Суретке қарап дуалап алар: отырғызу талонын әлеуметтік желілерде жарияламаңыз
Әуежайда дәстүрге айналған суретті неліктен әлеуметтік желіге салмай-ақ қойған дұрыс екенін айтып береміз.
Заманауи инстаграм-мәдениет өз бастауын «суреті жоқ болса, жеген де жоқсың» дегеннен алды. Қазір бұл тек фуд-блогерлерге қатысты, ал басқалары үшін тамақ ішкен сайын суретке түсіріп отыру — өткеннің еншісінде.
Бірақ отырғызу талонын сториске салу — нағыз must have! Көпшілік үшін төртбұрышты қағазды көрсетіп қалу — өздерінің демалысқа бара жатқанын бар әлемге жар салудың жалғыз әрі тамаша жолы, әйтпесе бардым-көрдім деме! Егер бұның жорасын жасамайтын болсаң, кокостың дәмі бірден бұзылып, Джоконданың өзі бір шатпақтай көрінер.
Бірақ сол бір төртбұрышты қағаздарыңызда сіз туралы жеке мәлімет тура бір құжат немесе банк картасындағыдай ап-анық көрініп тұрады — мүмкін одан да көп ақпарат беретін шығар.
Отырғызу талонының суретін қарап, нені біліп алуға болады
- Паспорт нөмірі
- Паспорт нөмірі
- Рейс туралы ақпарат
- Жеке пошта
- Бейілдік бағдарламасына қатысу нөмірі
- Билеттің құнын төлеген карта нөмірі
- Билеттің құны
Осының бәрін отырғызу талонындағы тегіңіз, билет нөмірі, брондау коды және рейс уақыты мен нөмірінің арқасында біліп алуға болады. Бірақ бұған көп уақыт жұмсап, ешкім сіз үшін әуре болғысы келмейді деп ойлайсыз ба? Жоға, бәрі бір минутқа да жетпей белгілі болады.
Оны қалай істейді
Оп-оңай. Жеті атаңызға дейінгі саяхат тарихын біліп алу үшін әуе компаниясының сайтына кіріп, отырғызу талонына әдемілеп жазып қойған тегіңіз бен брондау кодын енгізгсе болғаны — басқа ештеңе керек емес.
Қандай салдары бар
Түрлі нұсқасы бар, сізге бір де біреуі ұнай қоймас. Кәсіпқой алаяқтар ма әлде қызғаныштан өртенген бұрынғы сүйген жаныңыз ба, демалысыңызды шырқын кім бұзғысы келетіні маңызды емес: олардың қолынан бәрі келеді. Суретке қарап дуалау аса қиын емес — тіпті қастандық ойлаған жанның тұқымында қара сиқыршының болуы да міндетті емес.
1-нұсқа
Кері қайтатын билеттің күшін жою. Жоғарыда сөз өткен мәліметтерді айтып, әуе компаниясына бір рет қоңырау шалса болғаны — сіз байбалап салып, бөтен елдің әуежайында жүгіріп жүресіз (бәлкім, бөтен қалада қалып қоярсыз, бірақ сонда да жақсы емес), тағы ақша шығарып, жаңа билет сатып аласыз да, не болып қалды өзі деп ойға батасыз. Тура детективтегідей: «Зардап шеккен адамның жауы болды ма жоқ еске түсіріп көресіз бе?». Әрине, біреу осылайша кек алайын деп шешкен шығар, бірақ, біріншіден, кейбіреулер танымайтын адамға қараптан-қарап қастандық жасауы мүмкін, екіншіден, бұны кім істеді деп дал болып жүргенде жүйкеңіз бен әмияныңызға да оңай соқпайтыны сөзсіз.
2-нұсқа
Бонус шотын бұзуға тырысу. Сәйкестендіруден өту керек болса да, алаяқтардың қолынан келмейтіні жоқ. Поштаңыз бен телефоныңызда қолында болмаса да, олар бірдеңе ойлап табар. Пошта мен телефонды тауып алу да аса бір қиын іс емес қой.
3-нұсқа
Сіздің атыңызға несие алу. Болашақта біраз мазаңызды алатын жағдай. Паспорттың өзі болмаса несие бермейді ғой дейтін шығарсыз? Мүмкін жоғалтып алған немесе жасанды паспорт бойынша да несие бермейтін шығар? Қойыңызшы тегі. Онлайн-қарыз беретін түрлі компаниялар болуы мүмкін немесе алаяқ банк қызметкерлерімен сыбайлас болса ше (банк атауын төлем картасынан біліп алуға болатынын ұмытпаймыз)? Кейін домбырам не дейді, мен деймін деп біраз жүріп қаласыз. Шаршатып жібереді ғой.
Отырғызу талонының бур суретіне бола сіз тап болатын тағы бір-екі қорқынышты жағдай туралы айтып бере алар едік — бірақ біз алаяқтар сияқты түрлі-түрліні ойластыра алмаймыз, сондықтан тағы да қайталап айтамыз: отырғызу талонының суретін ешқашан желіде жарияламаңыз.
Енді бір болмай бара жатса — бар мәліметті өшіріп тастаңыз: нөмірлер, штрихкодтар, брондау коды. Тегіңіз бен баратын жеріңіз қалсын. Діттегеніңіз бе сол емес пе?
