Астанаға жақын қысқы базаларға бару үшін қанша ақша керек? Санап бердік

Бурабайда, Зерендіде және елордаға жақын басқа демалыс орындарында демалу қанша тұратынын айтып береміз.

Достарыңызға жіберу

Қала шуынан тынығу үшін қар басқан аппақ далаға демалуға баруға болады. Бәрін ұмытып, шаңғы, сноуборд, коньки тебу арқылы шаршағаныңызды баса аласыз. Біз Астанаға жақын қысқы базалар топтамасын жасап, оған қанша ақша кететінін де санап бердік.

Адам басына деп нені санадық: шаңғы костюмін жалға алу, арқан жол, шаңғыны бір сағатқа жалға алу, түскі және кешкі ас, қонақүй бөлмесі. Толық кесте материалдың соңында бар.

BalQaragai

Қалай жете аламын: Астанадан 22 шақырым жерде (көлікпен 40 минутта жетесіз). Такси құны — адам басына шамамен 5 000 теңге.
Ойын-сауық: тюбинг, коньки, шаңғы мен сноуборд, зообақ, сауна, үстел ойындары, қар кешкіш.
Тамақтану: мейрамхана, орташа чек — 7 000 теңге.
Адам басына кететін сома: 70 000 теңгеден басталады.

Жыл бойы жұмыс істейтін отбасылық курорт Аққайың 2 (Малотимофеевка) ауылында орналасқан, жанында қайың орманы бар. Мұнда көп адам болып келіп демалуға бар жағдай жасалған: жалға беретін бөлмелер мен ағаштан жасалған бөлек үйлер, гриль-аймақ пен ат орталығы бар. Бұл жердің бағалары жұмыс және демалыс күндері әртүрлі, сондықтан жеңілдіктерді Instagram парақшасынан бақылап жүрген жөн.

Discovery Borovoe

Қалай жете аламын: Астанадан 263 шақырым жерде (көлікпен 2,5 сағатта жетесіз). Такси құны — адам басына шамамен 6 000–7 000 теңге.

Ойын-сауық: коньки, шаңғы, тюбинг, жабық аквапарк, жаттығу залы, спа-орталық.

Тамақтану: үш мезгілдік тамақтану тур ақысына кіреді.

Адам басына кететін сома: шағын тур (3 күн) 94 000 теңгеден басталады.

Discovery Borovoe — жай ғана база емес, толыққанды демалыс турларын ұсынатын курорттық қонақүй. Онда демалу үшін дүйсенбі–бейсенбі аралығына есептелген үлкен тур, не жұма-жексенбі аралығында өтетін шағын тур сатып ала аласыз. Тур бағасы ересектерге шамамен 94 000 теңгеден, 6–12 жастағы балаларға 65 мыңнан басталады, ал 6 жасқа толмаған балалар тегін кіре алады. Бұл сомаға тамақтанудан бөлек, бассейн, джакузи, жабық аквапарк, жаттығу залы, спа-орталық және басқа нәрселер де кіреді. Балаларға арналған ойын-сауық түрі өте көп: үстел теннисі, ойын бөлмесі, арқанжол паркі, анимациялық бағдарлама бар. Одан бөлек, Discovery Borovoe аумағында коньки тебетін мұз айдынын да, сноутюбингке арналған трассаны да табасыз. Конькиді 2 000 теңгеге, сырғанайтын баллонды 3 000 теңгеге уақыт жағынан ешқандай шектеусіз жалға алуға болады.

Біз бұл нұсқаны қорытынды кестеге қоспадық, өйткені басқа базаларға қарағанда сіз мұнда бір күнге келіп, керек жабдықты сағаттап жалға ала алмайсыз.

Elikti park

Қалай жете аламын: Астанадан 300 шақырым жерде (көлікпен 3 сағатта жетесіз). Такси құны — адам басына шамамен 7 000 теңге.

Ойын-сауық: шаңғы, сноуборд, тюбинг.

Тамақтану: мейрамхана, орташа чек — 7 000 мың теңге.

