Ата-анаммен 10 күнге Еуропаға қалай саяхаттап, қанша ақша жұмсадық
Жағдай мынадай: ағылшынша сөйлемейтін ата-анам және 20-дан астам елді аралап көрген қыздары.
Менің есімім Айгүл, Астанада тұрамын. 2023 жылдың жазында әке-шешеммен бірлескен алғашқы сапарымызға аттандық. Таңдауымыз Еуропаға түсті. Саяхаттың қалай өткенін айтып берейін.
Әкем де, анам да 63 жаста. Оларды саяхаттаушы деп айтуға болмайды. Көптеген қазақстандық үшін әдеттегідей, олар үшін де шетелге алғашқы сапарлары Түркиядан басталды. Одан кейін олар әлемді аралаған жоқ. Өмір бойы бауырым екеуіміздің болашағымыз үшін еңбек етіп, өз қызығушылықтарынан бас тартты. Бірақ біз ағам екеуіміз есейдік. Сондықтан мен «енді саяхаттауға уақыт келді» деп шешіп, оларға Еуропаға сапар шегуді ұсындым. Олар келісті.
Саяхатқа дайындықты қалай бастадық
Ата-анамызды жаңа мәдениет пен жоғары бағалармен қатты шошытып алмау үшін Шығыс Еуропаға баруды шештік. Кешкі ас кезінде ұзақ талқылап, «Орел и Решка» бағдарламасын бірнеше сағат көргеннен кейін, мынадай маршрутты таңдадық: Прага – Карловы Вары – Берлин – Вроцлав – Краков – Будапешт – Прага. Бұл сапар он күнге созылды.
Мен алдын ала Aviasales.kz сайтынан арзан авиабилеттерді іздеп, Астанадан Прағаға Баку арқылы барып қайтуға билет таптым. Үшеумізге арналған билеттердің жалпы бағасы 1 170 000 теңге болды.
Біз 2023 жылдың шілде айында сапарға шықтық, ал Шенген визасына қажетті құжаттарды сәуір айында бердік. Ата-анамыз үшін бұл алғашқы виза болғандықтан, мен құжаттар жинағын дайындап, сауалнаманы толтырып, барлық сұрағыма жауап берген консультантқа жүгінуді ұсындым. Оның қызметі үшін бір адамға 20 000 теңге төледік, бұдан басқа, консульдық жинақ (бір адамға шамамен 50 000 теңге) төледік.
Үшеуімізге арналған барып-қайту билеттері: 1 170 000 теңге.
Консультанттың қызметі және консульдық жинақ: шамамен 210 000 теңге.
Тұратын жерді қайдан брондадық және неге көңіл бөлдік
Мен әрдайым тұратын жерді Booking арқылы брондаймын және басқа қонақтардың пікірлерін мұқият оқимын. Біз ас үйі бар пәтерлерді қарастырып, аса мән бердік. Егер қонақ үйде тұрсақ, міндетті түрде тоңазытқыш және шайнек болуын қаладық. Бізге суды салқындатып және оны қайнатып, ыстық шай іше алу маңызды болды. Жалпы, ата-анаммен сапарға шыққанда, әрдайым шайдың бір қаптамасы, сүт, қант және қатты сабын алып жүру керек екенін түсіндім.
Біз үш пәтерде және үш қонақ үйде тұрдық. Әдеттегідей тамақтану үшін, кейде үйде таңғы ас іштік, ал кешкі асқа кейде “рожки” макарон немесе картоппен шұжық қуырып жедік.
Қонақ үй мен пәтерлерге шығын: 10 түнге шамамен 530 000 теңге.
Еуропада қандай көліктермен жүрдік
Қала ішінде такси мен қоғамдық көлікпен жүрдік. Мысалы, Прага әуежайынан пәтерге жету үшін Bolt қызметін пайдаландық (Uber-ге ұқсас, бірақ арзанырақ ұқсас қызмет). Оған еш өкінбедік, себебі біздің такси жүргізушіміз қырғыз болып шықты. Ата-анам туған-туысын кездестіргендей қуанды! Негізі, Орталық Азиядан келген адамдарды кездестірген сайын қуанып жаттық.
