Жалғыз саяхаттайтын адамдарға арналған 10 ереже

Мен саяхатқа шығатынымды, билет алғанымды немесе виза рәсімдегенімді ешкімге айтпаймын. Бұл ақпаратты отбасым ғана біледі. Әлеуметтік желіде немесе достарымның арасында жарияламаймын. Саяхат — жеке тәжірибе, сондықтан өзімнің қауіпсіздігім мен жайлылығымды бірінші орынға қоямын. Бұл ереже менің ішкі тыныштығым мен саяхаттың еркін өтуіне әсер етеді.

Кез келген елге бармастан бұрын оның салт-дәстүрін, тыйымдарын, ерекше ережелерін зерттеймін. Мысалы, Иорданияға барған кезде тек жабық, ұзын киімдерді киіп жүрдім. Бұл — сол елдің мәдениетіне құрмет көрсетудің бір жолы. Әр елдің ерекшеліктерін алдын ала біліп, дайындықпен барған дұрыс. Осылайша өзіңізді жайлы сезініп қана қоймай, жергілікті тұрғындардың құрметіне де бөленесізі.

Бірнеше банк картасы, одан бөлек міндетті түрде қолма-қол ақша, елдің ұлттық валютасынан бөлек қосымша жүз-екі жүз долларды үнемі өзіммен ала жүремін. Мысалы, кейбір жерлерде банк картасы қабылданбауы мүмкін, сондықтан қолма-қол ақша әрдайым қажет.

Жалғыз саяхаттағанда әуежайда сөмкемді немесе телефонымды біреуге тапсырып, қарай тұруын өтінуім мүмкін. Бірақ төлқұжатым қашан да өзіммен бірге. Құжатты арнайы кішкентай сөмкемде сақтап, оның орнында екенін қайта-қайта тексеріп отырамын. Сонымен қатар, қонақүйде де оны қалдырмаймын. Төлқұжаттың жоғалуы үлкен қиындық тудыруы мүмкін, сондықтан бұл ережеге өте қатаң қараймын.

Саяхат кезінде дәл сол сәтте әлеуметтік желіге ештеңе жарияламаймын. Саяхаттап барған елден қайтып келгеннен кейін ғана контент саламын. Егер локацияны белгілегім келсе, сол жерден кеткеннен кейін ғана белгілеймін. Осылайша, менің нақты қайда жүргенімді отбасым ғана біледі. Сізге әлеуметтік желіде қандай адамдардың тіркелгенін білмейсіз, сондықтан қонақүйді көрсетіп, отырған жеріңізді дәл сол сәтте айтпаған абзал.

Мен ешқашан адамды ұлтына қарай бөліп жармаймын. Қазақстандық болғаны үшін ғана біреуге сену — аңқаулық. Әр адамды жеке тұлға ретінде қабылдаймын. Шетелде кіммен болса да абай болу қажет. Қазақстандықтармен де, басқа ұлт өкілдерімен де қарым-қатынаста сақтықты ұмытпаймын. Әлемде түрлі адам бар, сондықтан әр жанмен тең қарым-қатынас жасау — басты қағидам. 

Достарыммен саяхаттағанда таксиге мінемін, алайда жалғыз болғанда барынша метро немесе автобус секілді қоғамдық көлікпен немесе жаяу жүруді таңдаймын. Бұл қауіпсіздік тұрғысынан маңызды ғана емес, сонымен бірге жергілікті тұрғындардың күнделікті өмірін сезінуге мүмкіндік береді. Жаяу серуендеп, қаланың атмосферасын көру — саяхаттың ерекше бөлігі.

Шетелде түрлі жағдай болып қалуы мүмкін. Мұндайда менің ең басты көмекшім — камера. Сондықтан камера үнемі дайын тұрады. Қандай да бір түсініксіз жағдай болса, бірден барлығын видеоға түсіріп алуға тырысамын. Видео немесе фото арқылы әрбір детальді дәлел ретінде қолдануға болады.

Шетелде жаңа адамдармен танысқан кезде мен жалғыз жүргенімді айтпаймын. Әдетте отбасыммен немесе достарыммен саяхаттап жүрмін деймін. Бұл ереже маған өзімді қауіпсіз сезінуге көмектеседі. Бірақ көптен бері жалғыз саяхаттап жүрген жандармен танысқанда өзімнің де жалғыз жүргенімді ашық айтып, кеңес сұраймын. Бұл — жаңа дос тауып, пайдалы кеңес алудың жақсы жолы.

Саяхат кезінде өзімнің қайда екенімді отбасыма айтып отырамын. Ең алдымен өзімнің қауіпсіздігім үшін, екіншіден ата-анамды уайымға салмау үшін. Қысқа да нұсқа мына жердемін, мынадай дәмханадамын деп хабарлама жазып отырамын.

Жоғарыда айтылған ережелер маған қауіпсіз әрі жайлы саяхаттауға көмектеседі. Бұл ережелерді сақтай отырып, әлемді зерттеп, жаңа адамдармен танысып, саяхаттан барынша ләззат аламын. Ең бастысы, бұл ережелер менің еркіндік пен қауіпсіздік арасындағы тепе-теңдікті сақтауға мүмкіндік береді.