Еуропада жайлы әрі артық шығынсыз демалуға арналған 12 қызмет
Жеңілдікпен мейрамхана табуға, тегін қонып шығуға және тиімді бағамен билет табуға көмектесетін қосымшаларды жинадық.
Еуропа — әдемі әрі қызықты, бірақ бұл шытырман оқиғалар бас сақинасына айналмауы үшін тұрмыстық мәселелерді тез шеше білу қажет. Билеттер, тұрғын үй, маршруттар — мұның бәрін ыңғайлы қосымшалар арқылы шешуге болады. Олар тек уақытты үнемдеп қана қоймай, саяхатты жеңіл әрі арзан етеді.
Адасып кетпей, дұрыс жоспарлау үшін
Omio
Пойыздар мен автобустарға билет табуға және брондауға көмектесетін ыңғайлы платформа. Қосымша әртүрлі көлік компанияларының бағасы мен маршруттарын салыстыруға мүмкіндік береді, осылайша ең тиімді нұсқаны таңдай аласыз.
Кеңес: маршрутты жоспарлау үшін қосымшаны пайдаланыңыз, ал билетті сатып алу үшін көлік компанияларының ресми сайттарына өтіңіз (Omio-ның қосымша қызмет ақыларын төлемеу үшін).
FlixBus
Бұл бүкіл Еуропаға арзан (және тікелей) маршруттарымен танымал неміс автобус компаниясы. FlixBus қосымшасы арқылы автобустың қозғалысын нақты уақытта бақылауға, келу уақытын және соңғы аялдамаға дейінгі барлық тоқтау нүктелерін білуге болады. Компания кешігу туралы хабарламаларды электрондық пошта, SMS және қосымша арқылы жібереді. FlixBus 29 елде жұмыс істейді, ал жақында олар FlixTrain жобасын іске қосты. Одан пойыз билеттерін небәрі 10 еуроға ұсынады.
BlaBlaCar
Бұл қосымша Еуропа бойынша қысқа және ұзақ сапарларға бір көлікті жалдап, ортақ сапарлатуға мүмкіндік беретін қосымша. Біздегі inDrive-қа ұқсас.
Кейде бұл жерден автобус не пойыз билетінен арзан сапар табуға болады. Ал көлікте көбінесе басқа жолаушылар да болатынын ескерсек, бұл жол бойы әңгімелесіп, жаңа адамдармен араласуға тамаша мүмкіндік.
Кеңес: Егер BlaBlaCar-дан өзіңізге лайық маршрут таппасаңыз, хабарландыруларды қосыңыз. Сол кезде қажет бағыт пайда болғанда бірден біліп отырасыз.
CityMapper
Қалалық көлікпен жүру маршруттарын жоспарлауға арналған қосымша. Ол қозғалыстың барлық мүмкін түрін, яғни жаяу және велосипед маршруттарынан бастап автобустар мен пойыздарға дейін көрсетеді. Әр түрлі бағыттар мен жолға кететін уақытты салыстыруға болады.
Кеңес: Егер сізде интернет болмаса, Wi-Fi арқылы алдын ала маршрутты қарап, оны кейін пайдалану үшін сақтап қоюға болады.
Қосымшаны IOS пен Android жүйелеріне орнатуға болады.
9292
Нидерланд бойынша саяхаттауға арналған ыңғайлы қосымша. Ол автобустардың, метроның немесе пойыздардың нақты келу уақытын көрсетеді. Сондай-ақ кешігу болған жағдайда кестені автоматты түрде жаңартады. Жөнелту және бару нүктелерін енгізсеңіз, қосымша қай платформада және қай жерде күту керектігін, жолдың қанша уақыт алатынын және қай жерде түсіп қалу керек екенін көрсетеді.
Шығындарды есептеу үшін
Wise
Халықаралық аударымдар мен көпвалюталы төлемдерге арналған ыңғайлы қызмет. Бұл қосымша еуро, фунт, крона және швейцарлық франк сияқты Еуропаның негізгі валюталарын қолдайды. Ал аударымдар жасырын комиссиясыз және әділ айырбастау бағамымен жүзеге асырылады.
Қосымша тұрғын үйге, көлік жалдауға немесе жергілікті валютада сауда-саттық жасауға, досыңызбен бөлісу немесе банк шотына байланбай онлайн төлем жасау қажет болған жағдайда өте пайдалы. Әсіресе Еуропаның түрлі еліне сапар шегіп жүрген және әр жолы айырбастау пунктін іздеп, банк комиссияларынан ақша жоғалтқысы келмейтіндер үшін өте қолайлы.
