Саяхаттауды қалай жоспарлау керек: блогер Ерасыл Мирасбектің ережелері

Сәлем, менің атым Ерасыл, мен саяхатшымын. Бір жылда шамамен жаңа бес елге саяхаттаймын. Бүгін мен бағыттарды қалай жоспарлайтынымды, қонақүйлерді қалай және неліктен таңдайтыным туралы айтамын. Сондай-ақ әрқашан өзіммен бірге не алатыным туралы да жаза кетемін.

Әңгіме-дүкен құрмадық па? Әлеуметтік желілерімізде көп кеңес пен түрлі құпия бар

Telegram

Instagram

Бағытты таңдау 

Бағытты таңдау — бұл өз алдына бір оқиға. Мен басшылыққа алатын негізгі критерийлерім: қандай маусым, туристер саны және менің не қалайтындығым. Мәселен, мәдени тәжірибе ме, шытырман оқиғаларды ма немесе жай ғана демалуды қалаймын ба анықтаймын.

Егер мен шытырман оқиғаларды қалайтын болсам, барынша көп эмоция сезінуге болатын жерлерді таңдаймын. Бұл, әдетте жолдорбамды асынып, жаяулатып зерттегім келетін елдер. Олардың мәдениетіне еніп, жергілікті тағамдардан дәм татып, тұрғындармен араласу ұнайды. Осылайша, мен Үндістанға үш рет барып келдім. Және әр жолы бұл ел мен үшін жаңа қырынан ашылды.

Мен үшін мәдени демалыс — бұл қалалық саяхаттар. Маған ежелгі қалалардың атмосферасымен танысу, мұражайларға бару, сәулетті зерттеу және тарихқа толы тар көшелерде серуендеу ұнайды. Мен Рим, Амстердам немесе Мадрид сияқты бай мұрасы бар жерлерді жақсы көремін.

Жай ғана демалғым келгенде, сүйікті әртістерімнің концерттерін іздеймін. Музыка — менің құштарлығым, және мен саяхаттарды жанды өнер көрсетулермен үйлестіргенді жақсы көремін. Бұл тек демалыс қана емес, сонымен қатар сапарға ерекше маңызды эмоциялар сыйлайды.

Қонақ үй мен пәтерлер

Қауіпсіздік мақсатында мен әрқашан қонақ үйлерді таңдаймын. Бұл әсіресе жаңа немесе бейтаныс жерлерде өте маңызды. Қонақ үйлерде көбінесе тәулік бойына күзет қызметі бар және жеке жалға берілетін жерлерде табу қиын стандарттарды ұсынады.

Брондау үшін мен Booking.com-ды пайдаланғанды жөн санаймын. Бұл – қонақ үйлерді, пәтерлерді іздеуге арналған әмбебап құрал. Оның көптеген таңдау сүзгісі бар, бұл қажетті нұсқаны тез әрі оңай табуға мүмкіндік береді.

Мен әрқашан қонақ үйдің орналасуына, бюджетке және пікірлерге ерекше назар аударамын. Орналасуы ыңғайлы болуы керек. Себебі қала ішінде көп жүруді жоспарласам, тұрғын үйдің негізгі көлік тораптарына жақын болғаны маңызды. Баға мен сапа арасындағы тепе-теңдікті сақтау да өте маңызды.

Пікірлер де шешуші рөл атқарады. Өкінішке қарай, кейбір қонақ үйлер пікірлерді өшіріп қояды не жалған ақпарат көрсетеді. Мұндай жағдай менде Үндістанда болды. Фотосуреттерде бәрі мінсіз болып көрінді, бірақ барғанымда тұрғын үй мүлдем басқаша болып шықты. Сондықтан мен басқа қонақтардың да пікірлерін мұқият зерттеп, сипаттаманың шындыққа сай екеніне көз жеткізу үшін әрдайым фотосуреттерді қараймын. 

Қаражат пен үнемдеу 

Әр сапардың алдында мен бюджетті тиімді басқару үшін негізгі шығындар қайда кететінін анықтаймын:

• Көлік құралдарына (әуе билеттері, пойыздар, автобустар).
• Тұрғылықты орын.
• Тамақтану.
• Ойын-сауық (экскурсиялар, мұражай билеттері, іс-шаралар).
• Күтпеген шығындар – жалпы бюджеттен шамамен 20% бөлемін. 

Ұшақ билеттерін алдын ала Aviasales.kz арқылы сатып алуға тырысамын. Онда тиімді ұсыныстар жиі болып тұрады. Көп жағдайда мен тек қол жүгіммен ұшамын. Осылайша мен қосымша төлемдерден сақтанамын және тіркеу барысы тезірек өтеді. 

Такси орнына автобус немесе метромен жүруге тырысамын, әсіресе такси қымбат еуропалық елдерде. Бұл тек үнемдеу ғана емес, сонымен қатар жергілікті өмірдің ырғағын сезінуге мүмкіндік береді. Көлікке үнемдеп, сол ақшаға дәмді кешкі ас ішу немесе жергілікті жеңсік астардың дәмін татқан жақсырақ.