Адам басына кететін сома: 58 500 теңгеден бастап.

Бұл отбасылық мерекелерге де, корпоративтік демалыстарға да қолайлы үлкен кешен. Келушілер үшін мұнда қонақүй, тағам таңдауы көп тамаша мейрамхана мен басқа да қызық дүниелер бар. Күндіз ересектер кез келген деңгейдегі шаңғы трассаларында сырғанап, кешке мейрамханаға барып, бильярд ойнап немесе караокеде ән айтып демала алады. Ал балаларға арналған едені жылы жабық ойын алаңы бар.

«Каток и горка»

Қалай жете аламын: Астанадан 248 шақырым жерде (көлікпен 2,5 сағатта жетесіз). Пойызбен «Бурабай курорты» станциясына дейін жетіп алуға болады (бағасы 1 400 теңгеден басталады).

Ойын-сауық: сноутюбинг, мұз айдыны.

Тамақтану: мұнда кафе жоқ, бірақ қаладағы орташа чек — шамамен 5 000 теңге.

Адам басына кететін сома: 12 500 теңгеден бастап.

Щучинскіде орналасқан бұл база — көп ақша шығармай демалғысы келетіндер үшін нағыз таптырмас жер. Көңіл көтеру үшін төбешік пен мұз айдыны бар, коньки мен «ватрушканы»‎ жалға алуға болады. Қалада түнеп, тамақ ішіп алуға болады, сондықтан мұнда өз көлігіңізбен келген жөн.

«Нұртау»

Қалай жете аламын: Астанадан 269 шақырым жерде (көлікпен 2,5 сағатта жетесіз). Такси құны — адам басына шамамен 5 000 теңге.

Ойын-сауық: шаңғы, сноуборд, тюбинг.

Тамақтану: шағын кафе, орташа чек — 4 000 теңге.
Адам басына кететін сома: 33 000 теңгеден басталады.

База маңында қонақүй мен кішігірім кафе жұмыс істейді. Сырғанайтын төбелер үш түрлі деңгейге бөлінген. Егер сіз жаңадан үйреніп жүрсеңіз, төменгі деңгейді таңдаңыз. Ортаңғысы шаңғы немесе сноуборд үстінде еркін тұра алатын адамдарға арналған. Ал жоғарғысы кез келген сынаққа дайын нағыз кәсіпқой жандар үшін. Мұнда достарыңызбен бас қосып, жайланып демалуға болады. Бірақ егер қысқы спорт түрлеріне қызықпайтын балалармен барсаңыз, олардың көңілін аулайтын басқа ойын-сауық жоқ екенін ескеріңіз.

Маңызды
Жылы киім мен дәрі-дәрмектеріңізді ала шығыңыз.
Ең жақын медбөлімшенің қайда екенін біліп барыңыз.
Сақ болыңыз әрі ауа райын бақылап жүріңіз, әсіресе, балалармен баруды жоспарласаңыз.

Демалыс базасы / қызмет түрі	BalQaragai	Elikti park	«Каток и горка»	«Нұртау»
Арқан жол	5 500–6 500 теңге	7 000–13 000 теңге; балаларға: 3 500–4 500 теңге.	жоқ	5 000–9 000 теңге
Сноутюб және баллон+ беби-лифт	3 900 теңге	3 000 теңге	1500–2000 теңге	3 000–6 000 теңге
Шаңғы, сноуборд, коньки	7 000–10 000 теңге; коньки 2 000 теңге	6 000–7 000 теңге	коньки 1 000 теңге	5 000–7 500 теңге. Балалар шаңғысын жалға алу үшін 3 000–6 000 теңге.
Комбинезон, көзілдірік және шлем	8 500 теңге	11 000 теңге	жоқ	10 000 теңге
Нұсқаушы	сағатына 8 000 теңге	сағатына 10 000 теңге	жоқ	50 минуттық сабақ үшін 8 000 теңге.
Қонақүй, бір тәулікке	45 000 теңге	30 000 теңге	жоқ	10 000 теңге