Қазақстаннан қай жаққа қыста баруға болады: ең жылы елдер
Біз осы топтаманы жасап бердік, сізге билет сатып алып, киімдеріңізді жинау ғана қалды.
Сыртта температура қаншалық төмендеген сайын жазғы мезгілді аңсауың соншалық артады. Қазақстанның қысы керемет, бірақ үскірік аяз бен күндізгі уақыттың қысқаруы жылы елге барып қыстау туралы ойландыра бастайды. Егер қар-мұздан шаршап, күннің көзі мен D дәрумені жайлы армандап жүрсеңіз, сізге үздік бағыттаманы дайындап қойдық.
Біріккен Араб Әмірліктері (БАӘ)
Температура: +22–28 °C
Виза: 30 күнге дейін керек емес
Қазақстандықтар үшін Әмірлік — ең қолайлы бағыттардың бірі. Виза керек емес, Алматыдан, Астанадан және Шымкенттен тікелей рейстер сізге тез және жайлы түрде жетуге көмектеседі (әсіресе ұзақ ұшуға үйренбеген кішкентай балаларыңыз болса). Мұнда қыста қатты ыстық емес, бірақ суға түсуге, жағажайда жатып күнге қыздырынуға және кешке серуендеуге жеткілікті.
Дубайда ойын-сауық көп: Бурдж-Халифаға көтеріліңіз, Дубай-Моллға барыңыз немесе шөл даланы джиппен аралап қайтыңыз. Ал Абу-Дабиде Саадият аралының жағажайлары, заманауи сәулет өнерінің жауһарлары және әлемдік өнер топтамасы бар Лувр бар, онда сіз Да Винчи, Пикассо, Гоген және Магриттің туындыларын көресіз. Өнер сүйер қауым мен коллекция жинайтындар үшін бұл сапар нағыз жаңалық болмақ. Айтпақшы, Әмірлікте өнер нарығы белсенді дамып келеді, жас және қазірдің өзінде танымал таланттар үшін түрлі мүмкіндік жасалған, сонымен қатар заманауи өнермен танысу үшін көптеген алаң бар.
Вьетнам
Температура: +28–30 °C
Виза: 30 күнге дейін керек емес
Вьетнам — жағажайлар, әдемі табиғат мекені және тарихы бай ел. Мұнда құмды жағажайларда демалуға, жаңа піскен теңіз өнімдерін жеуге және тыныштықтан ләззат алуға болады.
Тарихқа құмар жандар ескі орамдардың тар көшелері мен ежелгі пагодалар жайлы кафелермен қатар орналасқан Ханой қаласына баруы керек. Өзіңізді «Аватар» фильмінің кейіпкері ретінде сезінгіңіз келе ме? Онда Халонг шығанағына барыңыз. Шығанақ пейзаждары сурет альбомы беттерінен түсіп қалғандай!
Вьетнамдағы гастрономия — бөлек әңгімен. Сиыр сорпасы мен аскөк бар қосылған фо бо — кез келген саяхатшы үшін must-try. Ет және көкөніс қосылған жергілікті салмасы бар вьетнамдық-француздық бань ми багеті — жүрек жалғап алуға болатын таптырмас тағам. Кофе де маңызды: қоюландырылған сүт қосылған болсын, кокос кофесі болсын немесе әйгілі лювак болсын. Иә, сүйкімді кішкентай жануарлардың асқазанынан өтетін түрі. Біртүрлі естіледі, бірақ әлемдегі ең қымбат кофе деп танылған кофеден кім бас тартады? Кеңес: жасалу процесіне емес, дәміне қарай баға беріңіз.
Египет
Температура: +22–26 °C.
Виза: әуежайда жаса аласыз
Египет — жағажайларды, күннің көзін және нақты тарихи экскурсияларды біріктірудің тамаша жолы. Қызыл теңіз — сноркелинг пен дайвингқа арналған таптырмас нұсқа. Ал жағажайлардан шаршасаңыз, шытырман оқиға іздеп келіңіз: Гиза пирамидалары, Сфинкс, Луксор храмдары мен Патшалар алқабы таң қалдырады. Каирде сіз 100 000-нан астам ескерткіштерді, соның ішінде Тутанхамон мазарындағы қазыналарды қамтитын үлкен жаңа мұражайға бара аласыз.
