Пхукетте қайда тамақтанамыз: жақсы мейрамханалар, тағам бағалары және көңіліміз толмаған дәмханалар

Сәлем, менің атым Данель. Барлық саяхатымда мен бір нәрсені ғана: тыныштық, жан үйлесімі мен және мәңгілікке сүңгіп кетуді іздеймін. Ал қалжынсыз, шындыққа келер болсақ, жаңа елдерде мен дәмді тағам іздеймін. Өйткені тамақ маған мәдениет туралы гидтер мен экскурсиялардан да көп нәрсе айтып бере алады.

Тайландқа сапарды жоспарлағанда, көп нәрсе таныс болар деп үміттендім. Вьетнамнан кейін жергілікті базарлар, дәмдеуіштер мен тағамдар ұқсас болады-ау деп жобалап едім. Сапар алдында жүздеген TikTok шолу көріп, Google Maps пен турфирмалар мен блогерлердің гайдтарын мұқият зерттедім. Күткенім жартылай ғана ақталды. Кей жерлерде тамақ өте дәмді болды, кей жерлерден бір көргеннен-ақ қашып кеткім келді, ал кей жерлерде бағалар алматылық богемалық мейрамханаларынан арзан болған жоқ. Мысалы, sync coffee bar & roastery спешелти-кофеханасы тар, ал кофесі дәмсіз, ал «инстаграмдық» hom мейрамханасында бір адамның кешкі асы 100 000 теңге тұрар еді. Сондықтан басты кеңес: жоспарлаңыз, зерттеңіз, алайда маршрутты өзгертуге қорықпаңыз.

Осы шолуда Пхукеттегі тағам туралы шынайы жаздық: қай жерде дәмді, бағасы қанша және танымал орындарға кезекте тұру қаншалықты дұрыс.  

Алдымен өз ауданыңызды жақсылап зерттеп алыңыз. Пхукет сан алуан. Патонг сияқты шулы, көңіл көтеретін жерлер бар, сондай-ақ Камала сияқты тыныш аудандар бар, онда өмір баяу өтеді және бағалар сәл жоғарырақ. Пхукетте такси қымбат (ал кептелістер – Алматыдағыдай!), сондықтан уақыттың көбін өзіңіздің қонақүйіңіздің маңында өткізген ыңғайлырақ.

Түнгі базарлар мен көше тағамдары

Пхукет – кез келген гурман үшін нағыз жұмақ. Онда әркім өз бюджетіне лайық дүние таба алады. Мұнда шулы түнгі базарларда тамақтануға, теңізге керемет көрініс ашатын мейрамханаларда отыруға немесе кез келген елдің тағамдарын жеуге болатын орындарға баруға болады. Жапон суши-барлары, түрік дәмханалары, америкалық бургерханалар – Тайландта тек тай тағамдарын ғана емес, әлемнің әртүрлі асханасын да кездестіруге болады.

• 

  Lillo Island
• 

  Asian Bistro
• 

  Cappadocia

Бірақ бастысы – көше тағамдары мен базарлар. Базарларда бәрі сіздің көз алдыңызда дайындалады: майда шыжылдап қуырылған спринг-роллдар, алтын түстес болғанша пісірілген асшаян кәуаптары, ал үлкен қазандарда хош иісті том-ям қайнап жатады. Бағалар көңілге жағымды: 10-12 ролл – 100 бат (1500 теңге), тауық кәуабы– 50 батқа дейін (800 теңге), пад-тай – 100-150 баттан (1500-2300 теңге). Ең атмосфералық базарды біз Пхукеттің ескі қаласында таптық, бірақ ол тек жексенбі күндері жұмыс істейді. Sunday Walking Street Market (Lard Yai) – нағыз «автентикалық» атмосфера бар орын: тар көшелер, антикварлық дүкендер, жарық шамдары және ауада қуырылған сарымсақ пен жемістердің араласқан хош иісі. Мұнда дәстүрлі пад-тайдан бастап, атақты тайлық құймақтарға дейін табуға болады (must try!).

