Минерал су, панто-ем, балшық терапиясы: Қазақстанның жер-жеріндегі шипажайлар

«Алтын бұлақ» шипажайы Сарыағаш минералды суын ішу арқылы емделу жолын ұсынады. Білікті дәрігерлер ішек жолдарын, тірек-қимыл аппаратын, қан айналымын, репродуктив жүйесін және тағы басқа да ауруларды емдеуге, алдын алуға арналған бағдарламалар құрастырған. Шипажай қабырғасында терапияның түр-түрін табасыз: көбі минералды су негізінде. Емдеу-оңалту орталығының бір жағында көл, бір жағында орман орналасқан. Табиғат аясында серуендеп, жазда жасыл желекті жағалап тынығасыз. Шипажай қонақтары бұл жерді қызмет көрсету сапасы мен бөлмелерінің тазалығы үшін ерекше жақсы көреді. 

Оңтүстіктің шипалы мекені — Сарыағашқа барып, минералды суларына қаныққысы келген жанға COMFORT шипажайы физиотерапия, массаж, гидротерапия секілді 25 түрлі процедурасын ұсынады. Жүрек-қан тамыр, ас қорыту жүйесі, гинекология ауруларын оңалту, ағзаны тазарту мақсатында мұнда келетін жан көп. Шипажайдың ашылғанына көп болмаса да, тұрақты клиенттері аз емес. Барған адамдар 4 мезгілдік ас мәзірін ерекше мақтайды: күнде жаңа тағаммен қуантатын аспазшылардың шеберлігіне тәнті. Шипажай түрлі деңгейде таза әрі жаңа бөлмелерін ұсынады. Әрқайсысында жеке жуыну бөлмесі мен дәретхана бар. 

Іле Алатауының бөктерінде, теңіз деңгейінен 1 100 метр биіктікте тұрған шипажай Алматыда кеңінен танылған. Әсіресe шипажайдың жеке минерал су көзі барын атап өтпеске болмас. Жер астыннан 2 350 метр тереңдіктен алатын шипалы су асқазанға, ас қорыту жүйесіне, ауыз қуысына, қан айналымына, теріге аса пайдалы. Келген қонақтар мұрын жаратын таза ауасы мен жан рахатын сыйлайтын табиғатына тәнті боп кетеді. Қызмет көрсету сапасының жоғары бағалатыны да қуантады.

Жазда айналасын жасыл желек жапқан, қыста аппақ қар басқан NURBERGEN шипажайы Оралдан 45 шақырым жерде орналасқан. Шипажайдағы табиғат аясы ой мен көзді тынықтырса, емі жан мен тәнге саулық сыйлайды. 6 профиль бойынша 30 түрлі емдік процедураны ұсынатын бұл демалыс орнының жөндеуден өткеніне көп болған жоқ. Ғимараты да, қай-қай бөлмесі де заманауи. Асханасының өзі мейрамханадан асып кетпесе, кем түспейді. Барған жанның қайта орала беретіні сондықтан шығар. NURBERGEN шипажайы гидромассаж, балқарағай бөшкесінене бөлек тамырішілік лазермен қан тазалау, дуоденалды зондтау арқылы іште тұрып қалған өтті шығару, ерлерге арналған Мавит физиоемі сияқты ерекеше қызметтерін ұсынады. Минерал су мен сан түрлі массаж да шипажай бағдарламасында қамтылған. 

Теңіз деңгейінен 1 100 метр биіктікте Тянь-Шань тауларының қыртысында тұрған бұл шипажай жыл бойы жұмыс істейді. Емінен бөлек табиғат көріністері үшін-ақ «Біркөлікке» тартып кетуге болады. Әрі Шымкентке тиіп тұр: 50 шақырым жерде ғана. Барған адамдар артрит, грыжа, протрузия сияқты ауруларға ем алғанын, кинезиотерапия, биоптрон, тұз шахтасының пайдасы тигенін айтып жатады. Үш мезгілдік мәзірі бар «Біркөліктен» табиғи саумал мен қымызды да табасыз. Ас қорыту жүйесін емдеймін деген жандарға пайдалы жер. Асқар тау бөктерінің балғын ауасы тыныс алу мүшелеріне, жүрек-қан тамыр жүйесі мен нерв жүйесіне аса пайдалы. Шипажай аумағында бас корпустағы стандарт не люкс бөлмелерден басқа коттедждер де бар. Жазда барамын деп жоспарласаңыз, орындарды үш-төрт ай бұрын брондап қойған абзал.

Балқаш көлінің жағасында орналасқан, Приозерск қаласынан 4 шақырым жердегі бұл шипажайда емделіп, медициналық сауықтырудан өтіп, спортпен айналысып, көл жағасында демалуға болады. Алты қабаттық корпусында 130 астам бөлме бар. Терезесінен аспанмен шектескен Балқаштың көгілдір суына қарап отырып көз тынықтырасыз. Жағаға жақын жеке үйшіктерін де жалдауға болады екен. Шипажай ішінде балқарағай бөшкелерінде, флоатинг капсуласы мен гидромассаж ваннасында ем алуға болады. Одан бөлек парафин мен Есентукидің балшығынның шипасын көруге мүмкіндік бар. Спортзал, кинотеатр, бассейн, жаттығу залы бар: ем алумен қатар шипажайда демалуға барлық мүмкіндік жасалған. Балаларға арналған бағдарламалар да қарастырылған. 

