Мен Алматыдан Астанаға көшіп кеттім, ал қала көңілімнен шықты — себебін айтып берейін
Менің оқиғам «бір көргеннен ғашық болу» туралы емес, қаламен қарым-қатынасқа ересек адамның көзқарасымен қарау жайлы.
Есімім Томас, мен магистратураға түсіп, үзіліс болып тұрса да шамамен тоғыз жылдай тұрған Алматыдан 2022 жылдың тамызында Астанаға көшіп кеттім. Бұған дейін жарты жыл Гургаонда (Үндістан) және үш жыл Куала-Лампурде (Малайзия) тұрдым.
Шынымды айтсам, өз еркіммен Астанаға көшіп, осында тұрақтап қаламын деп ойламаппын. Бәрі Астананы климаты қатал, адамдары қырсық жаны жоқ қала дейді ғой. Бірақ үш жылдан кейін бұл қалада да жайлы әрі ыңғайлы екеніне көзім жетті, сондықтан қаланы жақсы көруіме түрткі болған бес себеп туралы айтып берейін.
Астанада «алтын шаршы» жоқ
Бір қарағанда барлық маңызды мемлекеттік және коммерциялық ұйым мен демалыс орны Ақорда ғимаратынан Хан Шатырға дейінгі аумақта орналасқан сияқты көрінуі мүмкін. Алайда Астанадағы әр ауданның өз ерекшелігі мен артықшылығы бар. Орталықсыздандыру туралы айтып жүрген алматылық урбанистер армандайтын нәрсенің жақсы мысалын осы қаладан кездестіруге бболады. Мысалы, мен EXPO аумағында тұрамын және мұнда керектінің бәрі бар. Баяғыша сауда жасағанды жақсы көретіндерг «Сауранды» қызықтаса, қалғандарына супермаркет, сауда орталықтары, медициналық орталықтары, Қан орталығы (жиі қан тапсыратын донор болсаңыз), көптеген спорт кешені, үлкен «Ботаникалық бағы», театр, кофеханалар мен барлардың есігі әрдайым ашық.
Өлкетану және архитектураға қызығатын болсаңыз, «Fading TSE» жобасының парақшасына кіріп шығуға кеңес беремін, мүмкін тіпті олардың экскурсиясына барып қаларсыз. Жоба оң жақ жағалаудағы бүгінге дейін жеткен кеңестік архитектура, тұрғындардың өмірі, Астананың ерекше аудандары және 90-шы жылдардағы қала тарихынан сыр шертеді.
Мұнда спортпен шұғылданған ыңғайлы (әсіресе жүгіру)
Бала кезімді Ақтауда өткізіп, әкем екеуміз жүзуге баратынбыз, ал Малайзияда мен жаттығу залына барып жүрдім, Алматыға оралған соң бассейнге жазылдым. Астанаға көшкен кезде жүгіріп жүрген жандарды жиі көретінмін, бірақ басында оларға мән бермегем. Осы жылдың басында магистратураны бір жағына шығарып, қолым босай бастағанда алматылық жүгіруші достарым ұсынған мектепке барып, жүгіру бойынша алғашқы сабағыма барайын деп шештім. Содан кейін тоқтай алмадым.
Енді мен үйіме жақын жердегі Qazaqstan жеңіл атлетика спорт кешінінде Runscool клубымен бірге жүгіремін. Жабық спорт кешендеріндегі жаттығулар қымбат тұратын шығар деп ойлайтын едім, бірақ мұнда манежіне қарай бір рет бару мың-екі мың теңгеге шығады. Іссапар бойынша Алматыға келген сайын өз спорт кешенімді сағынамын: оңтүстік астанада жабық кешендер саны әлдеқайда аз.
Жалғыз жүгіруге де болады, бірақ топпен жүгіремін десеңіз, жолыңыз болды: Астанада жүгіру клубы көп. Уақыт жағынан, тренер немесе орналасқан жеріне қарай ыңғайлысын таңдап алыңыз: Run Republic, Lite Legs, Astana Runners, Astana Triniti, Athletic Family, Integrity. Астананың спортшылары бір-бірін әрдайым қолдап, көмектесіп жүреді. Қалада тұрақтап қалғанымның себептерінің бірі де осы.
Алатау СК
Алатау СК
Жүгіруде аса жақсы көрмесеңіз, Beеline Arena-да үлкен тенниспен, Сарыарқада велоспортпен, «Барыс-Арена» мұз сарайында хоккеймен, «Астана Арена» стадионында футболмен, Орталық паркте шаңғымен, олимпиадалық деңгейдегі бассейндерге барып сырғанап, жүзумен де айналысуға болады.