Базарлар бәріне бірдей ұнай бермейтіні де анық. Біріншіден, олар өте шулы. Адам көп, әсіресе туристік маусымда, және қатарлардың арасынан өту – нағыз сынақ. Екіншіден, орын табу қиын. Егер отырып, тыныш тамақтанғыңыз келсе, 17:00–18:00 шамасында, ертерек келуіңіз керек.

Шынымызды айтсақ: егер тазалыққа қатты мән беретін болсаңыз, базарлардан жақсы әсер ала қоюыңыз екіталай. Көше тағамдары дәмді, бірақ стерильді жағдайда дайындалмайтыны анық. Мысалы, мен бұл у-шуды сырттай тамашаладым, базар тағамдарын бірнеше рет жеп көрдім, бірақ соңында адам аздау мейрамханаларда отырып, екі адамға орташа есеппен 10–15 мың теңге шығатын жерлерді таңдадым. Айтпақшы, Камала жағажайында болсаңыз, Lillo Island жағажай мейрамханасына, Sushi Lounge Kamala суши-барына, Cappadocia түрік мейрамханасына және димсамдарымен танымал Asian Bistro-ға міндетті түрде барыңыз.

Тай асханасы және Michelin мейрамханасы

Том-ям – тай асханасының басты символы. Өткен жылы бұл тағам ЮНЕСКО-ның материалдық емес мәдени мұралар тізіміне енгізілді. Егер сіз еуропалық нұсқадағы том-ямға үйренген болсаңыз, Пхукетте сізді таңғалдыратын жайттар бар. Біріншіден, мұнда оны көбінесе күрішсіз ұсынады, сондықтан оған бөлек тапсырыс беріңіз. Екіншіден, сорпасы дәмдірек әрі ащырақ болады. Әрине, ащылық деңгейін өзіңіз таңдай аласыз.

Расын айтқанда, Алматыда да жақсы том-ям табуға болады. Бірақ Пхукетте бұл тағамға балғын теңіз өнімдері ерекше дәм береді. Дәмі «теңіздік» болып келеді, асшаяндар тәттілеу, ал лайм жағымды қышқылдық қосады. Бір порцияның орташа бағасы – 150 бат немесе 2300 теңге. Том-ямды Пхукетте әр қадамыңызда кездестіресіз, бірақ ерекше дәм татқыңыз келсе, Michelin гидіне енген One Chun мейрамханасына баруды ұсынамыз. Бұл – ескі қаланың орталығындағы ең танымал орындардың бірі, оны кіреберістегі жиналған туристер кезегінен оңай тануға болады.

• 

   
• 

   
• 

   
• 

   

Ішіне кірсеңіз, ағаштан жасалған жиһаз, антикварлық декор, жұмсақ жарық және винтажды радиолар мен сағаттармен безендірілген қабырғалар сізді қарсы алады. Бірақ мұнда ең бастысы – тағам. Үздік тағамы – краб пен күріш вермишелі қосылған сары карри. Бұл – кокос сүті, насыбайгүл және дәмдеуіштермен дайындалған өте нәзік ас, оның дәмі краб етінің тәттілігімен керемет үйлеседі. Біз дәм татқан екінші хит – дәмі бай, бірақ жұмсақ әрі тамаша үйлестірілген том-ям болды.

Бірақ кейбір нюанстар бар. Біріншіден – кезектер. Түскі асқа қарай кіреберісте турис көп жиналады. Біз үстелді шамамен 20 минут күттік, ал тапсырысқа одан да көп уақыт кетті. Жанталас кезінде даяшылар барлық қонаққа қызмет көрсетіп үлгеру үшін тапсырысты тек бір рет қабылдайды. Екіншіден – бағалар. Олар қарапайым тай кафелеріне қарағанда жоғары, екі адамға арналған кешкі астың орташа чегі – 15 000 теңге. 

Егер нағыз тай асханасының дәмін татып көргіңіз келсе, баруға тұрарлық. Бірақ ұзақ күтуді немесе тар әрі қапырық орындарды ұнатпасаңыз, туристер аз баратын жерді таңдаған жөн. Оның үстіне, ескі қалада ұрпақтан ұрпаққа берілетін рецепттері бар көптеген әдемі кофехана мен атмосфералық дәмханалар бар.

