2025 жылы қандай концерттерге баруға болады
Кәне, бірге қайталайық: Coldplay, Билли Айлиш, Лана дель Рей, Linkin Park.
Егер 2024 жылы Backstreet Boys, Maroon 5 немесе Muse концерттерінен достарыңыздың фотоларын көріп, өзіңізді шетте қалғандай сезінген болсаңыз, онда 2025 жылы осының бәрін өз басыңыздан өткізуге кем дегенде 10 мүмкіндігі бар!
Есіңізде болсын: концертке билет алуды аяқасты шешсеңіз, кімнен алып жатқаныңызды мұқият тексеріңіз. Ресми өкілдерден бе, әлде алыпсатарлардан ба? Facebook-тағы топтардан ма, әлде түрлі сайттан ба? Таңдау әрине көп қой, сондықтан жалған билет алып қалмас үшін сақ болыңыз. Пікірлерді оқып көріңіз.
Эд Ширан
Қайда: Үндістан, Қытай, Қатар, Еуропа
Қай жақ жақынырақ: Абу-Даби, Доха, Ханчжоу
Өтетін уақыты: мамыр-қыркүйек
2025 жылы Эд Ширан өзінің «+–=÷×» (қарапайым тілмен Mathematics) атты турнесін Азия мен Еуропада аяқтамақ. Эд Ширанның концерттері – бұл бір адамдық шоу. Музыкант үлкен декорацияларсыз, би нөмірлерісіз-ақ ол өзінің гитарасы мен жүрекке жылы тиетін әндері арқылы көрермендерді баурап алады.
Coldplay
Қайда: БАӘ, Үндістан, Қытай, Корея, АҚШ, Канада, Ұлыбритания
Қай жақ жақынырақ: Абу-Даби, Гонконг, Сеул
Өтетін уақыты: қаңтар-қыркүйек
Бұл тур, бәлкім, тізімдегі ең eco-friendly жоба. The Music Of The Spheres 2022 жылы басталып, содан бері әлі күнге дейін жанкүйерлер арасында танымал. Фанаттар энергия өндіретін алаңдарда билеп, стадиондарға жаяу немесе велосипедпен жетеді, ал топ болса тек поездбен жүріп, көмірқышқыл газының шығарындысын азайтуға тырысады. Өзіңмен бірге табиғатты аялайтын досыңды алып, бірге саяхатта!
One Republic
Қайда: Вьетнам, Түркия, Әзербайжан, Еуропа
Қай жақ жақынырақ: Ыстамбул, Баку, Прага
Өтетін уақыты: қаңтар-қараша
Жаз мезгілінде One Republic поп-рок тобы “Artificial Paradise” атты альбомын шығарды. Енді қазір олар "Escape to Europe" әлемдік турын жоспарлап жатыр. Оның аясында музыканттар 25-тен астам концерт бермек. Топ соңғы 6 жылда шоуларды тек АҚШ-та қойған еді. Егер олардың концертіне баруды ұзақ уақыттан бері армандап жүрсеңіз, бұл мүмкіндікті жіберіп алмаңыз.
Іс-шара күні қалада жол апокалипсисі болары сөзсіз: метро мен автобустар лық толы, такси қымбаттап кетеді, кезектерде тұрып шаршайсыз. Алдын ала дұрыс таңдалған қонақ үй мен жолды жақсылап жоспарлап алу уақытыңыз бен ақшаңызды үнемдеп, сонымен қатар жүйкеңізді тыныштықта сақтауға көмектеседі.
Билли Айлиш
Қайда: Еуропа, Ұлыбритания, Аустралия
Қай жақ жақынырақ: Ыстамбул, Баку, Прага
Өтетін уақыты: ақпан-шілде
Ең жас Грэмми иегері Билли Айлиштен көптен бері күткен тур. Ол әншінің соңғы Hit Me Hard and Soft альбомын қолдау аясында өтеді. Оның концерттері өте ерекше: стадиондар толғанымен, үйдегідей жылы атмосфера болады. Билли өзінің ыңғайлы киімімен билеп, ән айтып, жанкүйерлерімен ашық әңгімелеседі.
Imagine Dragons
Қайда: Еуропа
Қай жақ жақынырақ: Будапешт, Прага
Өтетін уақыты: мамыр-шілде
Imagine Dragons концерттері – бұл толассыз энергия, керемет шоу, көрермендермен тікелей байланыс, ал Loom туры – осының бәрінің керемет үлгісі. Топтың солисі Дэн Рейнольдс сахнаға жейдесіз шыққанды ғана жақсы көрмейді, сонымен қатар психикалық денсаулықтың маңыздылығын насихаттайды және әр концертінде өз ойларымен бөліседі.