Астанада жұмыс істеу әлдеқайда оңай
Алматыда жүргенде көрме, фестиваль, шағын концерттерге барғанды немесе Қабанбай батыр көшесінің бойындағы кофеханалардың бірінде кофе ішіп, рақаттанып отырғанды жақсы көремін. Астанада да мұның бәрі бар, бірақ ондай көп емес, уақыт өте келе мұның да пайдалы тұсы бар екенін көрдім. Асықпай жұмысыңды жасап, басымдық беретін дүниелерді алдыңғы қатарда қоясың. Магистратураның кезінде осының пайдасы тиді.
Мықты кәсіби алаң
Менің кәсіби қызметін әлеуметтік проблемаларды зерттеуге және Қазақстан аймақтарын дамытуға байланысты, сондықтын Астанада әлеуметтік бастамаларды қолдайтын мүдделес жандарды жиі кездестіремін. Олардың арқасында қаламен жақын танысып, тереңде жатқан проблемаларды біліп, тіпті оларды шешуге атсалып көруге де болады. Мысалы, Астанада Erkindik Qanaty Қоғамдық Қоры, SOS Taldykol, Global Shapers Astanа және іс-түссіз жоғалып кеткен адамдарды іздеуге көмектесетін «Волонтеры Астаны LIDER.KZ» секілді жобалар бастау алған. Мен үшін Astana Finance Days, Digital Bridge, TedX Astana және Nobel Fest сияқты іс-шаралар қызық.
Мұнда ешбір жерде жоқ кафе мен мейрамханалар бар
Демалып, достарыммен бірге жайлы кеш өткізгім келген кезде сүйікті кофехана, барлар мен мейрамханаларға барамын. Өзімшіл деп ойлайтын шығарсыз, бірақ олар Қазақстанның басқа қалаларында болғанын қаламас едім.
Таңертең «Точка» немесе Take Eat Easy кафесіне барып, олардың авторлық көмешінен дәм татуға болады. Ал түскі асты веган мәзірі бар Көкtem кафесінен ішіңіз. Кешкі асқа «Гол+Пас» спорт-барына барып, авторлық бургерлеріне тапсырыс беріңіз. Сыра мен жақсы атмосфера үшін Fullers Pub-қа барыңыз. Дәмді вино іздесеңіз, Provino Wine Bar&Store немесе Two hands-ты кеңес берер едім. Ал егер коктейльдерді жақсы көрсеңіз, Atomic Bar, Shoreditch, Temple Bar және «Малена Бар»-ға барып көріңіз. Ас басу үшін сол «Малена» немесе Fifty Fifty Lucky Bar-да билеп алуға болады.
Жұмыс істеу үшін Master Coffee желісіне немесе Peak Buro және Культура Диктует деген кофеханаларға баруға болады.
Тұрғын үй мен таксидің бағасы арзан
Естіп жүрген шығарсыз, бірақ Астанада шынымен пәтер жалдау мен такси Алматыға қарағанда арзан. Мысалы, менің ауданымда екі бөлмелі пәтерді бір айға 200-280 мың теңгеге, бір бөлмелісін 180-250 мың теңгеге жалдауға болады. Әр ауданның өз артықшылығы бар — жұмыс, балабақша және мектептің жанынан жақсы үй таба аласыз. Сондықтан ақша жинағасы келетін жас мамандар үшін Астана жақсы нұсқа болуы мүмкін. Сонымен қатар, бұл қалаға адамдар жаңа нәрсемен айналысу үшін келетінін байқадым. Менің де, достарымның да тәжірибесі сондай.
Қысқы Астана, 2024 жыл
Қысқы Астана, 2024 жыл
Дәл кептелістің уақытында тапсырыс бермейтін болсаңыз, бағасы қалтаға жақсы. Ал егер қоғамдық көлікпен жүргіңіз келсе, кез келген жаққа қарай 110 теңгеге емін-еркін жетіп аласыз.
Қорытынды
Астана — бірден бар сырын аша қоятын қала емес, бірақ оның мұқты тұсы да осы. Мен үшін ол — өсуге жол ашатын, жаңа достар табатын және шабыт сыйлайтын қала. Бір көргеннен ғашық болдым ба? Жоқ. Жаныма жақын дүние тапқан кезде Астанамен қарым-қатынасымыз да нығая түсті. Өз орнымызды тапқымыз келетін әр қаланың жайы осындай шығар, иә?
