2025 жылы саяхаттап, жүгіруді де ұнататындарға арналған 6 марафон
Әлемдік марафондарды бағындырғысы келетіндерге арналған топтама.
Жүгіру мен саяхат – тамаша үйлесім. Біріншіден, бұл жай ғана демалыс емес. Өз-өзің жеңіп, қалаған медалді алу мақсаты мыңдаған адамды спорттық шараға қатысу үшін өзге елде тоғыстырады. Екіншіден, марафонның маршруты әрқашан негізгі көрікті жерлерді қамтитындықтан, бір күн ішінде қаланы тамашалаудың керемет мүмкіндігі. Бұл Hop-On Hop-Off автобусындағы экскурсияға ұқсайды, бірақ дөңгелектердің орнына – сіздің аяқтарыңыз. Үшіншіден – дәмді көмірсулармен тамақтану. Әрбір спортшы марафонға үш күн қалғанда гликоген қорын толтыру үшін көмірсуларды белсенді түрде тұтына бастайды. Осылайша, жарысқа дейін және одан кейін де әр елде дәмді тағамдарды еш өкінбестен жеуге болады. Ең бастысы – шектен шықпау және жаттықтырушымен кеңесу!
Парижде өтетін марафонға слоттар қазірдің өзінде сатылып кеткен, бірақ сіз 2026 жылдың көктеміне арналған слоттарды сатып ала аласыз. Демек сізде дайындыққа көбірек уақыт болады.
Сеул марафоны
Қашан: 16 наурыз
Слот бағасы: 42 400 теңгедей (80 доллар)
Сеул марафоны 1964 жылдан бері әр көктем сайын өткізіледі. Ол азиялық мәдениетке, асханаға қызығатын және мегаполистің ерекше атмосферасын жақсы көретіндерге таптырмас сайыс.
Жүгіру маршрутын жеңіл деп айтуға болмайды, себебі ол көптеген бұрылысты, өрлеулерді және көпірлерді қамтиды. Дегенмен, Олимпиада стадионында мәреге жеткенде марафонның барлық қиындығын әп сәтте ұмытасың.
«Сеул марафонын 2019 жылы жүгіріп өттім. Үш ай бұрын тіркелдім, сол кезде күту парағы немесе лотерея болған жоқ. Мені марафонның алтын мәртебесі бары қатты қызықтырды. Жарыс жолы керемет: эпикалық басталуынан бастап, басты стадиондағы мәреге дейін».
Толығырақ ақпарат марафон сайтында.
Schneider Electric Париж марафоны
Қашан: 13 сәуір
Слот бағасы: 65 800-93 200 теңгедей (120–170 евро)
Бұл марафон маршруты жазық жер бедерінде және қолайлы ауа райы кезінде өтендіктен өміріңіздегі алғашқы 42,2 км қашықтықты бағындыру үшін мінсіз таңдау. Бұл шара марафон-мейджор стандарттарына (әлемдегі ең беделді World Marathon Majors марафондар сериясы) сәйкес келеді, сондықтан ұйымдастыру, тамақтану пунктері және старт-финиш қалашығы жоғары деңгейде ұйымдастырылған.
Жарыс Елисей алаңдары мен Триумфальды аркадан басталады, содан кейін Лувр, Бастилия алаңы және Венсен орманы секілді қаланың көрікті жерлерінің бойымен өтеді. Ал 27 км-ден кейін мәреге жақындағанда Эйфель мұнарасының керемет көрінісі ашылады. Елестетіп көріңізші: көктем, Париж, мыңдаған көрермен сізді мәреге дейін қолдап тұрады.
Тамаша бонус: марафонды алғаш рет жүгіретіндерге алтын түсті старттық нөмірлер беріледі. Слотты ресми сайттан сатып алуға болады.
Алматы Марафоны
Қашан: 28 қыркүйек
Слот бағасы: 16 000 теңгеден бастап
Алматы марафоны - Орталық Азиядағы ең ауқымды спорттық шара. Ол жыл сайын күз мезгілінде Алматыда өтеді. Таулы жер бедері мен биік өрлер жүгіру кезінде айтарлықтай кедергі болуы мүмкін. Бірақ марафонның ұйымдастырылуы мен атмосферасы қатысушылар мен жанкүйерлерге ұмытылмас әсер қалдырады. Әр деңгейдегі жүгірушілер өз қабілеттеріне қарай қашықтықты таңдай алады: 10 км-ден бастап 42,2 км-ге дейін.
