Балиде қайда тұрақтап, ауа райына бейімделу мен Bali belly-ден сақтану жайлы
Егер сіз Балида демалуды армандасаңыз, бірақ неден бастау керектігін білмесеңіз - бұл мақала сіз үшін жазылған.
Бали туралы әңгіме қозғалғанда, адамдар әдетте екі топқа бөлінеді. Біріншілері оны пір тұтады, екіншілері қорқынышпен еске алады. Менің алғашқы тәжірибем осы екеуінің ортасында болды. 2017 жылы қыста біз топтық турмен барған едік, бірақ жаңбырлы маусымға тап болдық. Мен қатты уланып қалдым, құрбым байктан құлап түсті, ал тағы бір адам аяғын сындырып алды (тағы да байкқа рақмет!). Осының бәрі демалыстың алғашқы күнінде болды! Бірақ досымызды қайтар ұшаққа шығарып салғаннан кейін және мен ауа райына бейімделіп, өз-өзіме келген соң, Бали маған керемет жер болып көрінді.
Екінші рет биыл наурызда бардым. Мен бұрынғы қателіктерімді ескергеннен, 10 күндік демалысым тамаша өтті. Ұшып келгеннен кейін ағзама бейімделуге уақыт бердім, маршрутты өз қалауымша жоспарладым және аралды аз уақытта толықтай аралап шығуды мақсат етпедім. Балида демалуға наурыз бен қыркүйекке дейінгі мезгіл ең қолайлы уақыт. Осы аралықта жаңбыр азайып, ауа температурасы жайлы +27 градус шамасында болады.
Ауа райына бейімделу мен байктер туралы
Бали оңтүстік жарты шарда орналасқан, соны ескеру керек. Егер сіз бүкіл өміріңізді солтүстік жарты шарда өткізсеңіз, ағзаңызға бейімделу үшін уақыт қажет: климаттың ауысуы, ұзақ жол, жаңа тағамдар - бұларды елемеуге болмайды.
Балида негізгі көлік түрі — байк. Бірақ егер сіз оны жүргізе алмасаңыз, онда Бали оны үйренуге арналған жер емес. Мұндағы жол қозғалысы өте қарқынды. Оның орнына Grab немесе Gojek сияқты такси қосымшаларын жүктеп алыңыз. Бұл арзанырақ әрі қауіпсіз.
Bali belly туралы
Егер сіз бір рет болсын Гуглға «Бали» деп еңгізген болсаңыз, онда сіз міндетті түрде Bali belly туралы қорқынышты әңгімелерге тап болған шығарсыз. Бұл организмнің микрофлораның өзгеруіне немесе қарапайым тамақтан улануға деген реакциясы болуы мүмкін. Жоғарыда жазғанымдай, мен бірінші сапарымда Bali belly-мен ауырдым. Өз қалпыма келуіме демалысымның үш күні кетті. Менің ойымша, бұл крандағы судын таза еместігінен болды. Сондықтан да туристердің ағзалары солай реакция береді. Сондықтан екінші сапарымда мен төмендегі қарапайым ережелерді ұстандым:
- тек бөтелкедегі суды іштім (тіс тазалау үшін де соны қолдандым);
- көше дәмханаларында мұз қосылған сусындарды сатып алмадым (мұз кран суынан дайындалуы мүмкін);
- қолымды жудым, барлық жерде антисептик алып жүрдім (онымен қасық-шанышқыны да тазаладым).
Балиде қайда тұрақтаған дұрыс
Бірінші кезекте сапар мақсатын анықтаңыз: тек жағажайда демалғыңыз келе ме, әлде Форрест Гамп стиліндегі шапшаң саяхаттарды қалайсыз ба немесе саналы жалғыздық өмірін армандайсыз ба? Бали - өте үлкен арал, және оның әрбір ауданында өзіндік ерекшелік бар. Алғашқы сапарымда мен Балидің барлық туристік орынды аралап шықтым. Маған тек Кута ауданы ұнаған жоқ (ол жерде қауіпсіз емес, қалта ұрылары көп және жалпы біртүрлі аудан). Екінші рет келгенімде, маған ең қатты ұнаған орындарға тоқтадым. Енді, Балидағы қандай аудандар туристерге лайықты екенін және кімге не жарайтынын бірге қарастырайық.
Улувату - әсемдік пен тыныштықты қалайтындар үшін
Улуватудағы қонақ үйінде
Егер сіз теңіз жағасында тыныш күндер өткізіп, ғибадатханаларға тамсанып, бірақ өркениеттен алыс кеткіңіз келмесе - Улувату сіз үшін тамаша таңдау. Бұл жерде бірнеше шақырымға созылған жағажайлар мен жайлы бич-клабтар бар: Single Fin, Ulu Cliffhouse, Sundays Beach Club. Дәл осы жерде танымал Pura Luhur Uluwatu ғибадатханасы орналасқан. Одан мұхитқа керемет көрініс ашылады, толқындарды бағындырып жатқан сёрферлерді тамашалауға болады.
Бұл жолы ұзақ ұшудан кейін біз Улуватуда бірнеше түнге тоқтауды шештік. Акклиматизация кезінде ештеңеге уайымдамау үшін «бәрі қосылған» жүйесімен бес жұлдызды қонақүй таңдадық. Мұнда Kempinski, Ritz-Carlton және Hilton сынды әйгілі қонақүйлер бар. Екі адамға арналған бірнеше түндік сәнді демалыс бізге таңғы аспен бірге шамамен 200 000 теңгеге түсті.