Елдің мәдениетіне тереңірек сүңгу үшін сүйікті әдістерімнің бірі – жергілікті көше тағамдарын жеу. Оның бағасы қолжетімді ғана емес, сондай-ақ мейрамханаларда кездеспейтін ерекше гастрономиялық тәжірибе сыйлайды. 

Валюта айырбастауға келер болсақ, мен бағамдарды алдын ала салыстырып аламын. Кейде банкоматтан жергілікті валютада ақша шешіп алу айырбастау пунктерінде алмастырғаннан, әсіресе туристік аймақтарда, тиімдірек болып шығады. Бірде Италияда қателік жіберіп, вокзалдың жанындағы айырбастау пунктінде долларды еуроға айырбастап, жасырын комиссиялар салдарынан шамамен 200 еуро жоғалтып алдым. Содан бері тек сенімді орындарда ғана ақша айырбастауға немесе банкоматтан қолма-қол ақша алуға тырысамын.

Қажетті заттардың минимумы

Құжаттар мен ақша

• Паспорт, виза және билеттер (электронды көшірмелерін смартфонда сақтау және күтпеген жағдайлар үшін қағаз нұсқаларын да алу). Паспорттық бақылауда әдетте құжаттардың толық пакеті талап етіледі, сондықтан оларды алдын ала дайындап, тез алуға болатын жерде ұстаған дұрыс.
• Банктік карталар мен аз мөлшерде қолма-қол ақша (елдің валютасында). Бұл өте маңызды, себебі келе сала банкоматтан ақша алу әрдайым мүмкін бола бермейді.

Гаджеттер мен техника 

• Powerbank — таптырмас зат, әсіресе күні бойы серуендеп, тоқ көзінен қуаттану мүмкін болмаған жағдайда көп кұтқарады.  
• Тоқ көздеріне арналған әмбебап адаптер. Бұл елде стандартты емес штепсельдер қолданылған жағдайда керек. 
• Жеңіл ноутбук: демалысқа қарамастан, мен іссапарларда немесе саяхат кезінде жиі жұмыс істеймін. 

Киім мен дәрі-дәрмек

Менің қағидам — минимализм мен жайлылық. Өзіммен тек нақты қажет болатын заттарды аламын:

• Серуендеуге арналған ыңғайлы аяқ киім және сыртқа шығуға арналған тағы бір жұп.
• Өз ара жақсы үйлесетін жеңіл киім жиынтығы: бірнеше футболка, бір-екі жейде, шалбар немесе джинсы.
• Гигиена құралдарының шағын жиынтығы: тіс щеткасы, паста, сабын, сусабын — барлығы жолға арналған шағын қаптамада. Олар көп орын алмайды, бірақ жайлылықты қамтамасыз етеді.
• Шағын дәрі қобдишасы: тек негізгі дәрмектерді аламын:
  • Ауырсынуды басатын дәрілер.
  • Пластырьлар (мүйізгек немесе жеңіл жаралар үшін).
  • Антигистаминдер (аллергия туындаған жағдайда).
  • Суық тиюге және асқазанның ауруына қарсы құралдар — экзотикалық тағамдардың дәмін татқым келсе, міндетті түрде аламын.

Сондай-ақ серуенге арналған жеңіл жолдорба. Ол су, жеңіл тамақ, құжаттар және қажетті ұсақ заттарды өзіммен алып жүру үшін тамаша нұсқа.

Нақты маршрут па әлде аяқасты жоспар

Мен сапарларымда жоспарлау мен аяқасты шешімдердің арасында тепе-теңдікті сақтаймын. Алдын ала маңызды сәттерді ойластырып, уақытты босқа жоғалтпауға тырысамын, бірақ жаңа дүниелер мен күтпеген оқиғаларға орын қалдырамын. Мұндай тәсіл әр сапарды жақсы ұйымдастырылған, бірақ сонымен қатар жан беріп, тосын сыйларға толы етеді.

Сапарға қалай дайындаламын:

1. Маршруттың негізгі нүктелерін таңдау. Алдымен барғым келетін қалалар немесе аймақтарды анықтаймын. Бұл сапардың жалпы бағытын белгілеуге көмектеседі.
2. Басты көрікті жерлерді жазып алу. Міндетті түрде көргім келетін орындарды белгілеймін. Мәселен көрікті жерлер, қызықты аудандар немесе атмосферасы бар жайлы кафелер сынды жерлерді теріп жазып аламын. Бұл маңызды нәрселерді жіберіп алмауға, бірақ маршрутты шамадан тыс жүктемеуге мүмкіндік береді.
3. Логистика. Әрқашан бір нүктеден екінші нүктеге қалай жетуге болатынын тексеремін. Жоспарымда қоғамдық көлікті де, автокөлік жалдауды да немесе жаяу жүруді де қарастырамын. Жақсы ұйымдастырылған логистика уақыт пен күшті үнемдейді. 

Қауіпсіздік ережелері 

«Сақтанғанды Құдай сақтайды» демекші, мен үшін қауіпсіздік саяхаттағы ең маңызды аспектілердің бірі. Демалысым тыныш өтуі үшін әр сапар алдында әрдайым сақтық шараларын қолданамын.