Баланы жеке саяхатқа қалай жіберуге болады?

Ерте ме, кеш пе, бала әжесіне, достарына немесе робототехника бойынша маңызды турнирге ұшқысы келетін сәт туады. Сол кезде ата-анада неше түрлі сұрақ туындайтыны сөзсіз. Мәселен, оны жалғыз жіберуге бола ма және мұндай ұшуды қалай ұйымдастыруға болады? Әрине, ол сіздің қолыңыздан келеді. Тек оның құны мен қалай жүзеге асырылатынын анықтау қажет. 

Баланың жалғыз ұшуы қай жастан бастап мүмкін

6 жастан 15 жасқа дейінгі балалар тасымалдаушыдан қосымша ілесіп жүру қызметін рәсімдеп, өз бетімен ұша алады. 16 жастан асқан және 18 жасқа толмаған жасөспірімдер ата-анасының немесе заңды қамқоршысының жазбаша келісімі болған жағдайда ересектерсіз саяхаттай алады, бірақ шектеулер бар. Олар түнгі рейстермен, яғни сағат 23:00-ден 06:00-ге дейінгі рейстермен ұша алмайды. 

Ескеру керек: көп жағдайда ата-анасыз саяхаттайтын балаларға ауысып отыратын рейстер қолжетімсіз. Сондықтан баланы саяхатқа тек тікелей рейспен жібере аласыз. Алайда, кейбір әуе компаниялары балаларға транзиттік рейстерге рұқсат береді. Мысалы, Air Astana Астана арқылы Лондонға, Франкфуртқа немесе Парижге ұшуға мүмкіндік береді.

«Сүймелдеусіз бала» қызметін қалай рәсімдеуге болады?

Егер сіз билетті онлайн сатып алған болсаңыз, ұшуға дейін кемінде 24 сағат қалғанда компания өкілдеріне хабарласуыңыз керек. Сұранысты электрондық пошта арқылы жіберіңіз немесе колл-орталыққа хабарласыңыз. Сондай-ақ билетті сатып алған әуе компаниясының кассасына немесе сату кеңсесіне жүгіну мүмкіндігі бар.

Қызметті растайтын құжатты тасымалдаушыдан алу маңызды, өйткені кейбір рейстерде бортқа қабылданатын кәмелетке толмаған балалар санына шектеулер бар.

Қазақстандық тасымалдаушылардың «Кәмелетке толмаған баланы сүймелдеу» қызметінің құны.

Ұшу күні қандай құжаттар қажет болады?

Әрине, мұнда да бюрократия бар. Бірақ қорықпаңыз, еш қиындығы жоқ: 

1. Туу туралы куәлік немесе баланың паспорты. 
2. Төрт дана сауалнама-өтініш. Бұл құжаттар процестің барлық қатысушысына қажет: шығарып салушыға, бортсеріктерге, жердегі қызметкерлерге және күтіп алушыға. Әуе компанияның сайтынан бланкті жүктеп алып, құжаттарды алдын ала толтырыңыз. Ауысып отыратын рейстер үшін оның алты данасы қажет. Сауалнама-өтінішті кейбір тасымалдаушылардың сайтынан жүктеп алуға болады, ал басқалары оны тіркеу кезінде береді.
3. Нотариалды куәландырылған рұқсат. Ата-аналар баланы діттеген әуежайда күтіп алатын адамға беру үшін нотариалды куәландырылған келісім рәсімдеуі қажет.
4. Күтіп алушының құжаты. Баланы алатын адамда да жеке куәлігі болуы керек.

Есіңізде болсын: әуежайға алдын ала, ұшуға кемінде екі сағат қалғанда келіңіз. Бұл сізге де, балаңызға да жүйкеңізді сақтап қалуға көмектеседі. Себебі өз бетімен саяхаттайтын бала рейске онлайн тіркеле алмайды.

Балалармен саяхаттау кезінде құжаттарға қойылатын қосымша талаптарды мұнда табуға болады.

Әуежайда не болады?

Сіз балаңызды қызметкерлерге тапсырғаннан кейін келесі жағдайлар болады:

1. Тіркеу. Бала рейсқа тіркеліп, ең жайлы қатардан, бортсеріктердің қасына жақын отырғызылады. Бұл аймақ ерекше назар мен қамқорлық көрсетілетін орын.
2. Баланы жердегі агенттерге тапсыру. Жас саяхатшы әуе компаниясы немесе әуежай қызметкерлерінің бақылауында болады. Олар оған тексеруден өтуге көмектеседі және құжаттарды бортсеріктерге тапсырады.
3. Ұшақтың ұшуын күту. Ата-ана немесе қамқоршы әуежайда ұшудың алдында болуы керек. Бұл рейс кешіктірілген, тоқтатылған немесе сұрақтар туындаған жағдайда маңызды. 

Кәмелетке толмаған баланың жалғыз ұшуы қалай өтеді?

Сіздің балаңыз нағыз VIP қонақ секілді ұшады. 

• Оны ұшаққа бірінші болып отырғызады. Бортсеріктер тек оның жайлылығынан бөлек,  қажет нәрсенің бәрімен қамтамасыз етеді.
• Ұшу барысында балаға рейстің басты жұлдызы ретінде ерекше назар аударылады. Әрине, ол досының қасына ауысып отыра алмайды, және терезе жанындағы орынға да жайғаса алмайды. Бірақ баланың қасында әрдайым қамқор бортсерік болады. Және қауіпсіздік ережесі бойынша 18 жастан асқан әйел-жолаушы отырғызылады.
• Егер балаңыз ыстық шайды жақсы көрсе, ол оны өкінішке қарай іше алмайды. Қауіпсіздік ережесіне сәйкес жанында ересек жолсерігі жоқ балаға ыстық сусындар ұсынылмайды.

Жеткен кезде не болады?

Қонғаннан кейін де бала қатты назарға алынады:

• Оны әуежай қызметкері күтіп алады, жүкті (егер болса) алуға көмектеседі, қажет болса, паспорттық бақылаудан өткізеді.
• Саяхатшыны күтіп алушы ересек адамға тек құжаттар мұқият тексерілгеннен кейін ғана тапсырады. Тағы да, күтіп алушыға жеке куәлігін өзімен бірге алып келу қажеттігін ескерту керек.

Егер күтіп алушы кешігіп келсе не келмей қалса, бала жалғыз қалмайды. Әуежай қызметкерлері сізге қоңырау шалып, әрі қарай не істеу керектігін шешеді. Ең соңында, бала уақытша полиция қорғауына беріліп, кейін сізге хабар айтылады. 

Кәмелетке толмаған баланың жалғыз саяхатын ұйымдастыру әбден мүмкін, орындалатын тапсырма. Ең бастысы — құжаттарды жинап, ережелерге назар аударып, мамандарға сену. Ал сіздің балаңыз бұл ұшуды нағыз шытырман оқиға ретінде есінде сақтап қалады!