Гонкогты аралау: көрікті және қызықты жерлері
Туристерге кеңес: қызықты жерлер мен аттракциондар. Гонконгтағы қозғалыс және бағалар.
Гонконгқа мен 2024 жылғы қарашаның соңында үш күнге барғанмын. Гонконг туралы қысқаша айтсақ, бұл — Қытайдың арнайы әкімшілік аймағы, бұрын британдықтардың отары болған. Қала өте тығыз қоныстанған. Сонымен қатар, бұл қаланың негізгі ерекшелігіне айналған биік ғимараттары көздің жауын алады. Одан өзге ағылшын тілі мен қытай тілінің қатар қолданылатынымен және аспанмен ұштасқан зәулім ғимараттарымен келушілердің жадында көпке қалатыны сөзсіз.
Еуропалық вайбы бар Азияның қаржы орталығы әлбетте өзіндік түсімен, иісімен (жағымсыз да иіс бар) және бейнесімен туристердің жүрегін жаулап алады. Бірақ, айта кетейін, қала ірі қаржы орталығы болғандықтан мұнда саяхаттау қалтаңызға салмақ түсіреді. Әрине, «қымбат» сөзін әр адам әрқалай түсінуі мүмкін, сондықтан мақалада мен бағаларды да көрсетіп өтемін, кейін өздеріңіз шешім шығарасыздар.
Қазақстан азаматтарына Гонконгқа виза қажет пе
Қазақстан азаматтары үшін Гонкогқа кіру үшін виза қажет емес. Бірақ, визасыз 14 күнге дейін жүре аласыз. Әуежайдағы кедендік бақылаудан өткен кезде арнайы құжатқа Гонконгта қай уақытқа дейін бола алатындарыңыз жайлы жазылады.
Қонақ үй немесе хостел
Бюджеттік қонақүйлер шамамен түніне 10 000-15 000 теңге тұрады. Airbnb арқылы пәтер жалдаймын десеңіз, Гонконгтың орталық аудандарында пәтерлерді тәулігіне шамамен 25 000 теңгеге жалға алуға болады, ал орталықтан алыс жерлерде 20 000 теңгеге табуға мүмкіндік бар.
Тұруға қолайлы аудандар:
- Central — Гонконгтың іскерлік және қаржы орталығы. Бұл ауданда көптеген халықаралық компанияның кеңселері, сауда орталықтары және мейрамханалар орналасқан. Қоғамдық көлік жүйесі жақсы дамыған, сондықтан қаланың басқа аймақтарына оңай жете аласыз.
- Wan Chai — коммерциялық аудан. Мұнда әртүрлі қонақүйлер, мейрамханалар, дүкендер және ойын-сауық орындары бар. Сондай-ақ, білім беру және мәдени мекемелер көптеп кездеседі.
- Mong Kok — Гонконгтың ең тығыз қоныстанған әрі сауда-саттық аудандарының бірі. Бұл жерде көптеген базар орналасқан, әртүрлі тауарларды сатып алуға болады.
Қоғамдық көлік
Гонконгтағы қоғамдық көлік жүйесі жақсы дамыған: метро, автобустар, трамвайлар және паромдар жұмыс істейді. Қала ішінде Uber-ді қолдануға болады және әйгілі жергілікті қызыл таксилері де бар. Олардың бағасына қысқаша шолу жасасақ:
- Airport Express пойызы — 75 гонконг доллары (4 800 теңге).
- Метроның бір реттік билеті — 5 гонконг долларынан басталады (320 теңге), бағасы арақашықтыққа байланысты.
- Екі қабатты трамвай билеті — 3 гонконг доллары (192 теңге).
- Star Ferry паромы — 6,5 гонконг доллары (416 теңге).
- Қала ішіндегі автобустар — 4,5 гонконг долларынан басталады (288 теңге), бағасы бағытыңызға байланысты.
