Әже, дос, бауырларға арнап Дубайдан 5 000 теңгеге сатып алуға болатын сыйлықтар

Менің атым Айгерім, мен отбасыммен бірге Дубайда тұрып жатқаныма екі жыл болды. Жергілікті супермаркеттерге барып, сөредегі тарауларға қарап тұрғындардың әдет-қылықтарын зерделеген ұнайды.

Туыстарым мен достарыма Дубайдан жергілікті өнімдерді немесе Алматыда бола бермейтін заттарды апаруға тырысамын. Осы топтамада кез келген супермаркет, сауда орталығы немесе метродан сатып алуға болатын қымбат емес кәдесыйлар туралы сөз қозғамақпын. 

Құрма, шәрбат және піспенан

Әжеңіз бен сүйікті тәттіқұмарларға арналған.

Ашығын айтайық, Әмірлікке келіп, құрмаға назар аудармау оңай емес, тіпті мүмкін емес те шығар. Оның үстіне елде оның 500 түрі бар, бағасы да арзан. Бірнешеуі туралы аздап айтып берейін:

• Меджул (medjoo) сұрыпы басқаларға қарағанда айтарлықтай үлкен және жұмсағының түсі қанық, қою қоңыр түсті. Бұл құрмалардың жұмсақ қабығы және шырынды дәмі бар. Оларды «патшалық» деп те атайды, себебі ол шын мәнінде құрмалардың арасында «патша» саналады.
• Халас (khalas) — арабтардың арасында ең танымал сұрып шығар. Бұл құрмаларды сопақ пішіні, ашық сары түсі және орташа мөлшері бойынша оңай тануға болады. Сұрыптың ерекшелігі — ерекше нәзік жұмсағынан қаптап тұрған жұқа қабығы. Халас тіскебасар ретінде де, бірдеңе пісіргенде де жақсы. Мысалы, турап кекске қосуға болады.
• Лулу (lulu) сұрыпы — БАӘ-дегі ертеден келе жатқан әрі көбі жақсы көретін құрма. Халас немесе меджулге қарағанда көзге бірден түсетін ашық-сары түсі арқылы лулуды бірден айыруға болады. Мөлшері премиум-сұрыптарға қарағанда шағынырақ болса да, бұл құрмалар өте тәтті.

Бағасы: жарты келісі 10-20 дирхам (шамамен 1 400-4 200 теңге).
Сатылатын жерлер: базарлар, Bateel және Bayara секілді арнайы дүкендер, Lulu және Carrefour секілді ірі супермаркеттер.

Бір-екі мың теңгеге қуырылған бадам, пісте, пекан немесе тәтті апельсин салмасы бар шоколадты құрма сатып алуға болады. Оларды супермаркеттерден немесе жергілікті дүкендерден оңай таба аласыз. Мен Chocodates, Arabian Delights және Tamrah деген жазуы бар қаптамаларға назар аударуға кеңес беремін. Әрине, сіз Duty Free-ден құрманы сатып ала аласыз, бірақ бағасы қымбатырақ болады.

Бағасы: Carrefour-де 100 грамы 7 дирхамнан (шамамен 1 000 теңге) басталады.

Сатылатын жерлер: үйдің қасындағы дүкендер мен Lulu және Carrefour секілді ірі супермаркеттер. 

Құрма шәрбаты мен пастасы

Әмірлікте құрмадан бәрін жасайтын түсінген шығарсыз. Мысалы, құрма шәрбаты. Бұл үйеңкі шәрбатының жақсы әрі үнемді баламасы. Оны шайға немесе бәліштерге қанттың орнына салуға болады немесе вафли және панкейктермен бірге ұсына аласыз. Сонымен қатар, шай, бәліш немесе ботқаға қосуға болатын құрма пастасы туралы да ұмытпаңыз.

Бағасы: 250-300 мл бөтелке үшін 10-15 дирхам (шамамен 1 400-2 000 теңге).

