Сингапурдағы 96 сағат: ең жақсы аймақтар, саябақтар және дәмді тағамдар
Жасыл ғимараттар, атмосфералы аудандар және 3000 теңге тұратын Мишлен жұлдызын алған көше тағамдары.
Сәлем, менің атым Зарина, Сингапурда тұрып жатқаныма екі жылдан асты. Осы уақыт ішінде Сингапурдың кем дегенде бір рет көруге тұрарлық жер екеніне көзім жетті. Мұнда Оңтүстік-Шығыс Азияның барлық кереметі мен экзотикасы жиналған — біреу Азияның ең жақсы дүниелерін алып, оны тап-таза және жылтыр шыны ыдысқа салып қолғандай.
Бұл мақалада мен қазақстандықтарға виза қажет пе, нені міндетті түрде көру керек екенін және Сингапурда дәмді тағамды қай жерде жеуге болатынын айтып беремін.
Сапар алдында білу керек нәрселер
Сингапур — аумағы Астанадай-ақ шағын арал, бірақ ол шын мәнінде «Азияның кереметі». Мұнда технологиялар Азия мәдениетімен жақсы үйлесім тапқан, ал тазалық пен тәртіп деңгейі көптеген Еуропа астанасын артта қалдырады.
Арал экватордың бойында орналасқан, сондықтан мұнда жыл бойы ыстық, ылғалды және жаңбырлы болады. Жеңіл киім, ыңғайлы аяқкиім, күннен қорғайтын крем және жауын өткізбейтін киім алып келіңіз. Розеткалар британдық нұсқада (G түрі), сондықтан адаптерді ұмытпаңыз. Бір жақсысы, Сингапурда ауыз суды краннан тікелей іше беруге болады.
Мұнда әр бұрышта камера бар, сондықтан тәртіпке қатаң қарайды. Міне, Сингапурда мүлдем жасауға болмайтын нәрселер тізімі:
- Тыйым салынған жерде қоқыс тастау немесе темекі шегу: 385 мың теңгеге дейін айыппұл (1 000 SGD).
- Вейп пен электронды темекілер (барлық жерде, тіпті үйде): 768 мың теңгеге дейін айыппұл (2 000 SGD).
- Метрода сусын ішу, тамақ жеу: 192 мың теңгеге дейін айыппұл (500 SGD).
- Сағызды әкелу, сату және қоқысқа тастау: 768 мың теңгеге дейін айыппұл (2 000 SGD).
Таксиге Grab, Tada немесе Gojek арқылы тапсырыс берген ыңғайлы. Ал байланыс үшін eSIM немесе кәдімгі SIM-картаны алдын ала сатып алыңыз (7-Eleven дүкенінде сатылады).
Fort Canning park
MacRitchie Reservoir
Қала орталығы
Ботаникалық бақ
Сингапурға жету және оған қажетті құжаттар
Қазақстаннан Сингапурға тікелей ұшатын рейстер жоқ. Сіз Куала-Лумпур, Доха, Пхукет, Бангкок немесе Дубай арқылы ұша аласыз. Ең арзан бағыт — Алматыдан Куала-Лумпурға AirAsia лоукостері арқылы ұшу және сол жерден күн сайыен Сингапурға ұшатын 30 рейстің бірін таңдау.
Қазақстан азаматтары үшінші елге (әуе немесе теңіз көлігі) билеті болған жағдайда Сингапурда транзиттік уақыт бойынша 96 сағат өткізе алады. Мысалы, сіз Алматыдан Куала-Лумпурға келдіңіз, одан кейін Сингапур арқылы Балиге ұшып барасы делік, мұндағы үшінші ел — Индонезия.
Егер сіз ұзаққа қалғыңыз келсе, туристік визаға өтініш беру туралы нұсқауларды ресми сайттан табуға болады. Сингапурға виза алу үшін қажетті негізгі құжаттар:
- Төлқұжат.
- Толтырылған 14А формасы. Мына жерден жүктеп алуға болады.
- Брондалған билеттер мен қонақүй.
- Іссапарлар үшін: шақыру, 39А формасы, мына жерден жүктеп алуға болады.
- Туристер үшін: Сингапурда болатын әр күніңізге 100 АҚШ долларынан келетінін растайтын банк анықтамасы.
