Достарыңмен бірге демалысқа барып, ұрысып қалмай қалай қайтуға болады?
Сапары чаттағы талқылауда қалып кетпегендерге арналған кеңестер.
Менің есімім Акма, және мен достарыммен саяхаттаудың қыр-сырын жақсы білемін. Бұған дейін құрбыларыммен жағажайда демалдым, командаммен Еуропаға жарысқа бардым, құрбым екеуіміз көлікпен Италия мен Германияны араладық, сондай-ақ үлкен компаниямен Португалияға Тейлор Свифттің концертіне ұштым (бұл менің достарыммен болған оқиғаларымның тек жартысы ғана).
Біз ұрысып, қайта татуласып, саяхаттан ләззат алдық. Сіздерге көмектесетін кеңестеріммен және түртіп алғандарыммен бөлісейін.
Не күтетіңдеріңізді сәйкестендіріп, саяхат қарқынын таңдаңыздар
Алдымен ең басты сұрақты шешіп алайық: сіздер қандай демалыс қалайсыздар? Біреу үш күнде бір арқадорбамен Еуропаны аралап шығуға дайын, ал біреу екі шабадан сүйреп, асықпай демалғанды жөн көреді. Кейде адам өзі де не қалайтынын білмей жатады.
Сондықтан не күтетіңдеріңізді алдын ала талқылап алыңыздар. Ортақ чатқа өзіңізге ұнайтын демалыс түрін көрсететін TikTok немесе Reels видеоларын жіберіңіз: қонақүйлер, мейрамханалар, жағажайлар, барлар. Бұл сіз бен достарыңыздың қалауын жақсырақ түсінуге көмектеседі және барлығына ұнайтын ел немесе қаланы таңдауды жеңілдетеді.
Демалысқа деген көзқарастар әртүрлі болуы мүмкін, сондықтан екі негізгі ұстанымды есте сақтаңыз: тепе-теңдік пен компромисс. Егер сіз жағажайда жатып демалғанды ұнатпасаңыз, бірнеше күн шыдаңыз, кейін белсенді демалысқа да кезек келеді. Біреу шаршаса – қонақүйде демалсын, ал басқалар серуендей берсін. Топтан бөлінуден қорықпаңыз: қызығушылықтарыңызға қарай шағын топтарға бөліну – қалыпты нәрсе. Бірақ егер жоспарлау кезінде ортақ шешімге келе алмасаңыз, сапарды кейінге қалдырған немесе басқа серіктестермен барған дұрыс.
Тағы бір маңызды фактор – қызығушылық пен бастаманың болмауы. Егер сіз ортақ чатқа идеялар, күндер, билеттер жіберіп жатсаңыз, ал жауап ретінде үнсіздік пен немқұрайлық алсаңыз, онда бұл сапарды кіммен өткізгіңіз келетінін қайта ойлануға себеп. Бұл туралы алаңдаудың қажеті жоқ – достығыңыз бұзылмайды, өйткені әркімнің өз басымдықтары, жоспарлары және өмір салты бар.
Оңтайлы бюджетті есептеңіздер
Бюджетті есептеу – кез келген сапардағы ең маңызды және күрделі тақырып. Кейбіреулер бес жұлдызды қонақүйлерде тоқтағысы келеді, ал басқалары хостелде тұрғанды жөн көреді. Осындай айырмашылықтар кесірінен сапарға шығардан бұрын-ақ ұрыс-керіс туындауы мүмкін.
Сондықтан ортақ бюджет шегін белгілеңіз. Әркім өзіне не маңызды екенін айтып, қай жерде үнемдеуге дайын екенін ашық көрсетсін. Бұл болжауларды сәйкестендіріп, шығындарды дұрыс жоспарлауға көмектеседі.
Мысалы, бір сапарымызда біз құрбыммен орташа бюджетті есептеп, қай жерде үнемдеуге дайын екенімізді талқыладық. Нәтижесінде, Aviasales.kz арқылы арзан билеттер таптық (бірақ ұзақ ауысып міну керек болды), есесіне кең әрі жайлы көлік жалдадық.
Кім кіммен тұратынын алдын ала анықтаңыздар
Демалыстағы жайлылықтың 80%-ы – көршіңізге байланысты. Егер сіз үлкен топпен саяхаттасаңыз, өзіңізге қарапайым сұрақтар қойыңыз:
– Тазалықты жақсы көресіз бе, әлде шығармашылық бейберекетсіздікке үйренгенсіз бе?
– Таңертең ерте тұрасыз ба, әлде түнде белсендісіз бе?
– Қорылдайсыз ба? Ұйқыңыз құс ұйқы ма?
Өзіңізді жақсы түсінсеңіз, ыңғайлы көрші таңдауға көмектеседі. Тұрмыстық сұрақтарды ашық қоюдан қорықпаңыз! Мінсіз серік табу қиын, сондықтан компромисс пен тепе-теңдік маңызды. Мысалы, мен демалыс кезінде бөлмені үнемі жинауды ұнатпаймын, бірақ ерте тұруға немесе біреудің қорылына шыдауға дайынмын. Кейін өкініп жүрмес үшін мұндай нәрселерді алдын ала білген жөн.