Көлік картасын (Octopus Card) метро станцияларындағы арнайы кассалардан немесе кейбір дүкендерден сатып алуға болады. Бағасы — 150 HKD (9 600 теңге), оған депозит ретінде 50 HKD (3 200 теңге) және баланстағы 100 HKD (6 400 теңге) кіреді. Егер көлік картасын қолдансаңыз немесе дебеттік карта арқылы төлем жасасаңыз, бір күндік көлік шығыны шамамен 100 HKD (6 400 теңге) дейін жетуі мүмкін — барлығы баратын жағыңызға байланысты.
Алайда бөлек көлік картасын сатып алуға кеңес бермес едім, себебі көлікте төлем жасауға кәдімгі дебеттік карталарды қолдануға болады, бұл ыңғайлы әрі тез. Қалай төлесеңіз де бағада айырмашылық болмайды. Бірақ екі қабатты трамвайға мінсеңіз, билетті картамен төлей алмайсыз, бұны ескерген жөн.
Саяхатқа шыққанда қандай банк картасын алған жөн
Ары-бері жүргенге мен Google Maps-ты қолдандым. Бірақ менің досым мұнда алты жылдай тұрғандықтан жолды өзі көрсетіп жүрді.
Жалпы қалада танымал автомобиль маркаларын көп кездестіресіз. Егер BMW, Range Rover, Tesla сияқты аты жер жарған көліктерді көрсеңіз таңғалмаңыз. Қазақстанда да мұндай көліктер, әрине, жоқ емес, бірақ Азияда Toyota-ның көліктерінен басқа көліктерді де көру өте қызық. Айтпақшы, бұл жақта біздегідей «Камри Сороковканы» өліп жақсы көрмейді.
Гонконгта нені қызықтауға болады
Виктория шыңы
Виктория шыңы (Пик Виктория) — Гонконг аралындағы ең биік нүкте. Онда көтеріліп, қаланың әсем панорамасына көз тастауға болады. Ол жерге жету үшін автобусқа не болмаса Peak Tram трамвайына міне аласыз. Бағаларын жоғарыда жазғанмын, бірақ трамвай билеті 62 HKD (шамамен 4 096 теңге) тұрады.
Шыңға көтерілгенде әдемі көріністерді тамашалайсыз, ал күн батар кезде шықсаңыз, көз алдыңызда тура Пинтерестегідей картина тұратын болады! Виктория шыңынан қала тап алақандағыдай көрінеді — Алматыдағы Көктөбедегідей. Шыңға көтерілу үшін ақша төлемейсіз.
Виктория шыңынан қаланың көрінісі
Виктория шыңынан қаланың көрінісі
Ladies Market немесе жергілікті «барахолка»
Киімдер, сөмкелер, аяқкиімдер, белдіктер, қытайлық шай сервиздері немесе Брюс Лидің суреті бар жейделер секілді кәдесыйлар болсын, бәрібір — Ladies’ Market-те барлығы табылады. Атауы айтып тұрғандай, тіпті ештеңе қажет болмағанның өзінде мұнда келіп, көңілді сауда-саттық атмосферасын бақылай аласыз. Бірақ қайда бару керек, қалай саудаласу керек екенін білсеңіз, жақсы жеңілдіктер болады. Алматыдағы «барахолкадағыдай» сатушылар үлкен арбаларымен келе жатқанда «Жол береміз! Жол!» деп айқайламаса да, «ХБ ғой» деп айтатын сатушыларды көрмесеңіз де, арзан тауарларды таба аласыз.
Егер жақсы саудаласа алсаңыз, тауарды өте тиімді бағаға сатып ала аласыз. 85 HKD (5 440 теңге шамасы) төрт магнит сатып алып жатқанда сатушы «100 Гонконг долларға тағы бесеуін ала аласыз» деп еді, тиімді екен ғой деген ой келді. Бірақ бір магниттің бағысы бәрібір 15 Гонконг доллары екені есіме түсіп, сатушының қулыққа басып жатқанын түсіндім.
Ештеңе сатып алмасаңыз да, бұл жердің атмосферасы өте тартымды. Себебі бұл базар қаланың ескі бөлігінде орналасқан деп есептеледі. Сондықтан барар жолда қаладағы ғимараттардың қалай өзгергенін байқауыңыз мүмкін.
