Баку: бір көргеннен ғашық болып, кеткің келмейтін қала
Әзербайжан астанасының қызықтары.
Мен Бакуге жолға жиналғанда, аса ештеңені күтпеген едім. Бірақ ішкі түйсігім мені сол жаққа тартып тұрды және бұл сезім мені алдамапты — Бакуден кеткім келмеді: сол қалада өзімді еркін, жайлы сезіндім. Тіпті үйден де жақсы дерсің. Мүмкін, сапарым тым әсерлі болған шығар, бірақ саяхаттың мәні де — дәл осындай күй кешу емес пе?
Бұл — менің Бакуге ғашық болғаным жайлы, оның жанданып жатқан өмірін танып-білгенім, көше-көшесін аралап, Каспий теңізінен балық аулауға бірнеше ұсыныс алғаным жайлы оқиға.
Тіл: үлкендер негізінен орысша сөйлейді, ал жастар — ағылшынша.
Ауа райы: Бакуді бекерге «желдер қаласы» деп атамаған, бірақ соған қарамастан, ауа райы жанға жағымды.
Байланыс: біз Yesim қолданбасы арқылы e-SIM сатып алдық. Шексіз интернетке 24 мың теңге жұмсағанымызға өкінбедік. Қонақүйде Wi-Fi нашар істеді, ал қалада өз интернетімізбен жүру әлдеқайда ыңғайлы болды. Түртіп алыңыздар! Карталар: үйреншікті 2GIS-ті қолдандық, бірақ жергілікті тұрғындар арасында бұл қолданба онша танымал емес екен.
Ұшу және логистика
Құрбым екеуміз 2024 жылдың қазан айында Бакуге тоғыз күнге бардық. Ұшақпен AZAL әуе компаниясы арқылы жеттік, ал қала орталығына жақын жерден қонақүй жалдадық. Сегіз түнге екі адамға шамамен 170 мың теңге жұмсадық.
Қала ішінде негізінен жаяу жүрдік. Күн сайын 10–20 мың қадам жасап, серуеннің рахатын көрдік. Такси арзан, бірақ кептеліс кезінде қоғамдық көлікпен жүрген тиімдірек: автобустарға арнайы жолақ бөлінген, ал метро төрт бағытта жүреді. Барлығы тез әрі ыңғайлы!
Қоғамдық көлікпен жүру үшін арнайы жол жүру картасын сатып алу қажет. Ол метро мен автобуста бірдей қолданылады. Бір реттік жол ақысы — 0,5 манат (шамамен 150 теңге), ал картаны кез келген метро станциясында толтырып алуға болады. Айта кететіне, автобусқа алдыңғы есіктен кіріп, басқа есіктен шығасың.
Біз карта туралы білмей, бірінші автобусымызға мініп бара жатып, жол ақысын қолма-қол не банк картасымен төлейміз деп ойладық. Алайда жүргізуші тек әзербайжанша сөйлеп, бір-бірімізді түсіне алмай қалдық. Сонда ол бізге қолын бір сілтеп, өткізіп жіберді. Бір жағынан күлкілі жағдай, бірақ басқа жолаушылардың бізге біртүрлі қарады.
Жүріп-тұру және қызықтар
Мен әр күнге арналған жоспар құрып, барғым келетін жерлерді алдын ала жазып қойдым. Бұл жағынан маған ChatGPT көмектесті. Жалпы, маршрут қарапайым болды. Бірінші күні түнде ұшып келгеннен кейін жақсылап демалып алып, жағалауға және маңайдағы аудандарға серуенге шықтық. Екінші күні біз Таудағы саябақ пен Ескі қалаға бардық — «Бриллиантовая рука» фильміндегі гипс туралы түсірілім өткен әйгілі көшені көргіміз келді. Қалған күндері музейлерді және басқа да мәдени орындарды араладық: Ширваншахтар сарайы, Субұрқақтар алаңы, жергілікті стэндапқа бардық, шарап дегустациясына қатыстық.