Сатылатын жерлер: үйдің қасындағы дүкендер, Lulu немесе Carrefour.

Maamoul піспенаны

Құрмадан шаршасаңыз, maamoul-ға назар аударыңыз. Бұл танымал піспенан ұнтақ жармасынан пісіріледі, салмасы да болады. Әдетте оған құрма пастасын (тағы да!) қосады, бірақ басқа салма қосылған maamoul бар. Әжеңіз Jomara фирмасының әдемі қаптамасына сүйсініп, кейін піспенанмен тәтті шай ішетін болады.

Бағасы: 400 грамы үшін 12-15 дирхам (шамамен 1 700-2 000 теңге).

Сатылатын жерлер: үйдің қасындағы дүкендер, Lulu немесе Carrefour.

Дәмдеуіштер

Анаңызға және тамақ пісіргенді ұнататын жандарға. 

Дәмдеуіштер — ақшасы да, қол жүгінде бос орны да қалмағандарға арналған жақсы нұсқа: олар арзан, жеңіл және көп орын алмайды. Қазақстанға БАӘ-ге дәмдеуіш тасуға байланысты шектеулер жоқ, бірақ 25 кг-нан асырмай, 500 евродан көп ақша құртпауға тырысыңыз — баж салығынсыз осындай мөлшерге рұқсат.

Ерекше лимон дәмі бар, шарап түсті кептірілген жидектерден жасалатын сумах деген дәмдеуішті алсаңыз болады. Оны салат пен маринадқа қосады, ет немесе балық пісіргенде қолданады. Заатар — құрамында сумаз, күнжіт, майоран, тұз бен тимьян немесе орегано болатын шығыс қоспасы. Заатарды хумустың үстіне себіңіз немесе тауық маринады үшін қолданыңыз.

Бағасы: 100 грамы үшін 15-30 дирхам (шамамен 2 000-4 000 теңге). Базардан алатын болсаңыз, міндетті түрде саудаласқан жөн.

Сатылатын жерлер: Dubai Spice Souk (дәмдеуіш базары), Carrefour-дың арнайы бөлімдері. Айтпақшы, Ibn Battuta Mall-дағы арнайы дәмдеуіштер бөліміне барып, өлшеп алуға болады. 

Түйе сүтінен жасалған сабын

Тәтіңізге немесе кремдерді жақсы көретін құрбыңызға.

Қазақстанда түйе сүтінен жасалған косметика жаңалық болып саналса, Әмірлікте бұл бұрыннан қалыпты жағдайға айналған. Мысалы, The Camel Soap Factory брендінің сабыны көптеген супермаркетте бар. Кәдімгі қаптамада бір данасы шамамен 16 дирхам (шамамен 2 220 теңге) тұрады, ал Heritage Collection сыйлық орамасында екі есе қымбат болады. Менің фаворитім — бергамот пен мускус иісі бар сабын (bergamot and musk), бірақ кез келгенін са сатып алуға болады, өйткені оның бәрі бірдей хрш иісті және бағасына заты сай.

Саяхатқа құмар жандар мен экологияны алдыңғы қатарға қоятын жандар қатты осы өндіруші шығарған сусабын бен шашқа арналған кондицонерді (балаларға арналғаны да бар) таңдай алады. Сонымен қатар, крем, ерінге арналған бальзам және тіпті сабын салғыш та бар.

Бағасы: бір данасы 16 дирхамнан (шамамен 2 220 теңге) басталады.

Сатылатын жерлер: 

• Carrefour, Spinneys, Waitrose супермаркеттері; 
• Кәдесый сататын жерлер және Souk Naif, Souk Madinat базарлары;
• The Camel Soap Factory сайтында.
• amazon.ae сайтында (ең тиімді баға, кең таңдау және тез жеткізу);

Дубай шоколады

Трендтен қалғысы келмейтін достарыңызға арналған.

