2025 жылдың басты фестивальдері немесе Charli XCX пен Lady Gaga-ны қай жерде көруге болады
Lollapalooza, Coachella, Open’er, Mad Cool – ал сен қайсысын таңдайсын?
BRAT summer-ге дайындала бастайық! Егер ең танымал өнерпаздарды көріп, жаңа елдерді зерттегіңіз келсе, музыкалық фестивальдар — тамаша шешім. Бір жерде, бір уақытта әлемдік деңгейдегі жұлдыздар жиналады, ал олардың өнер көрсету аралықтарында жаңа қаланың мәдениетімен, тағамдары және атмосферасымен танысуға болады. Бар болғаны фестивальды таңдап, билеттерді сатып алып, тұрғын үйді брондап, сапарды жоспарлау ғана қалды.
Lollapalooza
Орын: Чили, Аргентина, Бразилия
Уақыты: 21–30 наурыз
Лайн-ап: Justin Timberlake, Olivia Rodrigo, RÜFÜS DU SOL, Foster the People және т.б
Бағасы: үш күнге шамамен 130 мың теңге (250$)
Тұрақтайтын жер: қалада брондау керек
Бұл америкалық фестиваль бренді Чикагода басталып, көп уақыттан бері әлемдік деңгейге жетіп, Еуропа, Үндістан және Оңтүстік Америкаға таралды. Біз сізге тура осы Оңтүстік Америкаға аттануға кеңес береміз. Өйткені музыкадан алар жаңа әсер мен әлемнің басқа жарты шарын зерттеуді үйлестіру ғажап тәжірбие болары сөзсіз.
Чили астанасы Сантьяго барып, Антарктидаға саяхат туралы ойланған жөн. Бұл ел «ақ құрлыққа» апаратын көпір саналады. Аргентинада Буэнос-Айрес пен пингвиндерді көру үшін Оңтүстік Патагонияға барыңыз. Ал Бразилияда Сан-Паулу мен Рио-де-Жанейрода 38 метр биіктіктегі Құтқарушы Иса Мәсіх мүсінін көрмей кетуге болмайды.
Coachella
Орын: Индио, Калифорния, АҚШ
Уақыты: 11–13 және 18–20 сәуір
Лайн-ап: Lady Gaga, Green Day, Post Malone, Charli XCX және т.б.
Бағасы: үш күнге шамамен 286 000 теңге (549$)
Тұрақтайтын жер: кемпинг
Coachella — бұл жай ғана фестиваль емес, нағыз музыка, сән және гедонизм меккесі. Мұнда Beyoncé мен Coldplay сияқты әртістер өнер көрсеткен, ал көпшіліктің арасында атақты жандарды көру қалыпты жағдай. Сондықтан, барға кезекте артыңызда Тимоти Шаламе немесе Хейли Бибер тұрып қалса, таңғалмаңыз.
Шынайы музыкасүйер адам үшін бұл фестивальге өмірінде кем дегенде бір рет бару – міндетті. Егер сапарға бел бусаңыз, маршрутыңызға Лос-Анджелес, Сан-Франциско және Санта-Барбараны қосыңыз. Қалалар арасында көлікпен қозғалу ең ыңғайлысы. Осылайша саяхат барысында басқа бірнеше штатпен жақынырақ таныса аласыз.
Primavera Sound
Орын: Порту, Португалия
Даты: 12–15 июня
Лайн-ап: Charli XCX, Jamie XX, Deftones, Michael Kiwanuka және т.б
Бағасы: төрт күнге шамамен 98 000 теңге (180 €)
Тұрақтайтын жер: қалада брондау керек
Барселоналық атақты фестивальдің португалдық нұсқасы түпнұсқадан еш кем түспейді. Порту қаласындағы Primavera Sound сол атмосфера мен философияны сақтайды. Және ең бастысы – бірден толық лайн-апты жариялайды.
Бұл фестиваль музыка мен саяхаттауды біріктіруге тамаша мүмкіндік. Атлант мұхиты таяқ тастам жерде. Портудың жайлы көшелермен серуендеп, портвейн сақталатын жертөлелерге кіріп көруге болады. Лиссабонның тарихы мен заманауи ырғағын зерттеңіз. Ал ерекше сезімдерді іздесеңіз, Рока мүйісіне барыңыз. Онда жер мен мұхит тоғысады, әлемнің шетінде тұрғандай боласың. Тамаша жоспар, солай емес пе?