Ladies market
Ladies market
Базарда жүріп шаршасаңыз, Гонконгтың танымал десерттерінің бірі — egg tart-ты іздеп көріңіз. Бұл тәтті тағам британдық custard tart пен португалдық пастель де натаға ұқсайды. Бағасы — шамамен 15 Гонконг доллары (960 теңге). Оны Гонконгтың көптеген наубайханасында сатады — Google Maps арқылы іздеуге болады.
Жұлдыздар аллеясы
Гонконгтың «Жұлдыздар аллеясы» — Голливудтың «Даңқ аллеясына» ұқсайтын танымал аллея, ол жергілікті киноиндустрияның дамуына елеулі үлес қосқан өнер қайраткерлерін дәріптеу үшін жасалған.
Бұл аллея — Гонконгтағы ең танымал туристік орындардың бірі. Ол Kowloon Area Tsim Sha Tsui East ауданындағы Виктория шығанағының жағалауында орналасқан.
Жұлдыздардың қолын көрмедім, себебі таба алмадық. Есесіне жағалауда отырып асықпай кофе ішіп, жаймен серуендеп алдым. Мен таба алмасам да, мүмкін сіздер таба аласыздар.
Бұл аллеяға жеткенде атақты Гонконг вафлиінің дәмін көруге болады. Гонконг вафлиі, сондай-ақ egg waffles немесе bubble waffles — Гонконг көше тағамдарының ең танымал және көпшілік ерекше жақсы көретін түрлерінің бірі. Бағасы — шамамен 40 HKD (2 560 теңгедей).
Тайкун тарихи түрмесі
Тарихи түрмені көргіңіз келсе, Tai Kwun-ға келсеңіз болады. Қорықпаңыздар, бұл түрмеге кіру үшін заң бұзудың қажеті жоқ. Оның тарихы Гонконгтың отарлық дәуірінен бастау алады. Бұл жерді британдықтар отарлық әкімшілігі, полиция орталығы және түрме ретінде құрған. Түрмені көремін деушілерге кіру тегін, егер де қосымша қызметтер қажет болса, құнын төлеу керек болады.
Tai Kwun-ға келген қонақтар XIX асырдың аяғындағы Гонконг тарихына көз жүгірте алады. Кешеннің танымал бөліктерінің бірі — мыңдаған адам қамалған тар түрме камералары. Ғимаратты қалпына келтіріп, интерактивті көрмелерді ашу арқылы келушілер бұл жердің атмосферасын сезініп, көп нәрсені біле алады.
Бірден айтайын, түрмені көруге көп адам келеді. Түрме биік жерде орналасқандықтан, оған жеткенше баспалдаққа толы аймақтан өтеміз. Жол бойындағы шағын базарға кіріп шыға аласыз — Трамптың бетперделері тым көп болды…
Түрме қабырғалары
Қаланың тар көшелері
Халықаралық қаржы орталығы
Кезінде «Лара Крофт: Расхитительница гробниц» фильмінде Анджелина Джоли осы ғимараттың қабырғасына өрмелеген еді. Сырты толығымен жылтыр, шыныдан жасалған. Бір қарағанда Алматыдағы «Нұрлы тау» орталығына қатты ұқсайды. Әлбетте, аса мақтап кетпеген жөн, себебі «Нұрлы тау» қаржы орталығының қасында өте кішкентай. Қаржы орталығының биіктігі 412 метр болса, «Нұрлы тау» — 108 метр.
Ғимаратқа кіру тегін. Бірақ бұл жерге ғимаратты көру үшін ғана келудің қажеті жоқ. Себебі оның жоғарғы қабатында Гонконгтің басқа бөлігіне ғажайып көрініс ашылады. Сәтін салып күн ашық кезде барып, мұхиттағы кемелердің асықпай жүзіп келе жатқанынан басқа, төмендегі көлік толы жол көз тастап, асықпай кофе ішіп, бір тынығып аласыз.
Қаржы орталығына барар жолдағы көрініс
Қаржы орталығына барар жолдағы көрініс