Маршруттың негізгі бөлігі қаланың басты көшелерімен өтеді: әл-Фараби, Саин, Абай және Сәтпаев көшелері. Бұл жолдар қаланың көрікті жерлерін көріп, Заңғар Алатаудың әсем көрінісіне тамсануға мүмкіндік береді. Слотты ресми сайттан сатып алуға болады.
TCS Амстердам марафоны
Қашан: 19 қазан
Слот бағасы: 8 300-76 800 теңгедей (15–140 евро)
Париждік марафон сияқты, Амстердам марафоны да жеңіл трассасымен танымал. Жазық жер бедері, қолайлы ауа райы, тамаша ұйымдастыру және сапалы тамақтану пунктері бұл марафонды жаңадан бастаушылар үшін мінсіз етеді. Биыл мерейтойлық елуінші марафон, оны ұйымдастырушылар Амстердамның 750 жылдық мерейтойымен бірге атап өтуді жоспарлап отыр. Әрине, бүкіл ел бұл қос мерекені асыға күтуде.
Марафон маршруты сан алуан: жүгірушілер жергілікті парктерді, ауылдық жердегі диірмендерді, жарқын көшелерді көріп, Амстел өзені бойымен жүгіріп, Олимпиада стадионында мәреге жетеді.
«Амстердам марафоны әлі күнге дейін менің ең сүйікті старттарымның бірі. Мұндай қарама-қайшылықты еш жерде көрген емеспін: сен қаланың ішінде жүгіресің, содан кейін диірмендер мен шалғындары бар ауылдарға шығып, қайтадан мегаполиске кіресің. Стадиондағы шуды мәреге дейін 4 км қашықтықтан естисің, әрбір метр сайын трибуналардың шуылы күшейіп, сені көптен күткен мәреге жақындата түседі».
Марафон жайлы толығырақ ақпаратты және оған слотты ресми сайттан алуға болады.
Подгорицадығы Millenium Run
Қашан: 9 қараша
Слот бағасы: 8 300-32 900 теңгедей (15–60 евро)
Соңғы бірнеше жылда Черногория теңіз жағалауында демалуға арналған сүйікті елдердің біріне айналды: көптеген жағажай, мөлдір су, теңіз өнімдері мен көрікті таулар бұл жерді ерекше етеді. Мемлекетті шағын курорттық Еуропа деуге болады. Мұнда қазақстандықтар үшін маусымдық визасыз режим енгізілген.
Черногория астанасының жер бедері жазық емес, бірақ қатты төбешікті де емес. Әртүрлі қашықтықтардың кең таңдауының арқасында (5 км-ден 42,2 км-ге дейін) бұл жүгіру кез келген деңгейдегі жүгірушілерге өте қолайлы.
«Подгорицада жартылай марафонды жүгіргенде, тек кеңістіктен ғана емес, уақыт арқылы да өткендей боласың: Стара Варош ауданындағы Осман империясы дәуірінің қирандылары, қазіргі заманғы Христос Қайта Тірілуінің православие соборы және жайлы жеке үйлері бар тұрғын аудандардың жанынан өтесің. Қызығы сол: Подгорицада жүгіргенде жылдамырақ қозғаласың, бірақ ішкі дүниеңде баяуланып, айналадағы сұлулықты бойыңа сіңіресің».
Слотты ресми сайттан сатып алуға болады.
Ыстамбұл марафоны
Қашан: 2 қараша
Слот бағасы: 32 900-65 800 теңгедей (60–120 евро)
Трассаның қиындығына қарамастан, Ыстамбұл марафоны жүгірушілер арасында өзінің қолжетімділігімен танымал: тікелей рейстер мен визасыз кіру сапарды ыңғайлы етеді. Босфор бұғазы бойындағы маршрут әсерлі көріністер сыйлайды, ал дәмді түрік тағамдары – керемет бонус. Сонымен қатар көмірсу қорын толтыру үшін түрік симиттерін еш ұялмастан жей беруге болады.
Бұл – қаланың Азия және Еуропа бөліктерін қамтитын жалғыз құрлықаралық жүгіру. Слотты марафонның ресми сайтынан сатып алуға болады.
Суретті салған — Ольга Цай.