Open’er
Орын: Гдыня, Польша
Уақыты: 2–5 шілде
Лайн-ап: Massive Attack, Linkin Park, Justice, FKA Twigs және т.б
Бағасы: төрт күнге шамамен 135 000 теңге (250 €)
Тұрақтайтын жер: кемпингте жеке шатыр немесе аумақта орналасқан глэмпинг
Бұл фестиваль Балтық теңізінің жағасындағы жайлы, бірақ өз бетіңізбен бармауыңыз мүмкін Гдыня қаласында болады. Open’er фестивалі бұрынғы аэродромда өтеді. Ол музыка мен белсенділіктің эпицентріне айналады. Сахналар мен ойын-сауықтардың саны таңқаларлық, ал ангарда өтетін silent disco – must-see. Open’er бірнеше рет Еуропаның үздік фестивалі атанған, сондықтан әртістер тізімі мінсіз құрастырылған.
Тұрақтайтын жер бойынша кеңес: егер фестиваль аумағындағы кемпинг сізге қолайсыз болса, Гданьск деген көрші қаладан тұрғын үй таңдаңыз. Фестивальге электр пойызымен немесе тегін шаттлмен оңай жетуге болады. Ал бос уақытыңызда Гданьсктың зімбір үйшіктері бар көрікті көшелерінде серуендеп немесе Сопоттағы жағажайға барып демалуға болады.
Mad Cool
Орын: Мадрид, Испания
Уақыты: 10–12 шілде
Лайн-ап: Olivia Rodrigo, Kings of Leon, Iggy Pop, 30 Seconds to Mars және т.б
Бағасы: үш күнге шамамен 114 000 теңге (210 €)
Тұрақтайтын жер: қаладан брондаңыз
Mad Cool — Еуропаның басты фестивальдерінің бірі. Және Барселонада өтетін Primavera Sound іс-шарасына тамаша балама. Mad Cool лайн-апын көбінесе альтернативті музыка классиктеріне, нақтырақ Placebo, The Killers, Foo Fighters, Arctic Monkeys сынды әртістер құрайды. Алайда заманауи әртістерді де көруге болады.
Бұл фестиваль Испания астанасының толық сұлулығынмтануға мүмкіндік береді. Міндетті түрде Прадо музейіне барып, Босх, Гойя және Веласкес шедеврлерін көріңіз, сондай-ақ Мадридтің керемет сарайлары мен ерекше атмосферасынан ләззат алыңыз.
Жағажайда демалуды қоса жоспарлағыңыз келе ме? Валенсия немесе Барселонаға баруға болады. Ал одан да үлкен саяхатқа дайын болсаңыз, көрші Португалия немесе Мароккоға сапарға шығыңыз.
Tomorrowland
Орын: Бум, Бельгия
Уақыты: 18–20 және 25–27 шілде
Лайн-ап: TBD
Бағасы: екі күнге шамамен 160 мың теңге (304 €)
Тұрақтайтын: үйшіктер мен шатырлары бар DreamVille
Tomorrowland – бұл Хогвартстан тыс нағыз сиқыр. Үлкен сахналық құрылымдар, пиротехникалық шоулар және стадионды лық толтыратын адамдар. Осындай масштаб электронды музыканы сүйетіндер үшін аталмыш кешті көруге міндетті ететіні анық. David Guetta, Avicii, Skrillex – мұнда әлемнің үздік диджейлері өнер көрсетті.
Tomorrowland («Болашақ жері») негізгі құндылықтары: діннен, саясаттан және шекаралардан тыс болу. Лайн-ап әлі жарияланған жоқ, бірақ билеттер сатылымға 1 ақпанда шығады. Әлем бойынша бұл шоуды асыға күтіп, ғажайып өтетініне сенімділер өте көп. Сондықтан бұған да билеттер санаулы минутта сатылып кетуі әбден мүмкін.
Бум қаласы Брюссель мен Антверпеннің арасында орналасқан, бұл шағын сапарларды жоспарлауға мүмкіндік береді. Сондай-ақ геополитикалық аномалия Барле-Нассауға соқпай кетуге болмайды. Бұл мекенде Бельгия мен Нидерландтың шекарасы үйлер мен кафелер арқылы өтеді. Бір елде таңғы асты, екіншісінде кешкі асты неге ішпеске?
SZIGET
Орын: Будапешт, Венгрия
Уақыты: 6–11 тамыз
Лайн-ап: Charli XCX, Nelly Furtado, ASAP Rocky, Armin Van Buuren және т.б
Бағасы: алты күнге шамамен 170 000 теңге (309 €)
Тұрақтайтын: фестиваль аумағындағы кемпинг немесе Ресми сайт арқылы брондау кезінде арнайы шарттары бар қонақүйлер.
Бұл Еуропадағы ең ірі фестивальдердің бірі. Sziget жыл сайын Будапешттегі жеке аралда өтеді, оған ондаған мың қонақ жиналады. Таңғаларлық лайн-аптан бөлек, фестиваль бағдарламасы өте кең: көше театры, стенд-ап клубтары, жағажай, аттракциондар, экстремалды спорт аймақтары, арт-объектілер және тіпті толыққанды супермаркет бар.
