2025 жылы қазақстандықтар қай елдерге визасыз бара алады?

Визасыз режимнің екі түрі бар. Біріншісі – «нағыз» визасыз режим, яғни сіз өзге елге келгенде паспортыңызға мөр басып береді. Екіншісі – «шартты» режим. Бұл жағдайда виза ұшақтан түскен соң істеледі. Алайда, кейде визаны алу үшін ақы төлеу керек немесе қосымша құжаттар (кері қайту билеті, қонақ үй броны, медициналық сақтандыру) талап етілуі мүмкін. Нақтырақ мәліметті ҚР СІМ сайтынан тексеріп алуға болады. Мынаны ұмытпаған жөн: жолға аттанар бұрын паспортыңыз сапар аяқталғаннан кейін де кем дегенде алты айға дейін жарамды болуы керек. Ал билеттерді әрине Aviasales.kz-те іздеңіз.

15 күннен артық жүруге болатын елдер

БАӘ

Болу мерзімі: 30 күнге дейін.

Не үшін бару керек: тап-таза жағажайлар, қауіпсіз ел, алуан түрлі шопинг, Абу-Дабидегі «Лувр», ірі халықаралық іс-шаралар, мысалы, Формула-1, арт-фестивальдер және спорттық жарыстар.

Қытай

Болу мерзімі: материктік бөлігінде 30 күнге дейін және Хайнань аралында 15 күнге дейін.

Не үшін бару керек: будда ғибадатханалары, қытай медицинасы, Хайнаньда жағажай демалысы және Чжанцзяцзе ұлттық паркіндегі тас бағана-таулар. Сонымен қатар бұл пандаларды өз көзімен көруді армандаған адамдарға арналған ел.

Малайзия

Болу мерзімі: 30 күнге дейін.

Не үшін бару керек: Лангкавидегі жағажайлық демалыс, 88 қабатты Петронас мұнаралары, Ват Чайямангкаларам храмы (мұнда көлемі бойынша үшінші орында тұрған Будда мүсінің көруге болады). Қытай, Үндістан, Еуропа және Таяу Шығыс тамақтары араласып пайда болған өзіндік ерекшеліктері бар малайзиялық тағамдар.

Мальдив аралдары 

Болу мерзімі: 30 күнге дейін.

Не үшін бару керек: таза су, жағажайлардағы аппақ құм, оңашалану сезімі, су жағасындағы бунгалода тұру мүмкіндігі, дайвинг пен снорклинг, премиум демалыс және дельфиндер.

Оңтүстік Корея

Болу мерзімі: K-ETA электронды рұқсаты болған жағдайда 30 күнге дейін.

Не үшін бару керек: Сеулдегі Гангнам ауданындағы шопинг және түнгі өмір, чимчильбан моншалары, CU супермаркеттерінде рамендер мен тіскебасарлар. Және кім біледі, мүмкін серуендеп жүріп, сүйікті дорамаңыздағы крашыңызды кездестірерсіз.

Өзбекстан

Болу мерзімі: 30 күнге дейін.

Не үшін бару керек: өзбек палауы мен самсасы, Ташкенттегі Чорсу базары, тарихи Самарқанд, Шымған таулары мен Шаруақ су қоймасы (өте әдемі!).

Тунис

Болу мерзімі: 30 күнге дейін.

Не үшін бару керек: Жерорта теңізі, ақ-көк Сиди-бу-Саид қаласы (жергілікті Санторини), базарлар, қызғылт фламинголар, Сахараға экскурсиялар, ежелгі Римнің Дугга қаласының қирандылары және «Жұлдызды соғыстар» фильмі түсірілген Фум-Татахвим қаласы.

Біріккен Араб Әмірліктері мен Түркиядан жалыққандарға таптырмас ел.

90+ күндік ұзақ сапарлар

Әзербайжан 

Болу мерзімі: 90 күнге дейін.

Не үшін бару керек: кәуап, садж, анар шырыны, дәстүрлі кілемдер, Гейдар Әлиев орталығы (Заха Хадид жобалаған), Сумгайыттағы жағажай, Шахдаг және Туфандаг тау шаңғы курорттары.

Гүржістан

Болу мерзімі: 365 күнге дейін.

Не үшін бару керек: хинкали, хачапури және шарап, Тбилиси сәулеті, Батумидегі жағажай және Гудаури не Бакурианидегі беткейлер.

Қырғызстан 

Болу мерзімі: 90 күнге дейін.

Не үшін бару керек: Қаракөлдегі беткейлер, «Ертегі» шатқалы және Ала-Арча ұлттық паркі. Әрине, Ыстықкөл туралы айтпасақ та түсінікті шығар.

Тайланд

Болу мерзімі: 60 күнге дейін. 2025 жылы елде ETA (кіруге электронды рұқсат алу) жүйесі енгізіледі. Ол әзірге қазақстандықтарға қолданылмайды. Бірақ, ұшар алдын шарттарды тексеріп алуға кеңес береміз. 

Не үшін бару керек: жағажайлар, пад тай, 7/11-ден дәмді тағамдар, килограммдап алуға болатын шырынды манго, ғибадатханалар, Пхукеттегі Бангла-роуд көшесіндегі түнгі өмір, Бангкоктағы шопинг және ең бастысы «сабай-сабай» – жан тыныштығы мен қазір өмір сүріп, сәтті жіберіп алмай, нақ осы  жерде бола алу қабілеті туралы жергілікті өмір философиясы.

Түркия

Болу мерзімі: 90 күнге дейін.

Не үшін бару керек: all-inclusive, өте дәмді симиттер, пахлава, түрік кофесі, Стамбул сәулеті және Каппадокиядағы әуе шарлары.

Басқа бағыттар

Суреттерді салған — СашаШура.