Ерлі-зайыпты Николай мен Надежда Жалыбиндердің ашқан шипажай дәрі-дәрмек, инъекциясыз онкүндік ем бағдарламасын ұсынады. Барлық адамға бағдарлама бір: күнде Залман ванналарына түсіп, моншаға кіріп серігесіз. Жарты сағат сайын емдік шөп тұнбасын ішіп, асқазан-ішек жолдарын емдейсіз. Бұл шипажайдың ерекшелігі — Райх камерасы. Күніне екі рет ағаштан жасалған әрі жатын бөлмеде орналасқан Райх камерасына кіріп, биоэнергоаккумулятор арқылы тазарасыз. Шипажай иесінің пікірінше, қазіргі таңда адам радио, теледидар, гаджет толқындары сияқты сыртқы электромагнит хаосының ортасында өмір сүреді. Ал табиғи ағаштан жасалған Райх камерасы адамды бұл хаостан оқшаулап, өзінің биоэлектрикалық импульстарын сезінуіне мүмкіндік береді. Одан адамның ұйқысы жақсарып, өмір сүруге құштарлығы артып, миы тынығып, позитив көзқарасы дамиды екен (жергілікті дәрігерлердің айтуы бойынша). 

Одан бөлек, шипажайдың үшмезгілдік мәзіріннен сүт пен ет таппайтыныңызды ескерте кеткен жөн. Вегетариан тамақтану жүйесі мен соңғы күні ашығу — бағдарламаның бір бөлігі. Барған адамдар шипажайдың люкс бөлмесін алған жөн екенін айтады: себебі онда дәретхана мен жуынатын бөлме жеке. Жарты сағат сайын шөп тұнбасын ішіп, тазару бағдарламасынан өткенде жеке дәретхана мен жуынатын бөлме болғаны ыңғайлы екен. 

Алтай тауларының бөктерінде, теңіз деңгейінен 450 метр биіктікте орналасқан. Өскеменнен 17 шақырым жерде. Жанында замартастай (изумруд) жасыл көлі бар бұл сауықтыру орталығы 12 бағыт бойынша түрлі ем береді. Оның ішіндегі ең ерекшесі — панто-ем. Панто-ем емдік қасиеті зор марал мүйізінен жасалған биоқоспасы бар ванналардан тұрады. Оған түскен адам буын ауруларынан айығып, ішкі ағза жараларынан тазарады-мыс. Иммунитет жүйесі күшейіп, терінің жасаруына да панто-ем оң әсер етеді. Сондықтан бұл «Изумрудный»-ға келушілердің таңдаулы процедурасы боп саналады. Айта кетелік, бұл шипажайдың қасында «Алтай Альпалары» тау-шаңғы кешені бар. Сондықтан еммен бірге белсенді демалысты жоспарлауға да болады. 

Ерекше емдік қасиеті бар Мойылды көлімен аттас «Мойылды» шипажайының тарихы 1912 жылдан бастау алады. Көл суы мен балшығының көп ауруға дауа болатынын түсінген орыс саудагері 50 адамдық ем орталығын ашада екен. Содан бері «Мойылды» шипажайы дертіне шипа іздеген, демалуды көздеген жандарды сауықтырумен айналысып келеді. Тыныс алу жолдарын, буын ауруларын, гинекологиялық диагноздарды емдейтін рапа тұзын және тері, тірек-қимыл жүйесі, неврологиялық, эндокриндік ауруларға шипа болатын Мойылды балшыған осы шипажайдан табасыз. Келушілердің басым бөлігі бұл жердің емін мақтаса да, қызмет көрсету сапасына көңілі толмайтын көрінеді.

60 жылдық тарихы бар «Оқжетпес» емдеу-сауықтыру кешені — бүгінде ең танымал демалыс орталықтарының бірі. Жарты ғасырдан астам уақыттан бері жұмысын жалғастырып келе жатқанына қарамастан кешен үнемі жөндеуден өтіп, жаңарып отырды. Бүгін ол — минерал сумен, балшықпен, тұзбен, шөппен емдейтін, көптеген ауруға дауа болатын, жан мен тәннің демалатын орны. Оның аумағында лор, терапевт, кардиолог, стоматолог, уролог, косметолог, диетолог сияқты көптеген білікті мамандарға қаралып, массаж, ингаляторий, ішек тазалау, тұзбен демалу, фито-ем алу сияқты қызметтері жетіп артылады. «Оқжетпес» қонақтары шипажайдың таза әрі жаңа бөлмелерін, дәмді тамағы мен балаларды қалдыратын ойын бөлмесі бар екенін ерекше атап өтті. Оның үстіне, шипажай қарағайлы орманда орналасқан. Таңертең таза ауада жаттығу жасап, өкпені оттегімен қанықтыруға таптырмас жер. Жалпы, өкпе ауруына шалдыққан адамға Бурабайдың ауасының өзі ем екені сөзсіз.

Ақтөбе облысындағы «тұзды көл» балшығымен ем жүргізу — бұл шипажайдың негізгі бағыты. Себебі «Шипагердің» емдік балшығының сүйек-бұлшық ет жүйесіне, тыныс алу мүшелері ауруларына, омыртқа ауруларына, гинекологиялық ауруларға шипа болатыны дәлелденген. 24 жылдан бері жұмыс істеп келген шипажайдың 5-10 жыл қатарынан емін алып жүрген қонақтары аз емес. Шипажай аумағында жаттығу залы, футбол корты, парк бар.