермен таңғалдыруға тырысады.
NUDAKE
Мұнда десерттер перфоманстар! Олардың тек дәмін татып қана қоймай, сонымен қатар Сеулдің ерекше көрнекіліктерінің бірі деп санауға болады. Бұл – бұған дейін шопинг бөлімінде айтылған Gentle Monster-дің тағы бір жобасы, және бұл команданың креативтілігінің шегі жоқ секілді.
Бұл жердің дизайны да футуристік. Мұнда адам бойынан да биік круассан, круассан пішіндес жиһаз, киберпанк роликтері көрсетілетін экрандар және өнер туындысына ұқсайтын десерт витринасы. Олардың әлеуметтік желілердегі вирусқа айналған контенті мен брендтің көрегендік стилі – жай ғана хайп емес. Десерттері шын мәнінде ерекше әрі дәмді. Ең танымал позициялар жылдам сатылып кетеді: нано-круассан (800 теңге) және матча қосылған қара қатпарлы тоқаш (14 мың теңге) мен барған әр бөлімшесінде жоқ болып шықты. Менің фаворитім – қызанақ пішініндегі десерт (4 мың теңге), оның салмасына ақ шоколад-маракуйя қоспасымен толтырылған.
Music Complex и Vinyl & Plastic
Музыкасүйер қауымға таптырмас орын: Сеулде пластинка тыңдауға арналған кофеханалар мен барлар танымал. Мұнда сіз жалғыз өзіңіз келіп, сүйікті винилді таңдап, ыңғайлы атмосферада тыңдай аласыз. Бұл – өзіңізбен кездесудің тамаша жоспары: сүйікті сусыныңызды алып, винил қойып, құлаққап киіп, өзгелерге кедергі жасамай, жай ғана рахаттану.
Қызығы, Vinyl & Plastic, Leeum Museum of Art сияқты, ірі корпорацияға (бұл жағдайда Hyundai) тиесілі. Соған қарамастан, бұл орын Сеулдің мәдени кеңістігіне табиғи түрде үйлесіп кеткен.
Nuldam Space
Вегандық дәмхана. Мұнда тамақтан бұрын оның атмосферасы маңыздырақ. Мұнда болашақтағы өзіңізге немесе жақын адамыңызға хат жаза аласыз. Қызметкерлер сізге барлық қажетті затты береді, жазылған хатты әдемі конвертке салып, мөрмен бекітеді және жөнелту уақыты келгенше сөреге қояды. Кез келген күнді таңдап, әлемнің кез келген жеріне хат жібере аласыз. Болашаққа Сеулден жолданған хат – ерекше кәдесый.
Made Lim Cafe
Саяхатты Инчхон әуежайынан 20 минуттық жерде орналасқан 120 жылдық неоготикалық шіркеу ғимаратында орналасқан дәмханда аяқтау – тамаша финал сияқты. Сыртынан қарағанда бұл классикалық кірпіштен салынған шіркеу, ал ішіне кіргенде көпдеңгейлі кеңістік ашылады. Жертөлесі үңгір тәрізді безендірілген, онда фонтан бар, қабаттардың бірінде ағаштар мен бұталар өсетін жасыл оазис, сонымен қатар шатырға да шығуға болады. Бұл жерден наубайхана өнімдерін міндетті түрде жеу керек, бірақ басқада тойымды тағамдар бар.