- 3,5х4,5 цифрлық суреті, фотосалонға барып ақ фонда түсіп, JPG форматында жіберген жөн.
Визаға өз бетіңізше өтініш бере алмайсыз, бірақ оны Қазақстандағы Сингапур елшілігі арқылы жасай аласыз. Байланысу үшін [email protected] электрондық поштасына жазу керек. Тағы бір жолы — жергілікті өкіл немесе уәкілетті серіктес арқылы: Сингапур азаматы немесе мына платформа арқылы сіздің атыңыздан өтініш бере алатын резидент. Елшілік арқылы өтініш берсеңіз, шамамен 45 мың теңге визалық алым төлейсіз, өкілдер арқылы өтініш берсеңіз — 11 600 теңге.
Баспананы брондау және қаланы аралау
Қонақ үй бағасы қымбат, өйткені аралдағы әрбір шаршы метрдің құны алтындай. Ыңғайлы және кең бөлмелерге етіңіз үйренсе, түніне 115 мың теңгеден (300 SGD) төлеуге дайын болыңыз, бірақ арзан нұсқалар да бар. Booking немесе Airbnb сервистері арқылы пәтер жалдауға болады. Елде ұзаққа қалсаңыз, пәтерді мына жерден іздеген жөн.
Сингапурдағы қоғамдық көліктер қолжетімді, таза және аралдың кез келген жеріне апарады. Ең жақсысы, туристерге көлік картасын сатып алудың қажеті жоқ — олар кәдімгі банк картасымен, телефонмен немесе смарт сағатпен төлей алады. Google Maps болса оп-оңай кез келген бағытты көрсетіп береді.
Сингапурдың қызықты жерлері және тағамдары
Сингапур — шағын арал, сондықтан жергілікті тұрғындар үшін мұнда ыстық әрі тар болып жатады. Сол себепті де олар ойын-сауыққа және демалуға қолайлы жағдай жасауға ерекше мән береді. Мен төмендегі жерлерге баруға кеңес берер едім.
Сингапурдың «алтын ауданы»
Katong — жергілікті ауқатты отбасылардың ескі виллалары музейлер мен мейрамханаларға айналдырылған аймақ. Қашалған терезе қақпағы бар түрлі-түсті дүкендердің алдында суретке түсіп, Сингапурдың әйгілі сорпасы — лаксадан дәм татыңыз. Бұл теңіз өнімдерін қосып, кокос сорпасында қайнататын ащы тағам, 328 Katong Laksa-ға баруға кеңес беремін. Егер сіз сорпадан кейін десерт жегіңіз келсе, Мишлен гидіне енген Сингапурдың экзотикалық балмұздағынан дәм тату үшін Birds of Paradise-ке барыңыз.
Вертикаль бақтар
Міндетті түрде қала орталығында (downtown) серуендеп, жасыл желекке оранған зәулім ғимараттарды тамашалаңыз. Менің ойымша, ең ерекшелері мыналар: Park Royal Hotel, Oasia Hotel, CapitaSpring және Pan Pacific Orchard.
Қызық факт: Сингапурда қандай да бір құрылыс салушылар кесілген ағаштарды дәл ғимараттардың бойына жасыл желек отырғызу арқылы өтеуге міндетті.
Бизнес-аймақта жүргенде қарныңыз ашса, мына жерлердің біріне соға кетіңіз:
Lau Pa Sat — бизнес-дистриктің қақ ортасында орналасқан үлкен фуд-корт. Жержаңғақ тұздығын қосып, шоқта піскен кәуап (сатэй), устрица омлеті мен қытырлақ сарымсақ нанын (garlic naan) жеп көріңіз. Орташа чек — бір адамға 8 000 теңге.
Whole Earth — Michelin Bib Gourmand марапатын алған перанакан және тай тағамдарын ұсынатын вегетариандық кафе. Мойындауым керек, мен үшін бұл Сингапурдағы hidden gem! Зәйтүн майында қуырылған қоңыр күрішті, жасыл тай карриін және саңырауқұлақ рендангынан дәм татыңыз. Орташа чек — 20 мың теңге.