Чангу пен Семиньяк - көңіл көтергіңіз келсе
Демалысыңызды көңілді би кештеріне толтырғыңыз келе ме? Онда сізге Чангу мен Семиньяк аудандарына назар аударуға кеңес беремін. Мұнда да жағажайлар бар, бірақ бұл аудандар көбіне көңілді кештері мен жанды мейрамханаларымен танымал. Семиньяк - классикалық түнгі дискотекаларды жақсы көретіндерге арналған орын. Чангу да сондай, бірақ хипстерлерге арналған нұсқа, әрі мұнда күндіз де, түнде де қызықты. Мен бұл екі ауданда да қысқа уақытқа тоқтадым. Чангу маған көбірек ұнады.
Чангуда үнемі жәрмеңкелер, поп-ап дүкендер өткізіледі, фрилансерлерге арналған ыңғайлы коворкингтер, пилатес студиялары және ғажайып матча ұсынатын жайлы дәмханалар бар. Мысалы, The Saha House пен Copenhagen сынды орындарды ерекше атап өтуге болады.
Егер де сіз бәрінен аз-маз қаласаңыз, яғни жағажай да болсын, көңілді кештер де, аутентті шопинг пен инстаграмға лайық дәмханалар, сонымен қатар жайлы жағдайда жұмыс істеп, спортпен де айналысқыңыз келсе - онда сізге Чангу лайық.
2017 жылы біз үлкен компаниямен келіп, бассейні жоқ вилла жалдаған едік. Ал қазір букинг-сайттар арқылы жалдауға болатын бассейнді, сауналы және басқа да ыңғайлы мүмкіндіктері бар хостелдер, бутик-қонақүйлер мен виллалар саны едәуір артты.
Убуд — йога, саунд-хилинга пен дзен үшін
Убуд – менің ең сүйікті аудандарымның бірі, рухани Балидің жүрегі, оны әзілмен «йогамен ауырып қалғандар аумағы» деп те атайды. Бұл жердің ерекше болғаны соншалық, тіпті өзінің жеке микроклиматы бар: ауа ылғалды әрі жиі жаңбыр жауады.
Убудтағы ғибадатханада
Йога-отралықта
Сарқымада
Терең ұйқы, балғын жемістер және күнделікті йога - көңіл күй мен денсаулыққа керемет әсер етеді. Мен күн сайын Yoga Barn атты йога орталығында жаңа тәжірибелерден ләззат алдым, виньяса мен инь-йогадан бастап, жергілікті шебердің «ән салатын» тостағандарымен саунд-хилингке дейінгі түрлі практикаларға бардым. Ал ең ерекше сәт — Кетут ұлының алақаныма қарап жасаған болжауы. Кетут, Джулия Робертс ойнаған «Же. Тілей біл. Сүй» фильміндегі кейіпкерге көмектескен емші. Тек бұл болжауларға тым байсалды қарамай, жай ғана рахат алыңыз.
Убудта тұрақтау үшін қонақүйлерден бастап виллаларға дейін бар. Егер ұзақ уақытқа қалуды жоспарласаңыз, күнделікті тазалау мен таңғы асы бар шағын вилла жалдауға болады. Баға әртүрлі, біздің шағын вилламыз тәулігіне екі адамға 25 000–30 000 теңге шамасында тұрды.
Ломбок — тыныштықты қалап, сёрфингпен айналысқыңыз келсе
Ломбоктағы пляж
Күннің батуы
Ал егер сіз сёрфингті үйреніп, Индонезияның ертегіге ұқсайтын жағажайларын көргіңіз келсе, қайыққа мініп, бірнеше күнді Ломбок аралыңда өткізіңіз. Бұл жерде адам аз, таза әрі сёрфингті енді үйреніп жатқандарға арналған ең жұмсақ толқындар мен керемет нұсқаушылар бар. Әрине, Ломбок Бали сияқты дамымаған, бірақ керемет күн батулары, жағажай және жергілікті тағамдар бұл айырмашылықты сездірмейді.
Сондай-ақ арал жаңа таныстықтар үшін тамаша орын, әсіресе егер жалғыз саяхаттап жүрсеңіз. Біз мұнда Pipes Hostel-де тоқтадық, онда күн сайын кешке от жағылып, гитарамен ән айтылып, түрлі құрлықтардан келген адамдармен әңгімелесетінбіз. Өзімізді ересектерге арналған лагерьде жүргендей сезіндік.
Ломбокта
Жанартау
Бәрін бірдей қаласаңыз…
Кем дегенде сапарды 2–3 аптаға жоспарлаңыз. Менің мінсіз маршрутым: Чангуда бейімделіп, көңілді уақыт өткізу, Убудта толықтай баяулап және Ломбокта сёрфингпен айналысу. Егер күшіңіз қалса, Ява аралындағы вулкандардың біріне түнгі көтерілуге тырысып көріңіз. Бұл белсенділік жол мен көтерілу уақытын қосқанда шамамен 18 сағатқа созылады, бірақ бұл шынымен де ғажап тәжірибе.
