Тиролдегі Рождество: Альпілердегі маусымды қалай аштық
Жатын орын мен тамақтану, Майрхофендегі сырғанау және бағалар.
Сәлем, менің атым Зайра, алматылықпын. 2024 жылы құрбым екеуіміз Рождество мен Жаңа жылды Еуропада қарсы алуды шештік. Екеуіміз де шаңғы тебуді жақсы көреміз, сондықтан Тирольде көптеген тау шаңғы курорты бар болғандықтан, оны маршрутымызға қосуды жөн көрдік. Құрбым бұрынырақ Майрхофенде болған. Бұл осы аймақтағы ең ірі курорттардың бірі. Сондықтан біз демалыс аймағын өзгертпей, оған таныс жерге қайта оралуды ұйғардық.
Ақпарат үшін: мен сноубордпен бұрыннан айналыссам да, тұрақты түрде теуіп тұрмаймын. Маусымына шамамен бес-алты рет қана. Әдетте Шымбұлақ, Ой-Қарағай, сирек Ақ-Бұлаққа да барып тұрамын. Қаракөл, Шерегеш, Гудауриге бару жоспарымда болған, бірақ олар жүзеге аспады. Майрхофен – менің шетелде алғаш рет сырғанаған жерім, бұл мен үшін ұмытылмас тәжірибе.
Майрхофенге апарар жол
Цюрихке мен Pegasus әуе компаниясымен ұштым. Билетті алдын ала науқанмен сатып алғандықтан, ұшу бар болғаны 65 доллар тұрды. Қайтар жолға билет 240 долларға түсті, бірақ оны да алдын ала алдым. Егер бастапқыда Австрияға сапар жоспарланған болса, Инсбрук немесе Мюнхенге ұшу ыңғайлырақ болар еді. Бірақ менің маршрутым біртіндеп қалыптасты. Мен алдымен Швейцарияға қонаққа бардым, содан кейін сырғанауға бару ойыма келді.
Цюрихтен Инсбрукқа пойызбен шықтым, одан кейін Йенбахқа, сол жерден жергілікті пойызбен Майрхофенге жеттім. Билеттерді Швейцарияның SBB CFF FFS көлік қосымшасы арқылы сатып алдым, онда австриялық пойыздарға да билет алуға болады. Менде бір айлық швейцариялық жол жүру абонементі болды (75 600 теңге не 140 евро), ол пойыздар, паромдар және Швейцариядағы Бернина панорамалық пойызын қоса алғанда, барлық көлік түрлеріне 50% жеңілдік берді. Пойыз билеттерінің жалпы құны шамамен 44 280 теңгені құрады.
Көлікке (ұшақтар мен пойыздар): шамамен 280 260 теңге (519 еуро).
Жатын орын мен тамақтану
Мұндай аумақтарда тұрғын үйді алдын ала брондап қойған дұрыс. Жақсы нұсқалар тез өтіп кетеді. Біз сапарға үш апта қалғанда Booking.com арқылы пәтер тауып үлгердік, бірақ егер күндер алдын ала белгілі болса, кейінге қалдырмаған жөн.
Біз Майрхофен ауылында тұрдық, онда шамамен 3 500 адам тұрады. Қонақүйде жеке асүй және тауларға керемет көрініс ашатын самалдығы болды. Уақыт үнемдеу үшін таңғы асты өзіміз дайындадық, ал азық-түлікті SPAR супермаркетінен сатып алдық. Түскі және кешкі асты курорт аймағындағы дәмханалардан іштік. Ауылда және курортта көптеген дәмхана мен мейрамхана бар, кез келген талғамға сай орын таба аласыз.
Тік көтергіштің жанында ет дүкені жұмыс істеді, онда жаңа дайындалған тағамдарды сатып алуға болатын. Мысалы, етпен сэндвич шамамен 2 700 теңге (5 евро) тұрды.
Тұрғын үйге: 4 түнге 163 620 теңге (екі адамға, 303 евро).
Тамақтануға: орташа есеппен күніне 21 600 теңге (40 евро), супермаркеттен сатып алған азық-түлікпен бірге есептелген.
Сұрғану
Майрхофен – жаңадан бастаушыларға да, тәжірибелі шаңғышыларға да ыңғайлы әмбебап курорт. Адамдар мұнда отбасыларымен, балаларымен және егде жастағы туыстарымен келеді. Курортта барлығы 142 шақырым тау шаңғысы жолдары және 61 көтергіш бар. Орташа түсу ұзындығы шамамен бес шақырым, ал ең ұзын жол – 13 шақырым.
Қонақ үйіміздің алдында аялдама болды. Ол жерден көтергішке дейін қатынайтын тегін шаттл автобус жүрді. Тау шаңғысы билеттерін (ски-пасс) алдын ала сатып алмауға болады. Оларды көтергіштердің қасындағы кассалардан немесе онлайн рәсімдеуге болады. Көтергіштер таңғы сағат сегізден кешкі төртке дейін жұмыс істейді, соңғы көтерілу – 16:30-да.
Курортта адам көп болды, бірақ көтергіштерде тығыздық пен бітпейтін кезектер болған жоқ. Барлығы жолдарға біркелкі таралды.
Жергілікті тұрғындар желтоқсаннан сәуірге дейін Циллерталь аңғарындағы барлық курортта жарамды маусымдық абонемент сатып алатынын білдік. Оның құны шамамен 570 мың теңге (1 055 еуро).
Ски-пасс: күндізгі – 42 120 теңге (78 еуро), 11:00-ден – 36 720 теңге (68 еуро).
Жабдықты жалға алу: сноуборд – 43 еуро, шаңғы – 32 еуро, шлем – 5 еуро. Егер бірнеше күнге алсаңыз, күніне 2 еуро жеңілдік бар.
Après-ski
Белсенді кештерден кейін таңертең ояну қиындау, бірақ тау бөктеріне шыққан бойда күш пен қуат бірден қайта оралды. Альпі таулары өзінің сұлулығымен және энергетикасымен баурап алады.
Қорытынды мен кеңестер
Егер лакшери демалыс іздесеңіз, Майрхофен ондай орын емес. Ол жер өте қарапайым, алайда өзіндік атмосферасы мен көңіл-күйі бар. Бару керек пе, жоқ па деп ойласаңыз, міндетті түрде барған жөн! Тәжірибе соған тұрарлық және мен міндетті түрде қайта ораламын. Тек бізге төрт күн аз болды. Мүмкіндік болып жатса, кем дегенде алты күндік демалысты жоспарлаған дұрыс. Әрине, басқа шаңғышылармен топтасып, бірге бару сапарды одан да қызықты етеді.
Суретті салған — Ольга Цай.