Экологиялық бағдарламаға да ерекше назар аударған жөн: қайта пайдалануға болатын стақандар стильді мерчке айналады, ал эко-кемпинг бірегей концепцияны ұсынады. Өзіңіздің шатырыңызды пайдаланып, орынды тіркеп, аймағыңызды тазалап кетсеңіз келесі фестивальге 13 000 теңге (25 €) көлемінде купон ала аласыз.
Айтпақшы, фестивальге Дунай өзені арқылы су жолымен де жетуге болады. Ал Будапешттің өзінде сізді сарай көріністерімен безендірілген термалды су көздері бар аңызға айналған Сечени купальнялары күтеді. Сондай-ақ руин-пабтар, олардың ішіндегі ең танымалы — Szimpla Kert, ерекше әсер сыйлайды.
Flow
Орын: Хельсинки, Финляндия
Уақыты: 8–10 тамыз
Лайн-ап: Charli XCX, Bicep, Khruangbin, Fountains D.C. және т.б
Бағасы: үш күнге шамамен 140 000 теңге (259 €)
Тұрақтайтын жер: қаладан брондаңыз
Скандинавия елдеріндегі фестивальдер арасында Flow Festival ең танымал әрі ауқымды шаралардың бірі. Фестиваль бұрынғы электр станциясында өткізіледі, сондықтан индустриялық атмосфераны визуалды және дыбыстық инсталляциялар толықтырады.
Flow мемлекеттік институттармен тиімді серіктестіктің жақсы үлгісі. Сондай-ақ жас әртістердің өздерін танытуына мүмкіндік беретін тамаша алаң. Мысалы, әр жылдары фестивальдің көркемдік бағдарламасын Аалто университеті мен Хельсинки өнер университеті ұйымдастырған. Іс-шараның тағы бір ерекше белгісі – BALLOON 360° сахнасы. Оның дизайны планетаға ұқсас, ортасында қалқып тұрған шар және оның айналасында қонақтарға арналған трибуна да бар.
Музыкалық лайн-апқа келсек, Flow таңғалдырудан жалықпайды. Танымал және түсінікті әртістерден (Lana Del Rey, Kendrick Lamar, The xx) бөлек, фестиваль ұйымдастырушылары көрерменді әртүрлі жанрлардағы жаңа есімдермен таныстыруға тырысады. Өнер көрсетушілер арасынан авангардтық джаз, эксперименталды академиялық музыкадан бастап, заманауи хиттарға дейін кездестіруге болады. Мысалы, джазды қайта танымал еткен, сәнге қайта оралтқан Kamasi Washington мен фестивальдегі өнерінен кейін Brit Awards сыйлығын жеңіп алған Jorja Smith сияқты орындаушыларды атауға болады.
Фестивальдің үш күні – Хельсинкиді аралап көрудің тамаша себебі. Kiasma заманауи өнер музейін, Oodi кітапханасын немесе Amos Rex көркем музейін зерттеңіз. Ал жеңіл тамақтану үшін финдік супермаркеттерге барыңыз – дайын боулдар мен сэндвичтер сізді таңғалдырады.
Burning Man
Орын: Блэк-Рок шөлі, Невада, АҚШ
Уақыты: 24 тамыз – 1 қыркүйек
Бағасы: TBD
Тұрақтайтын жер: тақырыптық кампустар
Бұл біздің топтамамыздың бонус-трегі. Әрине, іс-шараны таза музыкалық фестиваль деуге келмейді. Бірақ тізімде ерекше орын алады. Бір апта бойы Блэк-Рок шөлі арман, еркіндік, өнер, эксперименттер мен өзін-өзі көрсетуге арналған утопиялық мемлекетке айналады. Иә, әртістер мен диджейлер музыкалық перформанстар ұйымдастырады, бірақ бұл әсерлердің тек кішкентай бөлігі ғана. Burning Man фестивалінің айрықша ерекшелігі – оның толықтай қатысушылардың, яғни "бёрнерлердің" күшімен ұйымдастырылуында. Фестиваль кезіндегі барлық белсенділік сыйлау және өзара алмасу қағидатына негізделген. Ештеңе ақшаға сатып алынбайды. Түскі асқа сорпа ішкіңіз келсе, кинотеатрға барғыңыз келсе немесе тікұшақпен ұшқыңыз келсе – бәрі де мүмкін.
Экстравагантты костюмдер, арт-көліктер мен жылжымалы сахналар туралы бөлек мақала жазуға болар еді. Бұл көріністердің әсерлігі соншалық, оны елестету тіпті қиын. Фестиваль алып ағаш адамның мүсінін өртелуімен аяқталады. Сонымен қатар шөл адам аяғы баспағандай бастапқы қалпына келтіріледі.
Burning Man фестиваліне қатысу қымбат әрі оңай емес, бірақ егер осы ерекше авантюраға баруға шешім қабылдасаңыз, осындай тәжірибеден кейін бұрынғы қалпыңызға түспейтініңіз анық.