Лана Дель Рей
Қайда: Ұлыбритания, Ирландия
Қай жақ жақынырақ: Лондон
Өтетін уақыты: маусым-шілде
2025 жылдың көктемінде Лананың оныншы альбомы - The Right Person Will Stay шығады. Әнші әзірге тек Ұлыбритания мен Ирландияда концерт қоятынын хабарлады. Ресми сайттағы жаңалықтарды үнемі қадағалап отыруға кеңес береміз. Мүмкіндік болса, сатылымға шыққан билеттерді бірден сатып алыңыз.
Linkin Park
Қайда: Азия, Еуропа, Солтүстік және Оңтүстік Америка
Қай жақ жақынырақ: Милан, Берлин
Өтетін уақыты: қаңтар-қараша
2024 жылдың қыркүйегінде Linkin Park тобы жаңа әнші Эмили Армстронг пен жаңа барабаншы Колин Бриттейнмен бірге қайтадан сахнаға шығатынын хабарлады. Бұл топтың солисі Честер Беннингтон қайтыс болғаннан кейінгі алғашқы туры. Одан бері 7 жыл өтті.
Олардың 2024 жылдың қарашасында шыққан соңғы альбомы From Zero-ны фанаттар мен сыншылар жақсы қабылдады. Ал Linkin Park өздері концерт беруді қатты сағынып, оралуға көп дайындалғанын жеткізді.
Дуа Липа
Қайда: Еуропа, Канада, АҚШ, Аустралия
Қай жақ жақынырақ: Прага, Милан
Өтетін уақыты: наурыз-қазан
Radical Optimism тур концерті – көңілі түсіп жүрген жандарға арналған шипалы бұлақ. Levitating, Don’t Start Now, New Rules, Electricity сияқты хиттерге бүкіл стадион билейтініне күмәніміз жоқ, сондықтан тұрып тұратын орындарды алдын ала алып қойып, сапарға ертерек мұқият дайындық жасаған дұрыс.
Сахна маңында болсаңыз, әртіске жақын боласыз, атмосфераға толығымен батып кетесіз, билеп ән салып көңіл көтересіз, бірақ тез шаршап қалуыңыз әбден мүмкін. Үстіне, ертерек келіп кезек күту керек. Отыратын орындар ыңғайлы әрине, бірақ сахнадан алыс, қатар арасында билеу қиын. Сондықтан орын таңдағанда сахнаға дейінгі қашықтықты ескеріп, өзіңіз үшін ең жақсысын таңдаңыз.
Сабрина Карпентер
Қайда: Франция, Германия, Нидерланд
Қай жақ жақынырақ: Берлин, Амстердам
Өтетін уақыты: наурыз-сәуір
Сабрина Карпентер – соңғы екі жылдағы поп-музыка әлемінің үлкен жаңалығы. Оның жаңа Short n’Sweet альбомына енген тректері TikTok-та вирусқа айналып, өзі Тейлор Свифт концертінде қонақ ретінде ән салды, сондай-ақ Грэммиге алты санат бойынша үміткер.
Short n’Sweet турында Сабрина өзінің керемет юмор сезімін, 70-ші жылдардағы телешоулардың вайбын, флирт пен жылтырақты біріктіреді. Негізгі сахна пентхаус сияқты жасалған, ал Сабрина оның бөлмелерінде әндерін орындайды.
Кэти Перри
Қайда: Еуропа, АҚШ, Оңтүстік Америка, Ұлыбритания
Қай жақ жақынырақ: Берлин, Будапешт, Прага
Өтетін уақыты: сәуір-қазан
2025 жылы сахнаға тағы бір жарқын жұлдыз оралады. Сыншылар оның жаңа «143» альбомына жағымсыз пікір білдірді, бірақ бұл оның Fireworks, I Kissed a Girl, Roar және басқа да хиттерінің әлемдік танымалдығын жоққа шығармайды. Егер сіз Кэтидің бұрынғы альбомдарындағы әндерді білсеңіз, The Lifetimes Tour туры сізге ұнайтыны анық, әсіресе оның жарқын ғарыштық костюмдері мен сахналық безендірулері сізді бей-жай қалдырмайды.