Том-ямнан басқа дәм татуға тұрарлық тағамдар:

• Теңіз өнімдері қосылған сары кеспе.
• Тауық немесе асшаяндар қосылған пад-тай.
• Кешью жаңғағы қосылған тауық еті.
• Қуырылған спринг-ролдар.
• Асшаян қосылған димсамдар.
• Жабысқақ күрішпен бірге берілетін манго.
• Тай құймақтары.

• 

  Сары кеспе
• 

  Падтай
• 

  Тай құймақтары

Кофеханалар мен десерттер 

Ескі қаланың қақ ортасында туристер ұнататын Mondo Espresso Bar кофеханасы бар. Бұл жерде ешқандай ерекше нәрсе жоқ: түрлі кофе сусындары мен аса дәмді емес десерттер ұсынылады. Байқағанымыздай бұл жерге көбіне инстаграм сүйер қауым панорамалық суреттер үшін келеді. Айтпақшы, маған бұл сапарда кофе мүлдем ұнаған жоқ. Көп жерде күйіп кеткен дәндердің немесе ерітінді кофенің дәмі сезілді.

Туристер арасында тағы бір танымал орын – Mad Hog Tavern немесе «Гарри Поттер» кофеханасы (миллениалдар, сіздердің кезектеріңіз!). Бұл тавернада тақырыптық мәзір мен декор бар. Мұнда кілегейлі сыра, Гарри торты және пицца, тауық қанаттары немесе гарнирмен берілетін шошқа еті сияқты қарапайым тағамдар ұсынылады. Дәмдері айтарлықтай керемет емес, сондықтан тек Гарри Поттер фанаты болсаңыз ғана баруға кеңес беремін. Есіңізде болсын: кофеханада суретке тек тапсырыс бергендер ғана түсе алады. 

Супермаркеттердегі тағамдар 

Тайдағы 7-Eleven дүкендері – жай ғана супермаркет емес, аш қарынға таптырмас орын. Олар әр 300 метр сайын кездеседі және мұнда бәрін табуға болады: жеңіл тағамдардан толыққанды кешкі асқа дейін. Мұнда асшаян қосылған дамплингтер, әртүрлі салмасы бар гёдзалар, бургерлер, атақты тост сэндвичтері, рамен, круассандар, ананас бәліштері, сусындар және тағы басқалары сатылады. Барлығын сол жерде қыздырып береді, сондықтан тез тамақтануға ыңғайлы.

Туристер арасында тост наннан жасалған сэндвичтер ерекше танымал – оларды ыстық престе пісіріп, қытырлақ әрі хош иісті етеді. Дәмді, тойымды әрі арзан. Сусындардан жабайы пісте дәмімен матча мен комбучаның дәмін татуға ұсынамын.

7-Eleven бағалары – нағыз бонус: екі бургер, дамплинг, бірнеше жеңіл тағам мен сусыннан тұратын кешкі ас шамамен 5 000 теңгеге шығады, ал құрғақ рамен алсаңыз – тіпті арзан. 

Қорытынды 

Пхукеттегі тағамдар – бұл түрлі дәмдерден құрылған тұтас бір әлем. Әрине, түрлі нәрселерді жеп көру қажет. Түнгі базарлар – ерекше атмосфералы, арзан және тағам түрлері өте көп. 7-Eleven – тез тамақтанып алғыңыз келгенде құтқаратын орын. Мейрамханалар әртүрлі болады: асты керемет дәмді етіп дайындайтындардан, асыра сілтеп бағаланғандары да бар. 

Басты кеңес – эксперименттен қорықпаңыз. Арал үлкен, асханасы сан алуан, ал ең дәмді тағамдар күтпеген жерлерден шығып жатады. Сондықтан дәм татып, ләззат алыңыз және барлығын сергітетін кокос суымен ішуді ұмытпаңыз!