2024 жылдың жазынан бері Қазақстанда Дубай шоколады туралы әңгіме тоқтамай жатыр. Әмірлікке келіп, түпнұсқасынан дәм татамын десеңіз, бұл оңайға соқпайды. Fix Dessert Chocolatier-дің түпнұсқа шоколадын тек Deliveroo қосымшасында күніне екі рет — 14:00 және 17:00 — тапсырыс беруге болады. Оның өзінде барынша жылдам болу керек, өйткені шоколад тез таусылып қалады.

Нағыз шоколадты жеп көргіңіз келсе, жергілікті таныстарыңыз бен достарыңызға сізге арнап тапсырыс беруін өтініңіз. Есіңізде болсын: бір шоколадтың құны — 68,25 дирхам (шамамен 9 400 теңге), қосымшада кем дегенде 130 дирхамға (шамамен 17 800 теңге) тапсырыс беру керек. Сондықтан ақшаңызды қамдап, шоколадты тездетіп жеп қоюға дайын болыңыз, өйткені Fix Dessert Chocolatier шоколадын тек тоңазытқышта үш күннен асырмай сақтау керек.

9 000 теңгесін шоколадқа құртқысы келмейтін жандарға жақсы жаңалығымыз бар: қазір нарықта бағасы арзан баламалары бар. Мысалы, Noon жергілікті интернет-дүкенінде тапсырыс беруге болатын The Big Daddy шоколады. Оның түрлі дәмі бар, бағасы да түпнұсқасына қарағанда арзан.

Бағасы: 125 грамм шоколад үшін 23 дирхам (шамамен 3200 теңге) және 240 грамм шоколад үшін 40 дирхам (шамамен 5 500 теңге).

Сатылатын жерлер: супермаркеттер, Noon интернет-дүкені.

Парфюм

Шығыс хош иісін жақсы көретін әпкеңізге.

Егер сіз әпкеңіз немесе құрбыңыз қандай хош иісті жақсы көретінін нақты білсеңіз, ал қалтаңызда 5 000 теңгеден көп ақша болмаса, Dubai Mall-дағы Ajmal Perfumes, Amouage, M.Micallef (Galeries Lafayette), Ghawali, Ne'emah (Sephora) брендтеріне және Mall of the Emirates-тегі Khaltat пен Swiss Arabian брендтерін байқап көріңіз.

Бағасы: құйып алсаңыз, 10 мл 40 дирхам (шамамен 5 500 теңге), көлемі 50 мл және одан да көп флакон үшін 200 дирхамнан (шамамен 28 500 теңге) басталады.

Сатылатын жерлер: Dubai Mall, Mall of the Emirates және басқалары.

Салпыншақтар мен магниттер

Іні-қарындастарыңыз, әкеңіз немесе кез-келген сыйлыққа риза болатын ағаларыңызға.

Егер «дәстүрлі»‎ кәдесый алуға ниетті болсаңыз, сапалысын алыңыз. Мысалы, жақыда Дубай метросына 15 жыл болды, осының құрметіне орай станциялар мен кейбір дүкендерде метро ұсынған кәдесыйларды қоя бастады. Іні-қарындасыңызға Cool Camels топтамасының салпыншағын, шоперін, добын немесе қыстырғышын сатып алсаңыз болады. Әкеңізге немесе ағаңызға 15 years of Dubai Metro топтамасының жеңіл жейдесін, бас киімін немесе суға арналған бөтелкесін беріңіз. Сәнді және ерекше дүниелерді жақсы көретіндер үшін «Dubai» логотипі бейнеленген эспрессо кесесі мен кофеге арналған көп рет қолдануға болатын стакандар бар.

Бағасы: 15-40 дирхам арасында (шамамен 2 000-5 500 теңге). 

Сатылатын жерлер: кез келген метро станциясы, Curi-o-city дүкендері мен кәдесый сататын жерлер.