Сапар барысында міндеттерді бөлісіңіз
Әр адамның сапарда белгілі бір рөлі болуы керек. Біреу маршрутты жоспарлайды, екіншісі тамаққа жауап береді, үшіншісі интернет іздейді дегендей. Бірақ шындыққа тура қарайық: сапардың екінші-үшінші күнінде бәрі өз міндеттерін ұмытып, ұйымдастыру ең жауапты адамға жүктеледі. Ал ол адам сапардың ортасына қарай шаршап, салдарынан ұрыс-керіс басталады.
Мұндай жағдайды болдырмас үшін міндеттерді бөліп қана қоймай, өздігіңізден бастама көтеруді де ұмытпаңыз (тіпті бұл сіздің әдетіңізге жат болса да). Досыңызға әдемі фото түсіруге көмектесіңіз, бірге дүкенге баруды ұсыныңыз. Егер әркім ұйымдастыру жұмыстарына атсалысып, бір-біріне көмектессе, демалысыңыз жоспар бойынша әрі еш қиындықсыз өтеді.
Менің ең ұнатпайтын жағдайым – бәрі қай жерде тамақтанатынын шеше алмай, ұзақ талқылап кетуі. Мұндай сәттерде «кезекші» әдісін қолдануға кеңес беремін. Бүгін бір адам мейрамхананы таңдап, орын брондайды, ертең – басқа біреу. Әрине, пікір алмасуға болады, бірақ соңғы шешімді «кезекші» қабылдайды.
Дауларды мәдениетті түрде және тез шешіңіздер
Шындыққа тура қарайық: реніш пен келіспеушіліктерсіз саяхат болмайды. Демалыс кезінде сіз бен достарыңыз тәулік бойы бірге жүресіз, бір-біріңізге нағыз ерлі-зайыптылардай үйренісесіз. Бірақ әркімнің мінезі, қарым-қатынас әдісі және күнделікті әдеті әртүрлі. Кейде бәрі шаршайды, ыстықтан қажиды, дұрыс тамақтанбайды – осылайша ұсақ-түйек нәрсеге бола ұрыс туындауы мүмкін.
Егер жанжал орын алса, оны мүмкіндігінше тез әрі мәдениетті түрде шешу маңызды. Мәселені ұзаққа созбай, бірден ашық сөйлесіп, бір-біріңізді мұқият тыңдап, татуласу қажет. Сіз қаншама уақыттан бері жоспарлаған сапарыңызды реніш пен жаман көңіл-күймен өткізуіңіз екіталай. Сондықтан бірден драма жасамай, ортақ чаттан шығып кетпей, мәселені орны-орнымен шешкен дұрыс.
Жадыңызда ең маңыздысын сақтаңыз: сіз бұрыннан барғыңыз келген елдесіз, және ол жаққа достарыңызбен бірге келдіңіз. Болашақта осы сапардың суреттеріне қарап, бұл күндерді жылы естелік ретінде еске алатын боласыз. Демек, осындай тамаша уақытты ұрыс-керіске жұмсаудың еш қажеті жоқ. Әсіресе, бұл сапарға қаншама ақша жұмсалғанын ескерсек!
Бір-біріңізге демалуға мүмкіндік беріңіздер
Қаншалықты экстраверт болсаңыз да, әлеуметтік батареяңыз отыруы мүмкін. Сондықтан сапарыңыздың ортасында өзіңізге аздап жалғыз қалуға уақыт бөлуге кеңес беремін. Егер мүмкіндік болса, бір күнге топтан бөлініп, өзіңізге ұнайтын нәрселермен айналысып, тек сізді қызықтыратын жерлерге барыңыз.
Осындай жағдай үшін таптырмас шешім – шопинг және кәдесыйлар сатып алу. Сауда орталығына барып, шағын топтарға бөлініп, саудаға ден қойыңыз. Осылайша, өзіңізге уақыт бөле аласыз, бірақ басқа ешкімді жіберіп алғандай сезім болмайды, өйткені бәрі де сіз сияқты өз шаруасымен айналысады.
Сапардан кейін бір-біріңізге алғыс айтып, қателіктермен жұмыс істеңіздер
Құттықтаймыз! Сіздің сапарларыңыз жай ғана ортақ чаттағы жоспар болып қалмай, шынайы саяхатқа және ұмытылмас естелікке айналды. Иә, бұл оңай болған жоқ, бірақ сіздер бәрін керемет еңсердіңіздер! Бір-біріңізді мақтап, үйде немесе жайлы жерде кішкентай отырыс ұйымдастырыңыздар.
Егер бұл саяхат сіздерге ұнап, келесі сапарыңызды бірге жоспарлауға дайын болсаңыздар, қателіктермен жұмыс істеуді ұмытпаңыздар. Талқылауға болатын сұрақтар: көршіңізбен бірге тұру ыңғайлы болды ма? Ақша үнемдеу туралы шешім дұрыс болды ма? Қандай жағдайлар жиі ұрыс-керіске әкелді? Оны қалай болдырмауға болар еді? Саяхаттың қарқыны сізге ұнады ма? Мұндай рефлексия келесі сапарларда қателіктерді қайталамауға көмектеседі, достықты нығайтады және жаңа саяхаттар үшін тамаша негіз болады.