Мысыр бәріне ыңғайлы ел: балалармен саяхаттағандар да, жалғыз жүргендер де. Бұл демалыстан ләззат алып, өзіңізді әйгілі археолог ретінде елестетуге болатын ел.
Мальдив аралдары
Температура: +30–31 °C.
Виза: 30 күнге дейін керек емес
Бұл — жұптар, отбасылар және қызып жатқан күнделікті өмірден алыстап, өзін демалысқа арналған ашықхаттың кейіпкері сияқты сезінгісі келетін кез келген адам үшін тамаша орын. Мұнда жай ғана жағажайда рақаттанып жатуға болады (біз мұны құптаймыз) немесе су асты зерттеп, сноркелинг және дайвингпен айналысуға болады. Бұған сөз жоқ: рифтер, маржандар, кемпірқосақтың барлық түсіне боялған балықтар және теңіз тасбақалары.
Ерекше қуаныш сыйлатын дүние — су ортасындағы бунгало. Сіз оянып, террассаға шығасыз, ал астыңызда нағыз мұхит бар. Шу жоқ, көршілер жоқ. Тек сіз, табиғат және су дыбыстары. Демалыс бағасы орташадан жоғары, бірақ бұл жердің демалыс маңдай термен тапқан әрбір теңгеге тұрарлық.
Тайланд
Температура: +30–35 °C
Виза: 60 күнге дейін керек емес
Тайланд — шулы кештер және сонымен бірге жеке уақыттың болуы. Жалғыз қалғыңыз келсе, Самуи немесе Пхукет аралдарына барыңыз. Сауық кештері ұнай ма? Краби немесе Патонг жағажайларына жол тартыңыз. Әйгілі Бангла-Роуд туралы да ұмытпаңыз — неонға боялған көшенің барлары мен клубтары бар атмосферасын сөзбен сипаттау қиын. Барлығына дайын болыңыз, бірақ шектеулеріңізді біліңіз.
Тайланд өз тағамдарымен танымал. Том ям, пад тай және басқа да көше тағамдары кем дегенде бір рет жеуге тұрарлық. Биыл том ям ЮНЕСКО-ның материалдық емес мәдени мұралар тізіміне енді, сондықтан оны пайда болған елінде жеп көру міндетті. Ал мұндағы көше тағамдары дәмді ғана емес, сонымен қатар Мишлен жұлдызына да ие.
Үндістан (Гоа)
Температура: +30–32 °C
Виза: алдын ала осы сайтта жасату керек
Адамдар Гоаға күн, теңіз және тыныштықта демалу үшін келеді. Желтоқсанға қарай жаңбырлы маусым бітеді, ал теңіздің жылы екені сонша, одан шыққыңыз келмейтін шығар.
Оңтүстік Гоа тыныштықты, жалғыздықты және күннің батқанын тамашалағанды жақсы көретіндер үшін таптырмайтын жер. Мұндағы жағажайлар тұнық, ауылдар ерекше және атмосферасы жайлы, аптаның қай күні екенін ұмытып кетесіз. Солтүстік Гоа, керісінше, тағат тауып отыра алмайтындарға жақсы арналған: мұнда сіз таңға дейін сауық кештерін аралап, шулы базарларға да бара аласыз.
Аюрведа — мүлдем басқа мәселе. Мұнда сіз йогамен айналысып, түрлі майлар қолданылатын массаж курсын алып, детокс бағдарламаларын қолданып көріңіз: денеңіз міндетті түрде бір рахаттанып қалады. Керемет пальмаларды тамашалап жататыныңызды да ұмытпаңыз.
Шри-Ланка
Температура: +27–30 °C
Виза: әуежайда немесе алдын ала осы сайтта жасай аласыз
Күніңізді Унаватунаның алтын жағажайларында Үнді мұхитынан соғатын самал желін сезініп бастап, әйгілі шай плантацияларында серуендеумен аяқтаңыз.
Мұнда серфинг те тамаша: толқындар жаңадан бастағандарға да, үйренген адамдарға да жарайды. Тарихқа құмар жандар үшін португалдық және голландиялық отарлау туралы естеліктері тұнып тұрған храмдар мен бекіністер бар. Ал егер гастрономиялық кереметті қаласаңыз, жергілікті тағамдар көңіліңізден шығады. Карри, жаңа піскен теңіз өнімдері, тропикалық жемістер — барлығы дәмдеуіштермен бірге ұсынылады.
