Бір күн ішінде Доһаны қалай аралап шыға аламыз?
Доһа әуежайында келесі рейсін ұзақ күтетіндерге арналған керемет ұсыныс.
Сәлем, менің атым Айғаным, мен Алматыдан шыққан кәсіпкермін. Екі жылдан бері Доһада тұрып жатырмын, қашықтықтан жұмыс істеймін. Осы уақыт ішінде көптеген танысым мен досым Доһа әуежайында жиі келесі рейсін күтіп отыратынын байқадым. Сол себепті қаланы тездетіп аралап шығуға арналған маршрут құрсам ба деп шештім.
Доһа әуежайында келесі рейсіңізді күтіп ұзақ отырып қалғанда не істеу керек?
Зерігудің қажеті жоқ! Доһа халықаралық әуе қатынасының маңызды транзиттік хабына айналды, ал рейстер арасындағы уақыт көбіне 8 сағаттан асады. Уақытты босқа өткізбей, қала бойынша блиц-тур ұйымдастыруға болады. Бірақ бірнеше маңызды жайтты ескеру қажет:
- Доһа — түнгі өмірге бейімделмеген қала. Егер әуежайда 23:00-ден 08:00-ге дейін отыратын болсаңыз, ешқайда шықпай-ақ қойғаныңыз жөн, себебі бұл уақытта көптеген мекеме жабық болады.
- Қатарда ашық киінбеген абзал. Киіміңіз иық пен тізені жабатындай болғаны дұрыс.
- Доһа жаяу серуендеуге аса қолайлы қала емес, сондықтан таксиге отырудан тартынбаңыз. Karwa (көгілдір түсті такси) әуежайдан қажетті жерге шамамен 5 000 теңгеге, кейде одан да арзан бағаға апарып тастайды. Қала ішінде Uber қызметін пайдалануға болады — әр сапардың құны 2 000-6 000 теңге аралығында болады.
Мен маршрутты үшке бөлдім: таңертең, күндіз және кешкі уақытқа. Әр уақыт аралығында бірнеше ұсынысым бар, сондықтан өз талғамыңызға сай жоспар құра аласыз.
Таңертең: ыстықтан қашып, сауда орталықтары мен музейлерді аралаймыз
Place Vendome Doha
Place Vendome Doha
9:00 мен 13:00 арасы сауда орталығына немесе музейге баруға таптырмас уақыт. Осы кезде қала өмірі жанданады, сондықтан әуежайдағы шаруаларыңызды аяқтап, серуендеуге аттануға болады. Таңғы аптап ыстықтан сақтану үшін келесі нұсқалардың бірін таңдаңыз:
Villagio Mall
Венеция стилінде безендірілген сауда-ойын-сауық орталығы. Мұнда жасанды канал бойымен гондолада серуендеп, дүкендер мен кафелерге кіріп шығуға болады. Егер жүрек жалғап алатын орын іздесеңіз, халықаралық желілердің көптеген кафесі бар, алайда мен тек осы өңірге тән ерекше орындарды ұсынар едім. Мысалы үнді тағамдарын пісіретін Asha’s немесе кофе мен тәттілерді әзірлейтін Halo.
Place Vendome Doha
Әндететін субұрқақтары бар алып сауда орталығы. Бұл жерде қымбат брендтер мен үйреншікті дүкендер жақсы үйлесім тапқан. Ғимараттың сәулеті ортағасырлық қамалды еске салады, сондықтан архитектураны сүйетін жандардың бір қуанып қалатыны сөзсіз.
Сауда орталығы болғанына қарамастан, нағыз гурмандар үшін де ерекше тағамдар бар. Yasmine Palace мейрамханасында араб пен үнді тағамдарының үйлесімін байқап көріңіз немесе Abajour-да ливандық стритфудтан дәм татыңыз.
Ислам өнері музейі
Кіру құны: шамамен 15 000 теңге.