Маған Ескі қала керемет әсер қалдырды. Ол күндіз де, түнде де ерекше әдемі. Әсіресе, қала шамдары жанғанда тіптен ғажап күйге енеді. Жақын маңда түрлі талғамға сай мейрамханалар жетерлік: сыр зауыты, бистро — тұтас бір гастро-аллея дерсің. Кешке міндетті түрде Таудағы саябаққа көтеріліп, жалындап тұрған Flame Towers-ке көз салыңыз. Бұл саябақ біздің Көктөбенің әзербайжандық баламасы сияқты, бірақ жарқылына сөз жоқ! Маған Гейдар Әлиев орталығы қатты ұнады, ал Әзербайжан ұлттық кілем музейіне бармай-ақ қоюға да болар еді.
Бакуде жол табу оңай — негізгі деген көрікті жерлердің арасы алыс емес, бәрі бір-біріне жақын орналасқан.
Түнгі өмір
Бакудің мен күтпеген тұсы — мұнда тек көне көшелер мен музейлер емес, сонымен қатар белсенді түнгі өмірдің де бар екені. Біз бірнеше тамаша би барын тауып алдық, онда коктейль ішіп, таңға дейін билеп, уақытымызды көңілді өткіздік, қауіпсіздік жағынан да бәрі жақсы болды. Мысалы, Pasifico, Fomo Baku, Barfly Social Club.
Ер адамдар жиі «Кіммен келдіңдер?» деп сұрайтын, құрбым екеуміздің жалғыз жүргенімізді естігенде олар қатты таңғалатын. Бәлкім, олардың мәдениетінде қыздардың бөтен елге жалғыз саяхаттауы үйреншікті дүние емес шығар. Бірақ мен өзімді қауіпсіз сезіндім — қалада камера көп. Бір күні бізді Каспий теңізінен балық аулауға да шақырды, бірақ қауіпсіздікті ойлап, бұл ұсыныстан бас тарттық.
Өкінішке қарай, біз қаланың шетіндегі жерлерге бара алмадық. Жоспарлаған экскурсияларымызға топ жиналмады — біз туристік маусымнан тыс уақытта келген едік. Ал өз бетімізше барсақ, қымбатқа шығатын еді, сондықтан барлық уақытымызды Бакудің өзінде өткіздік.
Егер тағы бір рет барсам, міндетті түрде ұзағырақ қалып, Гобустанға немесе Масазыр көліне барып қайтар едім. Сонымен қатар Бешбармаг тауын және Хызыдағы Марс ландшафттарын көру де керемет болары сөзсіз.
Гастрономиялық тәжірибе
Мен көбіне өзіме үйреншікті италиялық тағамдар мен фастфуд жесем де, жергілікті астан дәм татпай кету күнә болар еді. Сондықтан кутаб пен садждағы тауық етін байқап көрдік — өте дәмді екен! Тамақ майлы екенін ескеріңіз және ас қорытуға арналған үйреншікті дәрі-дәрмектеріңізді ала барыңыз — кейін іздеп әуре болмайсыз. Кешкі асқа екі адамға шамамен 15–20 мың теңге жұмсадық. Маған Ferize мейрамханасы қатты ұнады — біз сол жерде жергілікті тағамдарды татып көрдік. Сондай-ақ Qaynana мейрамханасында дәмді пахлава жедік, Nargiz мейрамханасы да ұнады. Бұның барлығы Ескі қалада, бір-біріне жақын орналасқан. Мұнда кешке келетін болсаңыз, алдын ала үстел брондаған дұрыс немесе таңертең не түскі мезгілде барған ыңғайлы — әйтпесе адам көп болады.
Қорытынды
Әзербайжан — бұл жайлы, тағамы дәмді әрі түрлі қызыққа толы ел. Мұнда кей жерлерде еуропалық стильдегі архитектура бар, сізді жылы жүзді адамдар мен серуендеуге арналған керемет орындар күтеді. Ал Бакуға алғаш келген күннен-ақ өз үйімдей болып кетті. Көп нәрсе Түркияны еске салады: тілі, тәттілері, көшедегі сансыз мысықтары. Мүмкіндік болған жағдайда қалада ұзаққа қалар едім.