Toast Box — ескі Сингапурдың атмосферасын сезінуге болатын жайлы ретро стиліндегі кафелер желісі. Дәстүрлі Сингапур таңғы асын, қытырлақ кокос-жұмыртқа джемін (kaya toast), жергілікті кофе (копи) немесе дәмді сүт қосылған малай шайын (Teh tarik) алыңыз. Орташа чек — 4 мың теңге.
Wild Honey – Еуропа тағамдарын ұсынатын жайлы кафе. Мұнда сіз сэндвич, салат, ет тағамдары немесе таңғы асқа тапсырыс бере аласыз, мысалы, мұнда норвегиялық таңғы ас бар. Орташа чек — 15 мың теңге.
Lau Pa Sat
Мапо тофу (ащы тофу, Сычуань тағамы)
Marina Bay Sands, Cloud Forest және Gardens by the Bay-дегі жарық шоуы
Қала орталығына қарай бара жатқанда атақты Marina Bay Sands қонақ үйінің маңында серуендеп, биік сарқырама мен сирек кездесетін өсімдіктері бар Cloud Forest жылыжайына кіріп шығуға кеңес беремін. Кешке Gardens by the Bay-дегі «суперағаштар» жарық шоуын тамашалаңыз.
Құны: Cloud Forest билеті — 10 мың теңге. Мына жерден сатып ала аласыз. Gardens by the Bay жарық шоуына кіру тегін, күн сайын 19:45 және 20:45-те.
Қытай, үнді және араб кварталдары
Chinatown, Little India және Arab Street — Сингапурдың атмосферасы ең қатты сезілетін үш аймақ. Мұнда сіз бір уақытта бірнеше ел арасында саяхаттай аласыз: храмдарды, мешіттерді көріңіз, дәстүрлі тағамдардан дәм татыңыз және Сингапурдың ерекшелігіне айналған мәдениеттер тоғысуын сезініңіз.
Храмдар мен пагодаларды көріп үлгеру үшін қытай және үнді аймақтарына күндіз барған дұрыс. Содан кейін сіз әйгілі Hawker Chan-ға барып, соя тұздығында піскен тауық пен күріштен дәм татып, жүрек жалғай аласыз. Өкінішке орай, енді мекеменің Мишлен жұлдызы жоқ, бірақ тағамдары бұрынғыдай. Орташа чек — 4000 теңге шамасында. Ал егер сіз жай ғана тіскебасар алғыңыз келсе, MTR үнді кафесіне барып, кокос тұздығы қосылған үнді құймақтарына (dosa with coconut chutney) тапсырыс беруге болады. Орташа чек — 8 мың теңге.
Үнді кварталында серуендеп жүргенде Mustafa сауда орталығына барып, жақындарыңызға кәдесыйлар сатып алыңыз, бұл жердің бағалары жақсы.
Құстар саябағы
Балалардың да, ересектердің де көңілінен шығатын құстар саябағы. Маған Mandai Bird Park-тың ерекше ұнайтын тұсы: декорациялар мен кең қоршаулардың арқасында саябақ шынымен табиғи аймақтай сезіледі, сол себепті құстар емін-еркін ұшып жүреді. Саябаққа кем дегенде жарты күн уақыт бөліңіз, өйткені ол кәдімгідей үлкен және қала орталығынан алыс орналасқан.
Құны: ересектер билеті 19 мың теңгеден басталады, балалар үшін – шамамен 13 мың теңге. Мына жерден сатып ала аласыз.
Universal Studios
Universal Studios паркінде толық бір күнді өткізуге болады, өйткені онда аттракциондар, арнайы зоналар, шоу, мейрамханалар мен кез келген жанның көңілін аулайтын ойын-сауық жетерлік. Міндетті түрде «Мумия», «Трансформерлер» және «Циклон» аттракциондарына мініңіз, мен оларды жақсы көремін.
Құны: ересектер билеті шамамен 32 мың теңге тұрады, балалар үшін – 24 мың теңге. Мына жерден сатып ала аласыз.
Чанги әуежайындағы Jewel
Қорытындылай келе, бетке ұстар жерге айналған әуежайдағы Jewel сауда орталығна тоқталайық. Ұшатын күні әуежайға ерте келіп, жабық сарқыраманы тамашалыңыз, сауда жасаңыз және Din Tai Fung мейрамханасында кешкі асқа димсам алдырыңыз.
