Үй жануарын ұшақтың салонында алып жүруге болады, салмағы 50 келіден көп дәу иттерді жылытылатын жүк салатын бөлікте немесе карго ретінде жөнелтеді. Жануарды алып өту үшін қосымша төленеді, бағасы үй жануарының салмағы мен тасымалдағыштың өлшеміне байланысты.
Салонда
Әдетте салонға мысық, ит пен құстарды қабылдайды, алайда үй жануарының өлшеміне қарай шектеулер де бар, сатып алмас бұрын міндетті түрде әуе компаниясының ережелерін тексеріп алыңыз. Салонға кіргізуге болатын құйрықтылардың немесе қанаттылардың да тізімін нақты біліп алған дұрыс, әр тасымалдаушының тізімі әртүрлі болуы мүмкін.
Бірге алып өту ережесі деген үй жануары ұшқан кезде тасымалдағышта болады дегенді білдіреді. Егер құс алып ұшатын болсаңыз, оны чехолмен қапталған торда ұстағаныңыз абзал.
Тасымалдағышты алдыңғы жақта тұрған креслоның орындығының астына орналастырады. Оның биіктігі 20 см‑ден аспауы тиіс, әйтпесе сыймайды, ал үш жағын қосқанда, 115 см‑ден аспағаны жөн. Үй жануарының салмағы тасымалдағышпен бірге 8 келіден аспауы тиіс. Әуе компаниясына байланысты рұқсат етілген салмақ пен тасымалдағыштың көлемі ерекшеленуі мүмкін, талаптарды тасымалдаушы сайтынан тексеріп алыңыз.
Бірқатар әуе компаниялары үй жануарын жанындағы креслода тасымалдау үшін қосымша қызмет ұсынады. Ең алдымен саяхатты жоспарламас бұрын тасымалдаушыға хабарласып, сізге керек күні нақты рейс бойынша үй жануарын алып өте аласыз ба жоқ па, соны анықтап алыңыз.
Қандай құжаттар керек болады?
Елге, үй жануарының түрі мен тұқымына байланысты құжат ережелері өзгеруі мүмкін. Билет сатып алмай тұрып, соларды тексеріп алыңыз.
Көбіне қажет болатын құжаттар:
- Халықаралық үлгідегі ветеринарлық төлқұжат.
- Чип.
- Үй жануарының денсаулығы туралы анықтама.
- Құтыруға қарсы салынған екпе.
- Кейбір жағдайда жануарыңыздың асыл тұқымдыға жатпайтыны туралы анықтама, сондай-ақ жануардың қанында құтыру вирусына қарсы антидене титрының анықталғаны туралы анықтама (мысалы, Еуропаға, Израильге, Жапонияға, Оңтүстік Кореяға, Қытайға, Австралия мен бірқатар араб елдеріне шығу үшін).
Жануармен бірге саяхатқа қалай дайындалу керек?
Дайындықты мүмкіндігінше ертерек, ұшқанға дейін бірнеше ай бұрын бастаған дұрыс. Барлық құжатты жинап, қажетті екпелерді салдыртуға көп уақытыңыз болады.
Билетті онлайн алсаңыз, сатып алған кезде немесе билетті сатып алғаннан кейін әуе компаниясына телефон шалып, үй жануарын тасымалдайтыныңызды келісіп алыңыз. Бұл — өте маңызды, өйткені ұшақ салонындағы үй жануарының саны мен жолжүк тасымалдағышының санына, сондай‑ақ олардың бір рейске қойылатын өз шектеулері бар. Сонымен қоса, тасымалдаушылардың брахицефал тұқымдасына жататын иттер мен мысықтарды бірге алып ұшуға қоятын шектеулері бар, ережесін сайттан немесе әуе компанияның қолдау орталығынан анықтап білген жөн.
Бірге алып өтуге рұқсат алған кезде жануардың қажетті екпесі мен чипінің бар‑жоғына көз жеткізіп, барлық құжатын даярлаңыз. Егер соңғы жылдары үй жануарына екпе салдырмасаңыз, онда ұшпай тұрып бір ай бұрын салдыртып алыңыз.
Келесі қадам — тасымалдағыш сатып алу. Жануарды өзін жақсы әрі жайлы сезінуі үшін оны тасымалдағышқа бұрынырақ үйреткен абзал. Мысығыңыз немесе итіңіз толық сыйып, еркін қимылдауы үшін тасымалдағыш кең болғаны абзал. Тасымалдағыштың еденіне жаялық төсеп қойған дұрыс, әсіресе алысқа ұшқан кезде ыңғайлы.
Егер тасымалдағышты багажға тапсыратын болсаңыз, тасымалдағышқа байланыс мәліметтеріңіз, ұшатын бағыт пен күні, сонымен қоса үй жануарының аты жазылған қағаз жабыстырып қоюды ұсынамыз. Мекенжай жазылған белгі жөнінде де ұмытпаңыз, үй жануарында үнемі болғаны абзал.
Егер итіңізбен немесе мысығыңызбен ауысып мінуге тура келіп, ұзақ ұшатын болсаңыз, үй жануарын әуежай қызметкерлері шығарған жағдайда жүк тасымалдағышқа қарғыбауын қоса салып қойыңыз. Бейтаныс адамға жануарыңызды серуендету жеңілдеу болады. Жүк салғыштың сыртына ағылшын тілінде жазып қойыңыз. Азығын салып, су құйып қойыңыз, ұзақ сапар кезінде үй жануарына қолжетімді болсын.
Әуежайға рейс ұшқанға дейін кемі үш сағат бұрын келіңіз, үй жануарын рәсімдеу үшін сізге уақыт керек болады. Үй жануарымен онлайн тіркелуге болмайтынын ұмытпаңыз. Оның үстіне шетелдік рейспен ұшқанда міндетті түрде ветеринарлық бақылаудан өту керек.
Ұшатын күні үй жануарына азық бермеген дұрыс. Ең маңыздысы алдын ала ветеринармен кеңеспей, үй жануарына тыныштандыратын дәрі‑дәрмек бермеңіз. Егер дәрі‑дәрмексіз болмаған жағдайда дәрі мен дозасын таңдау үшін ветеринардың көмегіне жүгінген абзал.