XE Currency
Бұл қосымша кезекке тұрмай-ақ және артық сұрақтарсыз ақша айырбастауға көмектеседі. Қызмет валюта бағамдарын нақты уақытта көрсетіп, сомаларды жылдам түрлендіруге мүмкіндік береді. Қосымшаны сіз қолмен есептегіңіз келмесе немесе бағамдарды шатастырып ала берсеңіз - қолдану өте қолайлы.
XE Currency қосымшасы интернетсіз де жұмыс істейді. Бағамдарды алдын ала сақтап, офлайн режимде пайдалану мүмкіндігі бар.
Қосымшаны IOS және Android жүйелеріне орнатуға болады.
Дәмді тамақтанып, артық ақша жұмсамау үшін
Too Good To Go
Қосымша тамақ пен сіздің бюджеттіңізді сақтап қалады. Қызметте мейрамханалар, дәмханалар мен супермаркеттер сата алмаған тағамдарды жариялайды. Алайда олар балғын, сондай-ақ дәмді күйінде сақталады. Ал сіз оларды төмендетілген бағамен сатып ала аласыз. Азық-түлік бағалары қалыпты жағдайдан 2–3 есе арзан болады.
Сондай-ақ қосымшада «тосын сый қапқа» тапсырыс беру мүмкіндігі бар. Оның бағасы 2-10 еуро аралығында болады. Яғни оның құны өнімдерді бөлек сатып алудан 3 есе арзан. Қапты мекеменің жабылуына 30–60 минут қалғанда алу керек, және оны алдын ала тапсырыс берген жөн. Себебі олардың саны шектеулі.
TheFork
Мейрамханаларда үстелдерді брондауға арналған ыңғайлы қосымша. Ол тағамдар түріне, орналасқан жеріне және баға диапазонына қарай мекемені таңдауға мүмкіндік береді. Маңыздысы: TheFork кейбір мейрамханаларда тағамдарға 50%-ға дейін жеңілдіктер ұсынады, ал бұл үнемдеуге көмектеседі. Қосымшада сонымен қатар броньды оңай өзгертуге немесе алып тастауға болады. Сондай-ақ қайда баратыңызды ұмытып кетпеу үшін ескертпе жібереді.
Бюджет таусылуға шақ қалғанда, үй табу үшін
Flatsharing
Бұл қосымшада іссапардағы не саяхатқа кеткен адамдар өз пәтерлері мен бөлмелерін Airbnb-ден әлдеқайда арзан бағаға жалға береді. Бұл саяхатшыларға тұрғын үйді қолайлы және ыңғайлы орындарда, сондай-ақ төмен ақыға жалдауға мүмкіндік береді. Жүйе өзара көмек принципіне негізделген: пәтер иелері өз үйлерін уақытша жалға беру мүмкіндігіне ие болса, саяхатшылар қолжетімді тұрғын үй нұсқаларын таба алады.
Қауымдастық жабық. Мұнда кез келген адамды ала бермейді, сондықтан өзіңіз туралы ақпаратты толтыруыңыз қажет.
Couchsurfing
Мұнда жергілікті тұрғындар бөлмені, диванды немесе тіпті матрасты теп-тегін береді! Егер сіздің бюджетіңіз шектеулі болса, тұрғын үйге жұмсалатын ақшаны үнемдеудің тамаша мүмкіндігі. Есіңізде болсын: Couchsurfing — бұл жай ғана түнейтін орын емес, сонымен қатар үй иелерімен тәжірибе алмасу. Егер сізде жергіліктілермен сөйлесуге уақытыңыз болмаса не қаламасаңыз, хостел, қонақүй немесе пәтер жалдағаныңыз дұрыс.
Hostelworld
Хостел табуға арналған қосымша. Ол бағаларды салыстыруға, орталыққа дейінгі қашықтықты білуге, тазалық деңгейі мен басқа да ерекшеліктерді бағалауға көмектеседі. Сондай-ақ соңғы пікірлерді жылдам оқуға болады. Егер брондауды қосымша арқылы жасасаңыз, келуге 7 күн қалғанда оны тегін алып тастауға мүмкіндік бар.
Суретті салған — Ольга Цай.