Қала ішінде қоғамдық көлікпен жүрдік. Айта кетейін, Прагада 60 жастан асқан адамдарға жолақысына 50% жеңілдік бар. Ал қалааралық қатынас үшін көбінесе FlixBus автобустарын пайдаландық. Бұл компанияның билет сатып алуға арналған сайты мен қосымшасы өте ыңғайлы. Ата-анамға ыңғайсыз бола ма деп қатты алаңдағанмын, бірақ FlixBus автобустарында отырғыштар жайлы, дәретханалары таза екен. Әрі автобустар дәл уақытында жүреді. Бұған біз сапар бойына таңғалумен болдық.
Flixbus автобусы
автобуста
Автобуспен жүрген ең ұзақ сапарымыз жеті сағатқа созылды. Жолда аялдама көп болды. Терезеден сыртқа қарап, кішкентай әдемі ауылдарға тамсана қарап отқандықтан, қатты шаршаған жоқпыз.
Транспортқа жұмсалған шығын:
Қала аралық сапарларға – 230 000 теңге.
Қала ішіндегі сапарларға – 100 000 теңге.
Көлік жалдап, Прагадан Карловы Варыға барғанымыз жайлы
Астанада жүрген кезімізде-ақ, Еуропаны машинамен аралап шығуды жоспарлап қойғанбыз. Маршрут құрастырып жатқанда, Прагада машина жалдап, Карловы Варыға баруға шештік (127 км).
Көлік қайдан жалдайтынымды ұзақ ойландым, алданып қалғым келмеді. Содан localrent.com сайты туралы естіп, сол жерден іздей бастадым. Бағасы қымбат болмайтын седан, көлемі кішкентай автомат қорабы бар, 2020 жылға дейін шыққан қарастырдым. Таңдауым Skoda Fabia-ға тоқтады. Тіпті, кішкене алдын ала төлем жасап қойдым. Бірақ, көлікті алуға барғанда, оның жоқ екенін айтты. Бізге Toyota Corolla (гибрид) ұсынды. Ол жаңарақ және жақсырақ екен, сондықтан қосымша ақы төлеп, жолға шықтық.
Сапарға аттанар алдында қатты алаңдадым. Себебі, машинаны жалдау үшін қазақстандық атым-жөнім жазылмаған кредиттік картамен төлем жасадым (ал сайтта міндетті түрде аты бар карта болуы керек деп жазылған еді). LocalRent кеңсесіне барғанымда ғана жаным тынышталды. Себебі, қызметкер ондай талап туралы айтқан жоқ. Бұл мәселеде менің жай ғана жолым болып кеткен шығар. Сондықтан, машинаны жалдағанда жекелендірілген картаны пайдаланған дұрыс. Әрі оны өзіңізбен бірге алып жүргеніңіз жөн.
Еуропа жолдарында тыныш әрі жайлы жүрдік. Ешкім сигнал баспайды, жол ережесін бұзбайды, алдыңнан кесіп өтпейді. Көлігімізде үлкен экраны бар GPS-навигатор болды, ол өте ыңғайлы. Ол тек маршрутты ғана емес, сонымен қатар қалааралық және қала ішіндегі жылдамдық шектеулерін де көрсетіп отырды.
Автокөлік жалдау: шамамен 50 мың теңге. Бұл бағаға сақтандыру, бензин және ақылы тұраққа қою қызметтері кіреді.
Қайда тамақтандық және саяхат барысында оған қанша қаражат жұмсадық
Ашығын айтқанда, біз Еуропаға тамақ ішуге емес, сыра ішуге бардық. Сондықтан сапардың соңына қарай бір жұтымнан-ақ қай сыра екенін ажырата алатын болдық.
Прагада біз тұрған үйге жап-жақын жерде атмосферасы өте жақсы U Fleku деген мейрамхана болды. Қоныстанғаннан кейін бірден сол жаққа түскі асқа бардық. Сыралары өте дәмді болғанымен, тамақтары ұнамады. Ал Vinohradský Parlament Restaurant-та бәрі өте дәмді болды, әсіресе үйрек еті қосылған түшпаралар қатты ұнады. Туристер арасында танымал Výtopna Railway мейрамханасына да барып көрдік. Мұнда тағамдар мен сусындарды мини-пойыздармен әкеледі екен. Бұл біздің көңілімізді қатты көтерді, себебі сапардың ортасына қарай әңгімеміз таусылуға шақ қалды. Кейде қайда баратынымызды ұзақ ойланып, күтуге уақыт құртпау үшін Макдональдсқа баратынбыз (екі рет солай жасадық).