Ғимараттың өзіне сөз жоқ, ал ішінде көрмелері бар жайлы залдар орналасқан. Үлкен витражды терезеден шығанақтың керемет көрінісі ашылып, сол жерде отырып кофе ішуге болады. Музей Mina District ауданына жақын орналасқан, сол себепті таңғы ас немесе түскі ас үшін жағалау бойындағы орындардың бірін таңдауға мүмкіндік бар.
Катар ұлттық мұражайы
Кіру құны: шамамен 15 000 теңге.
Архитектор Жан Нувель жобалаған «шөл раушаны» пішініндегі музей. Заманауи технологиялар Қатар тарихына терең бойлауға мүмкіндік береді — көшпелі дәуірден бастап бүгінгі күнге дейінгі мәдениеттің дамуын тамашалай аласыз.
Күндіз: қаланы тамашалап, қарақ шайынан дәм татамыз
14:00-ден 17:00-ге дейін, күннің аптап ыстығы сәл бәсеңдеген кезде, әдемі аудандарға барып келіңіз:
Mina District
Араб стиліндегі түрлі-түсті үйлерімен танымал Инстаграм беттеріндегідей орын. Мұнда жағалау бойымен серуендеп, балық базарына барып, шағалаларды тамақтандырып, кофе ішуге болады. Fun fact: дәл осы жерде Том Круз түскен Mission: Impossible фильмінің бір көрінісі түсірілген.
Жағалау бойында түрлі тағамдар ұсынатын көптеген кафе бар: пицца, бургер, үнді карриі немесе жай ғана круассан. Егер тойып тамақтанғыңыз келмесе, жергілікті қарақ шайын татып көріңіз. Ол біздің қазақы шайға ұқсайды, бірақ одан да қою, тәтті және кардамон мен шафранның хош иісі аңқып тұрады. Ең дәмді қарақ шайын Karak Mqanes кафесінен іше аласыз — оны Mina District жағалауын аралап жүріп, оңай тауып алуға болады.
Katara Cultural Village
Қаланың мәдени орталығы — амфитеатрлары, көркем галереялары және Galeries Lafayette дүкенімен танымал жер. Бұл жерде Қатардың дәстүрлі мәдениетімен танысып, өнер мен архитектураның ерекше үйлесімін тамашалауға болады.
Кешке қарай базар аралап, кешкі ас ішу
Кешкі базарда
Souq Waqif
Souq Waqif
18:00-ден бастап Souq Waqif базарында серуендейміз — бұл Доһадағы ең танымал әрі қызу сауда орындарының бірі. Мұнда түрлі кәдесыйлар сатып алуға болады: орамалдар, сари, иіссулар, дәмдеуіштер, құрма және тіпті алтын. Кешкі уақытта базар ерекше жанданып, жарқыраған шамдар, хош иісті әтірлер мен шығыс әуендері нағыз араб түнінің ғажайып атмосферасын сыйлайды.
Souq Waqif-те кешкі ас ішуге болатын жерлер:
Parisa — иран тағамдарын пісіретін мейрамхана, әсерлі интерьерімен ерекшеленеді. Мұнда міндетті түрде қой етінен (lamb chops) және шафран қосылған балмұздақтан дәм татып көріңіз.
Орташа чек: 15 000-20 000 теңге.The Village — үнді тағамдарынан, әсіресе сары майда пісірілген тауық еті (butter chicken) мен май жағылған наннан (butter naan) ауыз тиюге болатын жер. Бұл тағамдармен бірге жалбыз қосылған айран алдыруға кеңес беремін.
Орташа чек: 10 000–15 000 теңге.
Доһа — шағын, бірақ қонақжай қала. Бар болғаны бір күн ішінде оның мәдениетімен жақынырақ танысып, есте қаларлық керемет суреттер түсіруге болады. Алдын ала Uber қосымшасын жүктеп алып, әсіресе мамыр мен қыркүйек айлары аралығындағы ыстық ауа райына дайын болыңыз.
