Алматыда бөртегүлдер құлпырып өсіп тұратын жерлер
Бұл жерлерде бөртегүлдер жайқалған сайын адамдар жадырап қоя береді.
Көктемде Алматы гүлденіп шыға келеді: өріктің қызғылт гүлдері, форзицияның сары сабақтары, алма ағашының аппақ гүл шоғырлары, қызыл-сары қызғалдақтар, енді міне жұпар иісі аңқып тұратын бөртегүл жайнап өсетін сәт туды. Әдетте гүлдеу маусымы сәуірдің ортасынан мамырға дейін жалғасып, бір-екі аптаға созылады (тауға жақын болған сайын гүлдері кешірек ашылады). Осы кезде бүкіл қаланы жаздың жақындағанын сездіретін ғажап иіс алып кетеді. Алматыда бөртегүл барлық жерде өседі, әсіресе ескі ықшам аудандарда және қаланың орталық көшелерінде көп. Дегенмен бөртегүл ерекше әдемі болатын жерлер де бар. Осы мақалада солар жайлы айтып береміз.
Ғылым академиясы
Қайда: Шевченко, 28
Мұнда, тарихшы Әлкей Марғұланның ескерткішінің дәл жанында, бір кесе кофе алып (мысалы, көрші орналасқан Vanilla-дан), оңаша қалып, жайланып демалуға болады. Орындыққа жайғасып, айналаны жайлаған бөртегүлдің хош иісін сезініп, көктемнің жылы шуағына бойыңызды жылытып, өткен қыстың салқынын еске алмауға тырысыңыз. Осы жерден Көк базарға дейін серуендеп жүруге болады, тіпті ары қарай асып кетсеңіз де артық емес. Тек SPF кремін жағуды ұмытпаңыз: көктемгі күн шуағы Алматыда кейде жаздағыдай ыссы болуы мүмкін.
Ботаникалық бақ
Қайда: Тимирязев, 36д
Тимирязев көшесінің бойындағы бас кіреберістен кіріңіз де, бөртегүл өсіп тұрған бақтан ләззат алыңыз. Гүл ашқан бұталардың (иә, бұл ағаш емес) көрінісіне көз тойған соң, серуенді Ботаникалық бақтың ішінде жалғастырыңыз. Мұнда алтын балықтар жүзетін тоған, емен аллеялары, гүлдеп жатқан магнолия мен нәркес гүлдері құлпырып тұрады! Ботаникалық бақ — бәріне жайлы орын, сізге де ұнайтыны сөзсіз.
Бақ күн сайын 9:00-ден 20:00-ге дейін жұмыс істейді (касса 15:00-ден 15:30-ға дейін жабық), әр айдың бірінші дүйсенбісі — санитарлық күн. Кіру ақысы: ересектерге — 900 теңге, 7 жасқа дейінгі балаларға — тегін.
АТУ маңындағы парк
Қайда: Төле би мен Масанчи қиылысы
Жай ғана университет маңында жүріп, өзімізді студенттей сезіне аламыз ба? Сірә, олай емес шығар. Бірақ саябақта отырып, дәл осы сәттен ләззат алып, курстық жұмыстарды қорғау мен емтихандардың баяғыда-ақ артта қалғанына қуануға болады (егер бұның бәрі әлі алда болса — күш көп болсын дейміз). Бұл — достармен кездесуге немесе ағаштардың көлеңкесінде кітап оқуға таптырмас орын. Кейінірек Никольский базарына барып, әжелерден тал бұтақтарын сатып ала аласыз.
Оқушылар сарайы
Қайда: Достық, 124
Ғани Мұратбаевтың ескерткішінің ар жағында бөртегүл бұталары жайқалып тұр — көлеңкесінде отырып, түрлі ойға шомып, тынығуға болады. Кейін серуенге аттанып, терренкурды бойлай жүріп келе жатып, алдағы жазғы саяхат туралы армандағанға не жетсін!
Южный саябағы
Қайда: Жароков пен Ходжанов қиылысы
Алматыда саябақ көп, бірақ Южный саябағы көбіне көзден таса қалады. Бірақ бекер! Мұндағы бөртегүлдер көздің жауын алады — қазір бармағанда, тағы қашан барасыз? Саябақта иттерге арналған алаң бар, ал кешкісін көршілер жүгіруге шығып, балалар ойнап жүреді. Күндіз тыныш жер іздеп, оңаша қалғыңыз келсе, осында келгеніңіз жөн.
Мақаладағы суреттер: Азамат Жайлаубаев.