Будапашттегі Rustico кафесі
қозы етінен жасалған каре
Прагадағы Vinohradský Parlament Restaurant
Супермаркеттер мен мейрамғана тағамдарына: шамамен 400 000 теңге.
Еуропалық қалаларда қандай көрнекті жерлерге бардық
Әкем бірден Прага қаласының әдемі көрінісі ашылатын Прага қамалына (дөңдердегі бекіністер кешені) және Трептов саябағына (Берлинде, онда Қызыл әскерке қойылған үлкен мемориал бар) қатты барғысы келетінін айтты. Ал анам Рейхстагты көргісі келді, өйткені оның әкесіне Берлинді алғаны үшін медаль сол жерде берілген екен. Біз оның айналасындағы аумақта серуендедік, бірақ ішіне кіре алмадық, себебі билетті алдын ала сатып алу керек екен, ал мен оны білген жоқпын. Өтінемін, менің қателігімді қайталамаңдар.
Анам сондай-ақ паромға мінгісі келді. Ол арманды Будапеште жүзеге асырдық. Паромда жүзу мен кешкі асқа алдын ала орын брондап қойдық. Сол кеш өте әдемі болды: көз тартарлық күн батысы мен жанды музыка сиқыры.
Мен белсенді де, жан тыныштыратын демалысты біріктіргім келді (мұндай демалысты баршаға ұсынамын!). Сондықтан Карловы Варыда Saunia Thermal Resort термалды көзін, ал Будапештте Gellért Thermal Bath термалды бассейндерін таңдадық. Бұл екі орынның ұқсастығы – екеуі де қалаға әдемі көрініс ашатын дөңдерде орналасқан, екеуінде де емдік минералды сулар қолданылады және ішінде тамақтануға болады. Бұл – тынышталып, өзіңе келудің ең жақсы жолы.
Берлин соборы
Вроцлавта
Gellert моншалары
Прагада
Трептов-парк
Шпрее өзенінің жағалауында
Вроцлав – Польшаның кішкентай қаласы, оның негізгі көрнекті жерлері орталықта орналасқан. Мұнда біз бүкіл қала бойынша көруге болатын Вроцлав гномдарын іздеп серуендедік (иә, дәл Pokémon Go ойынындағыдай). Краковта Польша корольдерінің резиденциясы – Вавель сарайын аралап, корольдерді таққа отырғызып, жерлеген Кафедралды соборға кірдік және от шашқан Вавель айдаһарының мүсінін көрдік.
Көңіл көтеру және жеке шығыстар: 150 000 теңге.
Қорытынды
Бұл сапар менің үшін сынақ пен әрі керемет саяхат болды. Өмірімде алғаш рет менің негізгі «тапсырыс берушілерім» – ата-анам болды. Олар менің басты сыншыларым, және мен оларға жоғары ыңғайлылықты қаладым. Осы 10 күн ішінде мен оларды да, өзімді де жаңа қырымнан таныдым. Аудармашы-гид болу деген не екенін сезініп, бірге саяхаттау дегеніміз – әрқашанда келісімге келіп, барлық жақ үшін ыңғайлы жағдай жасау дегенді түсіндім. Бақытымызға қарай, менің серіктестерім менің ұсыныстарыма құлақ асып, мен де олардың ұсыныстарын қабылдадым.
Барлық шығын үш адамға шаққанда теңгемен көрсетілген:
Астана-Баку-Прага (және кері) авиабилеттері: 1 170 000
Консультант қызметі және консулдық жинақ: шамамен 210 000
Тұратын жер: шамамен 530 000
Қоғамдық көлік және автобустар: 330 000
Автокөлік жалдау: шамамен 50 000
Дүкендер мен мейрамханалардан тамақ сатып алу: шамамен 400 000
Көңіл көтеру және жеке сатып алулар: 150 000
Барлығы: 2 840 000 теңге
Осы сапардан кейін ата-анам шабыттанғаны соншалық, олар Вьетнам мен Өзбекстанға барып қайтты. Ал енді біз келесі бірлескен сапарымызға – әкемнің арманын орындап, үлкен футбол матчын көру үшін Англияға баруға құжаттар дайындап жатырмыз.
